ಬೆಳಗಾವಿ 24: ಮಾಯ್ ಚಾಯ್ಸ್‌ ಫೌಂಡೇಶನ್, ಹೈದ್ರಾಬಾದ ಆಪರೇಷನ್ ರೆಡ್ ಅಲರ್ಟ, ಕ್ವಾಲಿಟಿ ಎನಿಮಲ್ ಫೀಡ್ಸ ಪ್ರೈವೇಟ್ ಲಿಮಿಟೆಡ್, ಎ.ಪಿ.ಡಿ. ಸಂಸ್ಥೆ,  ಮಹಿಳಾ ಕಲ್ಯಾಣ ಸಂಸ್ಥೆ ಬೆಳಗಾವಿ ಹಾಗೂ ಮಹಿಳೆಯರ  ಮತ್ತು ಮಕ್ಕಳ ಅಭಿವೃದ್ಧಿ ಇಲಾಖೆ, ಬೆಳಗಾವಿ, ಶಿಕ್ಷಣ ಇಲಾಖೆ ಬೆಳಗಾವಿ, ಚಿಕ್ಕೋಡಿ ಗ್ರಾಮ ಪಂಚಾಯತ ಸುಳಗೆ (ಉಚಗಾಂವ) ಇವರುಗಳ ಸಂಯುಕ್ತಾಶ್ರಯದಲ್ಲಿ ಸುರಕ್ಷಿತ ಗ್ರಾಮ  ಕಾರ್ಯಕ್ರಮದಡಿಯಲ್ಲಿ, ಮಹಿಳೆಯರ ಮತ್ತು ಮಕ್ಕಳ ಕಳ್ಳ ಸಾಗಾಣಿಕೆ ಕುರಿತು ಜಾಗೃತಿ ಕಾರ್ಯಕ್ರಮವು ಇತ್ತೀಚೆಗೆ ಸುಳಗೆ ಗ್ರಾಮ ಪಂಚಾಯಿತಿಯಲ್ಲಿ ಜರುಗಿತು.  

ಮಾಯ್ ಚಾಯ್ಸ ಫೌಂಡೇಶನ್ ಹೈದರಾಬಾದ ಕರ್ನಾಟಕ ರಾಜ್ಯದ ಸಂಯೋಜಕ ವಿನಯ ಶಿರೋಳ ಇವರು ಮಾತನಾಡಿ ಮಾಯ್ ಚಾಯ್ಸ ಫೌಂಡೇಶನ್‌ದ ಕಾರ್ಯ ಚಟುವಟಿಕೆಗಳ ಮಾಹಿತಿ ನೀಡಿದರು. ಅದರೊಂದಿಗೆ ಮಹಿಳೆಯರ ಹಾಗೂ ಮಕ್ಕಳ  ಕಳ್ಳ ಸಾಗಾಣಿಕೆೆಯನ್ನು ತಡೆಗಟ್ಟುವ  ಕುರಿತು  ತಮ್ಮನ್ನು ತಾವು ಹೇಗೆ ರಕ್ಷಿಸಿಕೊಳ್ಳುವುದು ಎಂದು ವಿವರಿಸಿದರು. ಬ್ರಹ್ಮಲಿಂಗ ಫ್ರೌಢಶಾಲೆಯ  ವಿದ್ಯಾರ್ಥಿಗಳಿಂದ ಮಹಿಳೆಯರ ಮತ್ತು ಮಕ್ಕಳ ಕಳ್ಳ ಸಾಗಾಣಿಕೆಯಿಂದ  ನಮ್ಮನ್ನು ನಾವು ರಕ್ಷಿಸಿಕೊಳ್ಳುವುದರೊಂದಿಗೆ ನಮ್ಮ  ಸ್ನೇಹಿತರನ್ನು ರಕ್ಷಿಸುತ್ತೇವೆಂದು ಪ್ರತಿಜ್ಞೆ ಮಾಡಿಸಲಾಯಿತು. 

ಸುರೇಖಾ .ಡಿ.ಪಾಟೀಲ ಯೋಜನಾ ನಿರ್ದೆಶಕರು ಮಹಿಳಾ ಕಲ್ಯಾಣ ಸಂಸ್ಥೆ ಬೆಳಗಾವಿ ಇವರು ಕಳ್ಳ ಸಾಗಾಣಿಕೆ ಎಂದರೇನು, ಕಳ್ಳ ಸಾಗಾಣಿಕೆಗೆ ಕಾರಣಗಳು ಮತ್ತು ಪರಿಹಾರಗಳ ಕುರಿತು ಮಾತನಾಡುತ್ತ ಇಂದಿನ ದಿನಗಳಲ್ಲಿ, ಮಹಿಳೆಯರ ಮತ್ತು ಮಕ್ಕಳ ಕಳ್ಳ ಸಾಗಾಣಿಕೆ ಸಮಸ್ಯೆ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದೆ ಇದರಿಂದ ಸಮಾಜದ ಮೇಲೆ  ವ್ಯತಿರಿಕ್ತ ಪರಿಣಾಮ ಬೀರುತ್ತವೆ ಎಂದು ಹೇಳಿದರು.  

ಮಹಿಳಾ ಕಲ್ಯಾಣ ಸಂಸ್ಥೆಯ ಸಾಂತ್ವನ ಮಹಿಳಾ ಸಹಾಯವಾಣಿ ಕೇಂದ್ರದ ಸಲಹಾಗಾರ ಚಂದ್ರಕಲಾ ಕಾಂಬಳೆ ಇವರು ಬಾಲ್ಯ ವಿವಾಹ ಮತ್ತು ಪೋಕ್ಸೋ ಕಾಯ್ಡೆ ಕುರಿತು ಅರಿವು ಮೂಡಿಸಿದರು.  ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಇಲಾಖೆಯ ಸಖಿ ಒನ್ ಸ್ಟಾಪ್ ಸೆಂಟರಿನ ಉದ್ದೇಶ ಮತ್ತು ಅದರ ಅನುಕೂಲತೆಗಳ ಬಗ್ಗೆ ತಿಳಿಸಿದರು.   

ಎ.ಪಿ.ಡಿ. ಸಂಸ್ಥೆಯ ಸಂಯೋಜಕ ಅರ್ಚನಾ ದೇವಟಿ ಸಂಸ್ಥೆಯ ಕಾರ್ಯಚಟುವಟಿಕೆಗಳನ್ನು ವಿವರಿಸುತ್ತ ಮಕ್ಕಳಿಗೆ ದೊರಕುವ ಸರಕಾರದ ಸೌಲಭ್ಯಗಳ ಕುರಿತು ಮಾಹಿತಿ ನೀಡಿದರು. 

ಸಂಗಾತಿ ಕೌಟುಂಬಿಕ ಸಲಹಾ ಕೇಂದ್ರದ ಸಲಹಾಗಾರ ಸಿದ್ದಪ್ಪ ಹಿತ್ತಲಮನಿಯವರು ನಿರೂಪಣೆಯನ್ನು ಮಾಡಿದರು. ಗ್ರಾಮ ಪಂಚಾಯಿತಿಯ ಪಿ.ಡಿ.ಒ ವೀಣಾ ಹಲವಾಯಿ ಮತ್ತು ಫ್ರೌಢಶಾಲೆಯ  ಮುಖ್ಯೋಪಾಧ್ಯಾಯಎನ್‌.ಕೆ.ಚೌಗಲ ಇವರು ಮಾತನಾಡುತ್ತ ಸಮಾಜದಲ್ಲಿರುವ ಮಹಿಳೆಯರಿಗೆ ಮತ್ತು ಮಕ್ಕಳಿಗೆ ಈ ಕಾರ್ಯಕ್ರಮ ಉತ್ತಮ ಹಾಗೂ ಅವಶ್ಯಕವಾಗಿರುತ್ತದೆ ಎಂದು  ಮೆಚ್ಚುಗೆಯನ್ನು ವ್ಯಕ್ತಪಡಿಸಿದರು.