ದಾಂಡೇಲಿ ಜ 31 :  ಆರೋಗ್ಯ ಮತ್ತು ಸ್ವಚ್ಚತೆ ಒಂದಕ್ಕೊಂದು ಪೂರಕವಾಗಿವೆ. ವೈಯಕ್ತಿಕ ನೈರ್ಮಲ್ಯ, ಸ್ವಚ್ಚ ಪರಿಸರ ರೋಗ ಮುಕ್ತ ಸಮಾಜ ಆರೋಗ್ಯಕರ ಸಮಾಜ ನಿರ್ಮಾಣಕ್ಕೆ ಅನಿವಾರ್ಯವಾಗಿದೆ ಎಂದು ದಾಂಡೇಲಿ ಜೆ.ಎಮ್‌.ಎಪ್‌.ಸಿ ನ್ಯಾಯಾಲಯದ ನ್ಯಾಯಾಧೀಶರಾದ ತೇಜಸ್ವಿನಿ ಸೊಗಲದ ನುಡಿದರು. ಅವರು ನ್ಯಾಯಾಲಯದ ಆವರಣದಲ್ಲಿ ದಾಂಡೇಲಿ ನಗರಸಭೆ, ನ್ಯಾಯಾವಾದಿಗಳ ಸಂಘ, ಕಂದಾಯ ಇಲಾಖೆ, ಅಭಿಯೋಜನಾ ಇಲಾಖೆಯ ಆಶ್ರಯದಲ್ಲಿ ಜರುಗಿದ ರಾಷ್ಟ್ರೀಯ  ಸ್ವಚ್ಚತಾ ದಿನಾಚರಣೆಗೆ ಚಾಲನೆ ನೀಡಿ ಮಾತನಾಡಿದರು. ಮುಖ್ಯ ಅತಿಥಿಗಳಾಗಿ ಮಾತನಾಡಿದ ತಹಶೀಲದಾರ ಶೈಲೇಶ ಪರಮಾನಂದ ಅವರು ಸುಚಿತ್ವವನ್ನು ನಿರ್ಲಕ್ಷಿಸಿದರೆ, ನಾವು ಸುಲಭವಾಗಿ  ಅನಾರೋಗ್ಯಕ್ಕೆ ಒಳಗಾಗಬಹುದು ಈ ಹಿನ್ನೆಲೆಯಲ್ಲಿ ಜನರು ಸ್ವಚ್ಚತೆ ಮತ್ತು ಆರೋಗ್ಯದತ್ತ ಹೆಚ್ಚಿನ ಗಮನಹರಿಸಬೇಕು. ನಗರಸಭೆ ಪೌರಾಯುಕ್ತ ವಿವೇಕ ಬನ್ನೆ,  ನ್ಯಾಯವಾದಿಗಳ ಸಂಘದ ಅಧ್ಯಕ್ಷ ಎಸ್‌.ಎಮ್ ದಬಗಾರ, ಹಿರಿಯ ವಕೀಲರಾದ ಎಮ್‌.ಸಿ ಹೆಗಡೆ,  ವಕೀಲ ಆರ್‌.ವಿ ಗಡೆಪ್ಪನವರ  ಉಪಸ್ಥಿತರಿದ್ದು ಸಾಂದರ್ಭಿಕವಾಗಿ ಮಾತನಾಡಿದರು.