ಹೊಸಪೇಟೆ 21: “ಭಾರತೀಯ ಬಹುಭಾಷೆಗಳಲ್ಲಿ ಸಾಮರಸ್ಯ ಮೂಡಿಸುವ ಕಾರ್ಯವನ್ನು ಸಾಂಸ್ಥಿಕ ಭಾಷಾಂತರಗಳು ಮಾಡುತ್ತವೆ” ಎಂದು ಹಿರಿಯ ಸಾಹಿತಿಗಳಾದ ಅಗ್ರಹಾರ ಕೃಷ್ಣಮೂರ್ತಿ ಅವರು ಹೇಳಿದರು. 

ಹಂಪಿ ಕನ್ನಡ ವಿಶ್ವವಿದ್ಯಾಲಯದ ಭಾಷಾಂತರ ಅಧ್ಯಯನ ವಿಭಾಗದಲ್ಲಿ ದಿ. 20 ಸೋಮವಾರದಂದು ಹಮ್ಮಿಕೊಂಡಿದ್ದ ‘ಸಂವಾದ ಕಾರ್ಯಕ್ರಮ’ದಲ್ಲಿ ಅವರು “ಸಾಂಸ್ಥಿಕ ಅನುವಾದಗಳ ಸವಾಲುಗಳು” ಎಂಬ ವಿಷಯದ ಕುರಿತು ಮಾತನಾಡುತ್ತಿದ್ದರು. ಮುಂದುವರೆದು ಅವರು ಸಾಂಸ್ಥಿಕ ಭಾಷಾಂತರದ ವ್ಯಾಪಕತೆ ಅಪಾರವಾದದ್ದು. ಸ್ವಾಂತಂತ್ರ್ಯ ಬಂದ ನಂತರದಲ್ಲಿ  ಆಡಳಿತಗಾರರು ಸಾಹಿತ್ಯ ಮತ್ತು ಸಂಸ್ಕೃತಿಯನ್ನು ಅಭಿವೃದ್ಧಿಪಡಿಸುವ ಸಲುವಾಗಿ ಕೇಂದ್ರ ಸಾಹಿತ್ಯ ಅಕಾಡೆಮಿ, ನ್ಯಾಷನಲ್ ಬುಕ್ ಟ್ರಸ್ಟ್‌ ಮುಂತಾದ ಸಂಸ್ಥೆಗಳನ್ನು ಸ್ಥಾಪಿಸಿದರು. ಅಲ್ಲದೇ ಇಂತಹ ಸಂಸ್ಥೆಗಳು ಅನುವಾದಕರ ಕೆಲಸ ನಿರರ್ಥಕವಾಗಿರುವಂತಹ ಸಂದರ್ಭದಲ್ಲಿ ಅವರನ್ನು ಗುರುತಿಸುವಂತಹ ಕೆಲಸವನ್ನು ನಿರ್ವಹಿಸಿದವು ಎಂದರು. 

ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ ಭಾಷಾಂತರ ಅಧ್ಯಯನ ವಿಭಾಗದ ಪ್ರಾಧ್ಯಾಪಕರಾದ ಪ್ರೊ. ಮೋಹನ್ ಕುಂಟಾರ ಅವರು “ಭಾಷಾಂತರ ಎಂಬುದು ಸೃಜನಶೀಲ ಪ್ರಕ್ರಿಯೆ. ಸಾಂಸ್ಥಿಕ ಭಾಷಾಂತರದ ದೃಷ್ಟಿಯೇ ಭಾರತದ ಎಲ್ಲಾ ಭಾಷೆಗಳ ಸಾಹಿತ್ಯವನ್ನು ಏಕರೂಪದಲ್ಲಿ ನೋಡುವುದು. ಆ ಮೂಲಕ ಭಾವೈಕ್ಯ ಸಾಧಿಸುವುದೇ ಈ ಸಂಸ್ಥೆಗಳ ಮುಖ್ಯ ಉದ್ದೇಶ ಎಂದು ಹೇಳಿದರು”. 

ಕಾರ್ಯಕ್ರಮದಲ್ಲಿ ಭಾಷಾಂತರ ಅಧ್ಯಯನ ವಿಭಾಗದ ಸಂಶೋಧನಾರ್ಥಿಗಳು, ಇತರ ಅಧ್ಯಯನ ವಿಭಾಗಗಳ ಸಂಶೋಧನಾರ್ಥಿಗಳು ಹಾಗೂ ಎಂ.ಎ ಸ್ನಾತಕೋತ್ತರ ವಿದ್ಯಾರ್ಥಿಗಳು ಭಾಗವಹಿಸಿದ್ದರು. ಕಾರ್ಯಕ್ರಮವನ್ನು ರೆಬೆಕ್ಕ ನಿರೂಪಿಸಿದರು, ವೀನೀತಾ ಜೆ.ಎಂ ಸ್ವಾಗತಿಸಿದರು ಹಾಗೂ ಶ್ವೇತ ಬಾಳಿ ವಂದಿಸಿದರು.