ಲೋಕದರ್ಶನ ವರದಿ 

ಕಾರವಾರ ಮೇ.15: ಆಕಾಶವಾಣಿ 90ರ ವರ್ಷಾಚರಣೆಯ ಅಂಗವಾಗಿ ಕಾರವಾರ ಆಕಾಶವಾಣಿ ಕೇಂದ್ರವು ರವೀಂದ್ರ ಠಾಗೋರ್ ಕಡಲ ತೀರದಲ್ಲಿ ಹಮ್ಮಿಕೊಂಡಿದ್ದ ಸಮೂಹ ನಡಿಗೆಗೆ ಕಾರವಾರದ ಅವರ್ ಸೋಷಿಯಲ್ ಗುಡ್ ಸಂಸ್ಥೆಯ ಪವನ್ ಸಾವಂತ್, ಬ್ರಹ್ಮಕುಮಾರಿ ಈಶ್ವರೀಯವಿಶ್ವ ವಿದ್ಯಾಲಯದ ಜಿಲ್ಲಾ ಸಂಯೋಜಕಿ ಬಿ.ಕೆ.ಕವಿತಾ ಹಾಗೂ ಆಕಾಶವಾಣಿ ಕಾರವಾರ ಕೇಂದ್ರದ ಕಾರ್ಯಕ್ರಮ ಮುಖ್ಯಸ್ಥ ಟಿ.ಶ್ಯಾಮ ಪ್ರಸಾದ್ ಅವರು ಹಸಿರು ನಿಶಾನೆ ತೋರಿಸುವ ಮೂಲಕ ಶುಕ್ರವಾರ ಚಾಲನೆ ನೀಡಿದರು. 

ನಡಿಗೆಯು ಠಾಗೋರ್ ಕಡಲ ತೀರದಿಂದ ಆರಂಭಗೊಂಡು ಹೆಂಜಾ ನಾಯ್ಕ ವೃತ್ತ, ಕೋಡಿಭಾಗ್ ರಸ್ತೆಯ ಮೂಲಕ ಸಾಗಿ ಬಂದ ಮೆರವಣಿಗೆ ಆಕಾಶವಾಣಿ ಕಾರವಾರ ಕಚೇರಿ ಆವರಣದಲ್ಲಿ ಸಮಾಪನಗೊಂಡಿತು. ದಾರಿಯುದ್ದಕ್ಕೂ ಆಕಾಶವಾಣಿ-ಮಧುರವಾಣಿ,ಉಲಿ-ಬಾನುಲಿ, ಆಕಾಶವಾಣಿ-ನಮ್ಮ ವಾಣಿ ಮೊದಲಾದ ಉದ್ಘೋಷಗಳು ಮೊಳಗಿದವು. ಕಾರ್ಯಕಮದಲ್ಲಿ ಕಾರವಾರದ ಆಕಾಶವಾಣಿ ಸಿಬ್ಬಂದಿ, ಕಾರ್ಯಕ್ರಮ ಸಹಾಯಕರು, ರೋಟರಿ ಕಾರವಾರ,ಅವರ್ ಸೋಷಿಯಲ್ ಗುಡ್ ಸಂಸ್ಥೆ ಹಾಗೂ ಇನ್ನಿತರರು ಸೇರಿದಂತೆ 100ಕ್ಕೂ ಹೆಚ್ಚು ಜನರು ನಡಿಗೆಯಲ್ಲಿ ಭಾಗವಹಿಸಿದರು.ಎಲ್ಲರಿಗೂ ಪ್ರಮಾಣ ಪತ್ರ ವಿತರಿಸಲಾಯಿತು.