ಜಿಂದ್ (ಹರಿಯಾಣ), ಜುಲೈ 17 : ಹಸಿರು ರೈಲು ಸಾರಿಗೆ ಕ್ಷೇತ್ರದಲ್ಲಿ ಭಾರತ ಮಹತ್ವದ ಹೆಜ್ಜೆ ಇಡುತ್ತಿದ್ದು, ದೇಶದ ಮೊದಲ ಹೈಡ್ರೋಜನ್ ಚಾಲಿತ ಪ್ರಯಾಣಿಕ ರೈಲಿಗೆ ಪ್ರಧಾನಿ ನರೇಂದ್ರ ಮೋದಿ ಅವರು ಶುಕ್ರವಾರ ಜಿಂದ್-ಸೋನಿಪತ್ ಮಾರ್ಗದಲ್ಲಿ ಚಾಲನೆ ನೀಡಲಿದ್ದಾರೆ.

ಈ ರೈಲು ಸೇವೆಯ ಆರಂಭದೊಂದಿಗೆ, ಹೈಡ್ರೋಜನ್ ಆಧಾರಿತ ರೈಲು ತಂತ್ರಜ್ಞಾನವನ್ನು ಅಳವಡಿಸಿಕೊಂಡಿರುವ ಜರ್ಮನಿ, ಫ್ರಾನ್ಸ್, ಸ್ವೀಡನ್ ಮತ್ತು ಚೀನಾ ಸೇರಿದಂತೆ ಕೆಲವೇ ರಾಷ್ಟ್ರಗಳ ಸಾಲಿಗೆ ಭಾರತವೂ ಸೇರ್ಪಡೆಯಾಗಲಿದೆ. ಕಡಿಮೆ ಇಂಗಾಲ ಉತ್ಸರ್ಜನೆ ಮತ್ತು ಪರಿಸರ ಸ್ನೇಹಿ ಸಾರಿಗೆ ವ್ಯವಸ್ಥೆಯನ್ನು ಉತ್ತೇಜಿಸುವ ಕೇಂದ್ರ ಸರ್ಕಾರದ ಹಸಿರು ಚಲನೆ ಅಭಿಯಾನದ ಭಾಗವಾಗಿ ಈ ಯೋಜನೆಯನ್ನು ಪರಿಗಣಿಸಲಾಗಿದೆ.

10 ಬೋಗಿಗಳನ್ನು ಹೊಂದಿರುವ ಈ ಹೈಡ್ರೋಜನ್ ರೈಲು ಜಿಂದ್‌ನಿಂದ ಸೋನಿಪತ್‌ವರೆಗೆ ಸುಮಾರು 89 ಕಿ.ಮೀ. ದೂರವನ್ನು ಎರಡು ಗಂಟೆಗಳಲ್ಲಿ ಕ್ರಮಿಸಲಿದೆ. ಮಾರ್ಗಮಧ್ಯೆ 14 ನಿಲ್ದಾಣಗಳಲ್ಲಿ ನಿಲುಗಡೆ ನೀಡಲಿದ್ದು, ಗರಿಷ್ಠ ಗಂಟೆಗೆ ಸುಮಾರು 75 ಕಿ.ಮೀ. ವೇಗದಲ್ಲಿ ಸಂಚರಿಸಲಿದೆ. ಪ್ರಯಾಣ ದರವು 5 ರೂ.ಗಳಿಂದ 25 ರೂ.ವರೆಗೆ ಇರಲಿದೆ ಎಂದು ರೈಲ್ವೆ ಅಧಿಕಾರಿಗಳು ತಿಳಿಸಿದ್ದಾರೆ.

ಸುಮಾರು 112 ಕೋಟಿ ರೂ. ವೆಚ್ಚದಲ್ಲಿ ಅಭಿವೃದ್ಧಿಪಡಿಸಲಾಗಿರುವ ಈ ಯೋಜನೆಯಲ್ಲಿ ರೈಲನ್ನು ಹೈಡ್ರೋಜನ್ ಚಾಲಿತ ವ್ಯವಸ್ಥೆಗೆ ಪರಿವರ್ತಿಸುವುದರ ಜೊತೆಗೆ, ಜಿಂದ್‌ನಲ್ಲಿ ಹೈಡ್ರೋಜನ್ ಉತ್ಪಾದನೆ, ಸಂಗ್ರಹಣೆ ಮತ್ತು ಇಂಧನ ತುಂಬುವ ಸೌಲಭ್ಯಗಳನ್ನು ಸ್ಥಾಪಿಸಲಾಗಿದೆ.

ಚೆನ್ನೈನ ಇಂಟಿಗ್ರಲ್ ಕೋಚ್ ಫ್ಯಾಕ್ಟರಿ (ಐಸಿಎಫ್) ರೈಲಿನ ವಿನ್ಯಾಸ ಮತ್ತು ಸಂಯೋಜನೆ ಕಾರ್ಯವನ್ನು ನಿರ್ವಹಿಸಿದ್ದು, ಮೆಧಾ ಸರ್ವೋ ಡ್ರೈವ್ಸ್ ಸಂಸ್ಥೆ ಹೈಡ್ರೋಜನ್ ಚಾಲನಾ ವ್ಯವಸ್ಥೆಯನ್ನು ಅಭಿವೃದ್ಧಿಪಡಿಸಿದೆ. ಜಿಂದ್‌ನಲ್ಲಿ ಹೈಡ್ರೋಜನ್ ಉತ್ಪಾದನೆ ಮತ್ತು ಮರುಪೂರಣ ಘಟಕ ಸ್ಥಾಪನೆಗೆ ಗ್ರೀನ್‌ಎಚ್ ಎಲೆಕ್ಟ್ರೋಲಿಸಿಸ್ ಸಂಸ್ಥೆ ಸಹಭಾಗಿತ್ವ ನೀಡಿದೆ.

ಜಿಂದ್ ರೈಲು ನಿಲ್ದಾಣದ ಸಮೀಪ ವಿಶೇಷ ಹೈಡ್ರೋಜನ್ ಉತ್ಪಾದನೆ ಮತ್ತು ಮರುಪೂರಣ ಘಟಕವನ್ನು ನಿರ್ಮಿಸಲಾಗಿದೆ. ಈ ಘಟಕವು ವಿದ್ಯುದ್ವಿಚ್ಛೇದನ (Electrolysis) ಪ್ರಕ್ರಿಯೆಯ ಮೂಲಕ ಪ್ರತಿದಿನ ಸುಮಾರು 430 ಕೆ.ಜಿ. ಹೈಡ್ರೋಜನ್ ಉತ್ಪಾದಿಸುವ ಸಾಮರ್ಥ್ಯ ಹೊಂದಿದ್ದು, ಸುಮಾರು 3,000 ಕೆ.ಜಿ. ಹೈಡ್ರೋಜನ್ ಸಂಗ್ರಹಿಸಬಹುದು. ಒಂದು ರೈಲಿಗೆ ಒಮ್ಮೆ ಇಂಧನ ತುಂಬಿಸಲು ಸುಮಾರು 440 ಕೆ.ಜಿ. ಹೈಡ್ರೋಜನ್ ಅಗತ್ಯವಿದೆ.

ಜಿಂದ್-ಸೋನಿಪತ್ ಮಾರ್ಗವನ್ನು ಪ್ರಾಯೋಗಿಕ ಯೋಜನೆಗಾಗಿ ಆಯ್ಕೆ ಮಾಡಲಾಗಿದ್ದು, ಈ ಮಾರ್ಗದಲ್ಲಿ ಸಂಚಾರ ದಟ್ಟಣೆ ಕಡಿಮೆ ಇದೆ, ದೆಹಲಿಗೆ ಸಮೀಪವಿರುವುದರಿಂದ ತಾಂತ್ರಿಕ ಮೇಲ್ವಿಚಾರಣೆಗೆ ಅನುಕೂಲವಾಗಿದೆ ಹಾಗೂ ಇದು ವಿದ್ಯುದೀಕರಣಗೊಳ್ಳದ ಬ್ರಾಡ್‌ಗೇಜ್ ಮಾರ್ಗವಾಗಿರುವುದರಿಂದ ಹೈಡ್ರೋಜನ್ ರೈಲು ಕಾರ್ಯಾಚರಣೆಯ ಪರೀಕ್ಷೆಗೆ ಸೂಕ್ತವಾಗಿದೆ ಎಂದು ರೈಲ್ವೆ ಅಧಿಕಾರಿಗಳು ತಿಳಿಸಿದ್ದಾರೆ.

ಈ ಹೈಡ್ರೋಜನ್ ರೈಲು ಕೇಂದ್ರ ಸರ್ಕಾರದ “ಹೈಡ್ರೋಜನ್ ಫಾರ್ ಹೆರಿಟೇಜ್” ಯೋಜನೆಯ ಪ್ರಾಯೋಗಿಕ ಮಾದರಿಯಾಗಿದ್ದು, ವಿದ್ಯುದೀಕರಣ ಕಷ್ಟಕರವಾಗಿರುವ ಪಾರಂಪರಿಕ ಮತ್ತು ಗುಡ್ಡಗಾಡು ಪ್ರದೇಶಗಳ ಮಾರ್ಗಗಳಲ್ಲಿ ಇಂತಹ ರೈಲುಗಳನ್ನು ಪರಿಚಯಿಸುವ ಉದ್ದೇಶ ಹೊಂದಿದೆ.

ಚಾಲನಾ ಕಾರ್ಯಕ್ರಮದ ಬಳಿಕ ಪ್ರಧಾನಿ ನರೇಂದ್ರ ಮೋದಿ ಅವರು ಜಿಂದ್‌ನಲ್ಲಿ ಸಾರ್ವಜನಿಕ ಸಭೆಯನ್ನು ಉದ್ದೇಶಿಸಿ ಮಾತನಾಡಲಿದ್ದು, ಎತ್ತರದ ರೈಲು ಹಳಿ (Elevated Railway Track) ಮತ್ತು ಎರಡು ವೈದ್ಯಕೀಯ ಕಾಲೇಜುಗಳು ಸೇರಿದಂತೆ ಹಲವು ಅಭಿವೃದ್ಧಿ ಯೋಜನೆಗಳಿಗೆ ಚಾಲನೆ ನೀಡಲಿದ್ದಾರೆ.