ರಾಯಬಾಗ 08 : ಪಟ್ಟಣದಲ್ಲಿ ಭಾನುವಾರ ರಂಗಪಂಚಮಿ ನಿಮಿತ್ತ ಯುವಕರು, ಯುವತಿಯರು, ಮಹಿಳೆಯರು, ಮಕ್ಕಳು ಬಣ್ಣದಲ್ಲಿ ಮುಳಗೆದ್ದರು. ಪರಸ್ಪರ ಬಣ್ಣ ಹಚ್ಚಿ, ಕೆಕೆ ಹಾಕಿ ಕುಣಿದು ಕುಪ್ಪಳಿಸಿ ಸಂಭ್ರಮಿಸಿದರು. ಭಾನುವಾರ ರಜೆ ದಿನ ಇರುವುದರಿಂದ ಪಟ್ಟಣದ ವಿವಿಧ ಗಲ್ಲಿಗಳಲ್ಲಿ ಬಣ್ಣದಾಟ ಜೋರಾಗಿ ನಡೆಯಿತು. ಯುವಕರು ಸಂಗೀತ ನಾದಕ್ಕೆ ಹೆಜ್ಜೆ ಹಾಕಿದರು. ಮಕ್ಕಳು ಪಿಚಕಾರಿಗಳಿಂದ ಬಣ್ಣದ ನೀರು ಸಿಂಪಡಿಸಿ ಸಂಭ್ರಮದಿಂದ ಕುಣಿದಾಡಿದರು. ಮಹಿಳೆಯರು ಕೂಡ ಬಣ್ಣದ ಸಂಭ್ರಮದಲ್ಲಿ ಪಾಲ್ಗೊಂಡಿದ್ದರು. ರಾಯಬಾಗ ತಹಸೀಲ್ದಾರ ಮಹಾದೇವ ಸನಮುರಿ, ಸಮಾಜ ಕಲ್ಯಾಣ ಇಲಾಖೆ ಸಹಾಯಕ ನಿರ್ದೇಶಕ ವಿಠ್ಠಲ ಚಂದರಗಿ ಹಾಗೂ ಸಿಬ್ಬಂದಿ ಕೂಡ ಯುವಕರೊಂದಿಗೆ ಬಣ್ಣದಾಟದಲ್ಲಿ ಪಾಲ್ಗೊಂಡು, ಬಣ್ಣ ಹಚ್ಚಿ ಸಂಭ್ರಮಿಸಿದರು.