ಸವದತ್ತಿ 28 : ತಾಲೂಕಿನ ಹಂಚಿನಾಳ ಗ್ರಾಮದಲ್ಲಿ ಮಾದಿಗ, ಬಂಜಾರ ಹಾಗೂ ಚಲವಾದಿ ಸಮುದಾಯದವರ ಕಲ್ಯಾಣಕ್ಕಾಗಿ ಉದಾರ ಮನಸ್ಸಿನಿಂದ 20 ಗುಂಟೆ ಭೂಮಿಯನ್ನು ದಾನ ಮಾಡುವ ಮೂಲಕ ಮಾದರಿಯಾಗಿರುವ ವಿರೂಪಾಕ್ಷಗೌಡ ಪಾಟೀಲ್ ಅವರನ್ನು ಸೋಮವಾರ ತಹಶೀಲ್ದಾರ್ ಕಚೇರಿಯಲ್ಲಿ ತಹಶೀಲ್ದಾರ್ ಮಲ್ಲಿಕಾರ್ಜುನ ಹೆಗ್ಗನ್ನವರ ಅವರು ಸನ್ಮಾನಿಸಿ ಗೌರವಿಸಿದರು.  ಬಳಿಕ ತಹಶೀಲ್ದಾರ್ ಮಲ್ಲಿಕಾರ್ಜುನ ಹೆಗ್ಗನ್ನವರ ಮಾತನಾಡಿದ ಅವರು, ಸಮಾಜದಲ್ಲಿ ಬಡವರು ಹಾಗೂ ಹಿಂದುಳಿದ ವರ್ಗಗಳ ಅಭಿವೃದ್ಧಿಗೆ ಕೈಜೋಡಿಸುವುದು ಪ್ರತಿಯೊಬ್ಬರ ಕರ್ತವ್ಯ. 

ಹಂಚಿನಾಳ ಗ್ರಾಮದ ವಿರೂಪಾಕ್ಷಗೌಡ ಪಾಟೀಲ್ ಅವರು ತಮ್ಮ ಜಮೀನನ್ನು ವಿವಿಧ ಸಮುದಾಯಗಳ ಹಿತಾಸಕ್ತಿಗಾಗಿ ದಾನ ಮಾಡಿರುವುದು ನಿಜಕ್ಕೂ ಶ್ಲಾಘನೀಯ ಹಾಗೂ ಇಡೀ ಸಮಾಜಕ್ಕೆ ಮಾದರಿಯಾದ ಕಾರ್ಯವಾಗಿದೆ. ಇಂತಹ ಉದಾತ್ತ ಚಿಂತನೆಯ ದಾನಿಗಳಿಂದ ಸಮಾಜದಲ್ಲಿ ಸಾಮರಸ್ಯ ಹಾಗೂ ಸಮಾನತೆ ಮೂಡಲು ಸಾಧ್ಯ, ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು.  ಈ ವೇಳೆ ಬಸವರಾಜ ತಳವಾರ,  ಶಿವಾಜಿ ಬೇವಿನಗಿಡ ದೇವಪ್ಪ ಮಾದರ,  ಷಣ್ಮುಖ ದೊಡಮನಿ,  ನೀಲಪ್ಪ ದೊಡಮನಿ,  ಸಿದ್ದಪ್ಪ ಲಮ್ಮಾಣಿ, ದುರ್ಗಪ್ಪ ಮಾದರ,  ಸುನೀಲ್ ಚಲವಾದಿ, ಸಮುದಾಯಗಳ ಮುಖಂಡರು, ಹಾಗೂ ಕಚೇರಿಯ ಸಿಬ್ಬಂದಿ ಉಪಸ್ಥಿತರಿದ್ದರು.