ಮಹಾಲಿಂಗಪುರ 19: ನಗರದಲ್ಲಿ ಸೇರಿದಂತೆ ತಾಲ್ಲೂಕಾದ್ಯಂತ ಕಳೆದ ಎರಡು ದಿನಗಳಿಂದ ನಿರಂತರವಾಗಿ ಸುರಿಯುತ್ತಿರುವ ಜಿಟಿ ಜಿಟಿ ಮಳೆಗೆ ಇಲ್ಲಿನ ಗಾಂಧಿ ವೃತ್ತದ ಬಳಿ ಇರುವ ಗ್ರಾಮ ಲೆಕ್ಕಾಧಿಕಾರಿ, ಕಛೇರಿ ಮತ್ತು ನಾಡಕಛೇರಿ, ಕಟ್ಟಡದಲ್ಲಿ ನೀರು ಸೋರುತ್ತಿದ್ದು,ಇದರಿಂದ ಸಿಬ್ಬಂದಿ ಕಾರ್ಯ ನಿರ್ವಹಿಸಲು ತೊಂದರೆಯಾಗಿದೆ. 

ಸುಮಾರು ವರ್ಷಗಳ ಹಳೆಯದಾದ ಗ್ರಾಮ ಲೆಕ್ಕಾಧಿಕಾರಿ ಕಛೇರಿ, ಮತ್ತು ನಾಡಕಛೇರಿ,ಛಾವಣಿಯ ಬಹುತೇಕ ಭಾಗ ಶಿಥಿಲಗೊಂಡು ನೀರು ಸೋರುತ್ತಿದೆ.ಸಾಧಾರಣ ಮಳೆ ಸುರಿದರೆ ಸೋರುವ ಈ ಕಟ್ಟಡದಲ್ಲಿ ಎರಡು ದಿನಗಳಿಂದ ನಿರಂತರವಾಗಿ ಸುರಿಯುವ ಮಳೆಯಿಂದ ನೀರು ಸೋರಿಕೆಯ ಪ್ರಮಾಣ ಹೆಚ್ಚಾಗಿದೆ. 

ಕೆಲವು ತಿಂಗಳುಗಳ ಹಿಂದೆ ಇದೇ ರೀತಿ ಕಟ್ಟಡದ ಛಾವಣಿ ಸಿಮೆಂಟ್ ಉದುರಿ ಸಿಬ್ಬಂದಿಗೆ ಸಣ್ಣಪುಟ್ಟ ಗಾಯಗಳಾದ ಸಂದರ್ಭದಲ್ಲಿ ಮೇಲಾಧಿಕಾರಿಗಳ ಗಮನಕ್ಕೆ ತಂದರೂ ಕಟ್ಟಡದ ದುರಸ್ತಿ ಆಗಿಲ್ಲ.ಮತ್ತು ಹಲವಾರು ಬೇರೆ ಕಡೆ ರವಾನಿಸಲು ಸಹ ಮನವಿ ಸಲ್ಲಿಸಲಾಗಿದೆ.ಹಳೆಯ ಕಟ್ಟಡದಲ್ಲಿಯೇ ಕಛೇರಿಗಳಲ್ಲಿನ ಸಿಬ್ಬಂದಿ ಆತಂಕದಲ್ಲಿಯೇ ಕೆಲಸ ನಿರ್ವಹಿಸುವ ಸ್ಥಿತಿ ನಿರ್ಮಾಣಗೊಂಡಿದೆ. 

ಮಳೆ ನೀರು ಕಚೇರಿ ಒಳಗೆ ಇಳಿಯುತ್ತಿದ್ದು, ವಿವಿಧ ಕಡತಗಳು, ದಾಖಲೆ ಪತ್ರಗಳು ತೇವಗೊಂಡು ಹಾಳಾಗುತ್ತಿವೆ. ಕಳೆದ ಹಲವು ವರ್ಷಗಳಿಂದ ಈ ರೀತಿ ವ್ಯವಸ್ಥೆಯಿದ್ದರೂ ಸಂಬಂಧಪಟ್ಟವರು ಸೂಕ್ತ ಪರಿಹಾರಕ್ಕೆ ಮುಂದಾಗಿಲ್ಲ.ಅನಿವಾರ್ಯವಾಗಿ ಕೆಲಸ ಮಾಡಬೇಕಾಗಿದೆ ಎಂದು ಹೆಸರು ಹೇಳಲು ಇಚ್ಚಿಸದ ಸಿಬ್ಬಂದಿ ಅಳಲು ತೋಡಿಕೊಂಡರು. 

ಹೊಸ ಕಟ್ಟಡ ನಿರ್ಮಾಣಕ್ಕೆ ಅನೇಕ ಭಾರೀ.ಜನಪ್ರತಿನಿಧಿಗಳಿಗೂ ಮನವಿ ಸಲ್ಲಿಸಲಾಗಿದೆ. ಮೇಲಧಿಕಾರಿಗಳ ಗಮನಕ್ಕೆ ತರಲಾಗಿದೆ ಆದರೂ ಸಹ ಎಚ್ಚೆತ್ತುಕೊಳ್ಳುತ್ತಿಲ್ಲ. ಕಂದಾಯ ಇಲಾಖೆಯ ಮುಖ್ಯಸ್ಥರು ಈ ಕಚೇರಿಯ ಬಗ್ಗೆ ಕಾಳಜಿ ತೋರದಿರುವುದು ವಿಪರ್ಯಾಸದ ಸಂಗತಿಯಾಗಿದೆ ಎಂದು ವಕೀಲರಾದ ಶಿವಾನಂದ ಹುಣಸ್ಯಾಳ ಬೇಸರ ವ್ಯಕ್ತಪಡಿಸಿದರು..