ಚಾಮರಾಜನಗರ, ಕರ್ನಾಟಕ, ನ 6:   ಜಿಲ್ಲೆಯ ಸುಪ್ರಸಿದ್ದ ಪ್ರವಾಸಿ  ಸ್ಥಳ   ಭರಚುಕ್ಕಿ ಜಲಪಾತ  ಪ್ರದೇಶದ  ಬಳಿ   ರಾಜ್ಯ ಸರ್ಕಾರ  ಅಂದಾಜು 100 ಕೋಟಿರೂಪಾಯಿ  ವೆಚ್ಚದಲ್ಲಿ  ವಿಶ್ವದರ್ಜೆಯ ಜೈವಿಕ ವೈವಿಧ್ಯ  ಉದ್ಯಾನವನ  ನಿರ್ಮಿಸಲು ನಿರ್ಧರಿಸಿದೆ   ಎಂದು  ಜಿಲ್ಲಾ ಉಸ್ತುವಾರಿಯೂ ಆಗಿರುವ  ಪ್ರಾಥಮಿಕ ಹಾಗೂ ಪ್ರೌಢ ಶಿಕ್ಷಣ ಸಚಿವ  ಎಸ್. ಸುರೇಶ್ ಕುಮಾರ್ ಪ್ರಕಟಿಸಿದ್ದಾರೆ. ಭರಚುಕ್ಕಿ ಜಲಪಾತ ಪ್ರದೇಶಕ್ಕೆ ಭೇಟಿ ನೀಡಿದ ನಂತರ   ಮಂಗಳವಾರ ಸುದ್ದಿಗಾರರೊಂದಿಗೆ ಮಾತನಾಡುತ್ತಿದ್ದ ಸಚಿವರು,   ಜೈವಿಕ ವೈವಿದ್ಯ ಉದ್ಯಾನವನ  ನಿರ್ಮಾಣ ಕಾರ್ಯ ಡಿಸೆಂಬರ್ ಮೊದಲ ವಾರದಲ್ಲಿ ಆರಂಭವಾಗಲಿದೆ.  150 ಎಕರೆ ಪ್ರದೇಶದಲ್ಲಿ   ಮೈದಳೆಯಲಿರುವ ಉದ್ಯಾನವನ ರಾಜ್ಯದ ಪ್ರಮುಖ ಪ್ರವಾಸಿ ಆಕರ್ಷಣೆಯ ಕೇಂದ್ರಗಳಲ್ಲಿ ಒಂದಾಗಲಿದೆ  ಎಂಬ ಆಶಯವನ್ನು ಸಚಿವರು  ವ್ಯಕ್ತಪಡಿಸಿದರು. ಜೈವಿಕ ವೈವಿದ್ಯ ಉದ್ಯಾನವನದಲ್ಲಿ  ತಲೆ ಎತ್ತಲಿರುವ  ಬಿದುರು ವನ ಹಾಗೂ  ಆರ್ಕಿಡ್ ವನ ಗಳಿಗೆ  ಅಗತ್ಯವಾಗಿರುವ  ಇಂಧನ  ಪೂರೈಸಲು  ಸೋಲಾರ್  ಪಾರ್ಕ್   ಸ್ಥಾಪಿಸಲಾಗುವುದು.  ಜೊತೆಗೆ ಸುಮಾರು 2000 ಮಂದಿ ಕುಳಿತು ವೀಕ್ಷಿಸಬಹುದಾದ   ಆಡಿಟೋರಿಯಂ  ಕೂಡ ನಿರ್ಮಿಸಲಾಗುವುದು  ಎಂದು  ಸುರೇಶ್ ಕುಮಾರ್ ವಿವರಿಸಿದರು ಪ್ರವಾಸಿಗಳನ್ನು  ಸ್ವಾಗತಿಸಲು   ದೃಶ್ಯ ಮತ್ತು ಬೆಳಕಿನ ವ್ಯವಸ್ಥೆ  ಅಳವಡಿಸಲಾಗುವುದು.    ಪ್ರವಾಸಿಗರ   ಅನುಕೂಲಕ್ಕಾಗಿ  ಫುಡ್ ಕೋರ್ಟ್ ಮತ್ತಿತರ  ಮೂಲ ಸೌಕರ್ಯಗಳನ್ನು ನಿರ್ಮಿಸಲಾಗುವುದು.  ಯೋಜನೆ 2020ರ ಮಾರ್ಚ್ ವೇಳೆಗೆ ಪೂರ್ಣಗೊಳ್ಳುವ ನಿರೀಕ್ಷೆಯಿದೆ ಎಂದು ಸಚಿವ ಸುರೇಶ್ ಕುಮಾರ್ ಹೇಳಿದರು.