ಮುಂಬೈ,  ಅ. 26:   ಮಹಾರಾಷ್ಟ್ರದಲ್ಲಿ 50:50ರ ಸೂತ್ರಕ್ಕೆ ಒಪ್ಪಿದರೆ ಮಾತ್ರ ಸರ್ಕಾರ  ರಚನೆಗೆ ಬೆಂಬಲ ನೀಡುವುದಾಗಿ  ಶಿವಸೇನೆ ಹೇಳುತ್ತಿರುವುದರಲ್ಲಿ  ಯಾವ ತಪ್ಪು  ಕಾಣುತ್ತಿಲ್ಲ ಎಂದು  ಎನ್ಸಿಪಿ ಅಧ್ಯಕ್ಷ ಶರದ್ ಪವಾರ್ ಹೇಳಿ ಸೇನಾ ಪರವಾಗಿ ಬ್ಯಾಟಿಂಗ್  ಮಾಡಿದ್ದಾರೆ.    ಈ  ಹಿಂದೆಯೂ ಶಿವಸೇನೆ-ಬಿಜೆಪಿ ಮೈತ್ರಿ 50:50ರ ಸೂತ್ರದ ಒಪ್ಪಂದದ ಮೇರೆಗೆ ಸರ್ಕಾರ  ರಚಿಸಿದೆ. ಹಾಗೆಯೇ ಇದೀಗ ಮತ್ತೆ ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ಅಮಿತ್ ಶಾ ಬಳಿ ಉದ್ದವ್  ಠಾಕ್ರೆ 50:50 ಸೂತ್ರದ ಬೇಡಿಕೆಯ ಆಧಾರದಲ್ಲಿ ಒತ್ತಡ ಹಾಕಿರುವುದರಲ್ಲಿ ಯಾವುದೇ  ತಪ್ಪಿಲ್ಲ ಎಂದು ಶಿವಸೇನೆ ಪರ ಶರದ್ ಪವಾರ್ ಗಟ್ಟಿಯಾಗಿ ನಿಂತಿದ್ದಾರೆ. ಇನ್ನು  ಕಾಂಗ್ರೆಸ್-ಎನ್ಸಿಪಿ ಮೈತ್ರಿಯೂ 102 ಸೀಟು ಪಡೆದುಕೊಂಡಿದೆ. ಬಿಜೆಪಿ-ಶಿವಸೇನೆ  ಮೈತ್ರಿಕೂಟ 220 ಸೀಟು ಗೆಲ್ಲುವ ಗುರಿ ಹೊಂದಿತ್ತು. ಆದರೆ, ಕಾಂಗ್ರೆಸ್ನೊಂದಿಗೆ  ಎನ್ಸಿಪಿ ಚುನಾವಣೆ ಗೆಲ್ಲಲು ಭಾರೀ ಶ್ರಮಿಸಿದ್ದೇವೆ. ಇದರಿಂದಲೇ ಬಿಜೆಪಿ-ಶಿವಸೇನೆ  ಮೈತ್ರಿಗೆ 220 ಸೀಟು ಗೆಲ್ಲಲು ಸಾಧ್ಯವಾಗಲಿಲ್ಲ ಎಂದು ಅವರು ಹೇಳಿದರು. ಸದ್ಯ  ಮಹಾರಾಷ್ಟ್ರದಲ್ಲಿ ಸುಲಭವಾಗಿ ಸರ್ಕಾರ ರಚಿಸಬಹುದು ಎಂಬ ಬಿಜೆಪಿ ನಿರೀಕ್ಷೆ  ಸುಳ್ಳಾಗಿದೆ. ಇತ್ತ 50:50 ಸೂತ್ರಕ್ಕೆ ಒಪ್ಪಿಗೆ ಸೂಚಿಸಿದರೆ ಮಾತ್ರ ಸರ್ಕಾರ ರಚನೆ  ಮಾಡಲು ಬೆಂಬಲ ನೀಡುವುದಾಗಿ ಶಿವಸೇನೆ ಹೊಸ ದಾಳ ಉರುಳಿಸಿದೆ. ಈ ಸೂತ್ರದ ಪ್ರಕಾರ 5  ವರ್ಷಗಳ ಆಡಳಿತಾವಧಿಯಲ್ಲಿ ಬಿಜೆಪಿ-ಶಿವಸೇನೆ ಸಮ್ಮಿಶ್ರ ಸರ್ಕಾರ ಇಬ್ಬರು  ಮುಖ್ಯಮಂತ್ರಿಗಳನ್ನು ಮಾಡಬೇಕಾಗುತ್ತದೆ. ಅಂತೆಯೇ ಎರಡೂವರೆ ವರ್ಷ ಶಿವಸೇನೆ ಅಭ್ಯರ್ಥಿ  ಸಿಎಂ ಆದರೆ, ಇನ್ನುಳಿದ ಅವಧಿಗೆ ಬಿಜೆಪಿ ಅಭ್ಯರ್ಥಿ ಮುಖ್ಯಮಂತ್ರಿ ಆಗಬಹುದಾಗಿದೆ ಎಂದು  ಪವಾರ್ ಹೇಳಿದ್ದಾರೆ.