ಕೃಷಿಮೇಳದ ನಾಲ್ಕನೇ ದಿನ ಏರಿ​‍್ಡಸಿದ ವಿಶೇಷ ಕಾರ್ಯಕ್ರಮಗಳು 

ಧಾರವಾಡ 16: ಕೃಷಿ ಮೇಳದ ನಾಲ್ಕನೇ ದಿನ, ವಿಶೇಷ ತರಬೇತಿಗಳ ಸರಣಿಯಡಿ ಬೆಳಿಗ್ಗೆ ರೈತರ ಜ್ಞಾನಾಭಿವೃದ್ಧಿ ಕೇಂದ್ರದಲ್ಲಿ ಜಾನುವಾರು ನಿರ್ವಹಣೆಯಲ್ಲಿ ನವೀನ ತಂತ್ರಜ್ಞಾನಗಳು ಎಂಬ ತರಬೇತಿಯನ್ನು ಆಯೋಜಿಸಲಾಗಿತ್ತು. ಅನೀಲಕುಮಾರ ಜಿ.ಕೆ., ರಸಮೇವು ಮತ್ತು ಒಣ ಹಸಿರು ಮೇವಿನ ಉತ್ಪಾದನೆಯ ನಾವಿನ್ಯತೆಗಳು, ಡಾ. ಜಯಶ್ರೀ ಪತ್ತಾರ, ಎತ್ತರಿಸಿದ ಅಟ್ಟಣಿಗೆಯ ಕೊಟ್ಟಿಗೆ ಪದ್ಧತಿಯಲ್ಲಿ ಸಮಗ್ರ ಕುರಿ / ಮೇಕೆ ಮತ್ತು ಕೋಳಿ ಸಾಕಾಣಿಕೆ, ಡಾ. ವೆಂಕಣ್ಣ ಬಳಗಾನೂರರವರು ಪಶು ಸಂಗೋಪನೆಯಲ್ಲಿ ಸರ್ಕಾರದ ಸವಲತ್ತುಗಳು ಮತ್ತು ಡಾ. ಮಹೇಶ ಕಡಗಿ ಮೇವಿನ ಬೆಳೆಗಳು ಮತ್ತು ಜಾನುವಾರುಗಳಿಗೆ ಪೂರಕ ಆಹಾರವಾಗಿ ಅಝೇಲ್ಲಾ ಎಂಬ ವಿಷಯದ ಕುರಿತು ಮಾತನಾಡಿದರು.  ಮಧ್ಯಾಹ್ನ ನಡೆದ ಇನ್ನೊಂದು ವಿಶೇಷ ತರಬೇತಿ ಕಾರ್ಯಕ್ರಮದಲ್ಲಿ ಹೈ-ಟೆಕ್ ತೋಟಗಾರಿಕಾ ತಂತ್ರಜ್ಞಾನಗಳು ಎಂಬ ವಿಷಯದ ಮೇಲೆ ಡಾ. ಎಮ್‌. ಎಸ್‌. ಬಿರಾದಾರ, ಪ್ರಾಧ್ಯಾಪಕರು(ತೋ.) ರೈತರಿಗೆ ಮಾಹಿತಿ ನೀಡಿದರು. ಜಾಗತೀಕರಣ, ಆರ್ಥಿಕ ಉದಾರೀಕರಣ ಮತ್ತು ಖಾಸಗೀಕರಣದ ಪ್ರಭಾವದಿಂದ ತೋಟಗಾರಿಕೆಗೆ ವಿಫುಲ ಅವಕಾಶಗಳಿದ್ದು, ಆಧುನಿಕ ತೋಟಗಾರಿಕೆಗೆ ಹೆಚ್ಚಿನ ಬೇಡಿಕೆಯಿದೆ. ತೋಟಗಾರಿಕೆಯಲ್ಲಿ ಮಣ್ಣು ಮತ್ತು ನೀರಿನ ಸಂರಕ್ಷಣೆಯ ವಿಧಾನಗಳಾದ ಹನಿ ನೀರಾವರಿ, ಮಲ್ಚಿಂಗ್, ಏರುಮಡಿ, ಹಂದರ (ಪೆಂಡಾಲ್) ಬೇಸಾಯ, ಸಸಿ ಕಟ್ಟುವಿಕೆ, ಅಧಿಕ ಸಾಂದ್ರತೆ, ಸಮಗ್ರ ಬೆಳೆ ನಿರ್ವಹಣೆ, ಕೊಯ್ಲೋತ್ತರ ತಂತ್ರಜ್ಞಾನ, ಯಾಂತ್ರೀಕರಣ, ಹೈಡ್ರೋಫೋನಿಕ್ಸ್‌ ಮತ್ತು ಏರೋಫೋನಿಕ್ಸ್‌ ತಂತ್ರಜ್ಞಾನಗಳ ಬಗ್ಗೆ ವಿಶೇಷ ಮಾಹಿತಿ ನೀಡಿದರು.