ಚೆನ್ನೈ, ಜುಲೈ 16: ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರು ಅಮೃತ್ ಭಾರತ್ ಸ್ಟೇಷನ್ ಯೋಜನೆಯಡಿ ಸಮಗ್ರವಾಗಿ ಪುನರ್ ಅಭಿವೃದ್ಧಿಗೊಂಡಿರುವ ಚೆನ್ನೈ ಪಾರ್ಕ್ ರೈಲು ನಿಲ್ದಾಣವನ್ನು ಶುಕ್ರವಾರ ವಿಡಿಯೊ ಕಾನ್ಫರೆನ್ಸ್ ಮೂಲಕ ಉದ್ಘಾಟಿಸಲಿದ್ದಾರೆ. ಈ ಮೂಲಕ ದೇಶದ ರೈಲ್ವೆ ಆಧುನೀಕರಣಕ್ಕೆ ಮತ್ತೊಂದು ಮಹತ್ವದ ಮೈಲಿಗಲ್ಲು ಸೇರ್ಪಡೆಯಾಗಲಿದೆ.

14.79 ಕೋಟಿ ರೂ. ವೆಚ್ಚದಲ್ಲಿ ಪುನರ್ ಅಭಿವೃದ್ಧಿಗೊಂಡಿರುವ ಈ ರೈಲು ನಿಲ್ದಾಣದಲ್ಲಿ ಪ್ರಯಾಣಿಕರ ಅನುಕೂಲತೆ, ನಗರ ಸಂಚಾರ ವ್ಯವಸ್ಥೆ ಮತ್ತು ಪ್ರವೇಶಸೌಲಭ್ಯವನ್ನು ಹೆಚ್ಚಿಸುವ ಉದ್ದೇಶದಿಂದ ಹಲವು ಆಧುನಿಕ ಸೌಲಭ್ಯಗಳನ್ನು ಕಲ್ಪಿಸಲಾಗಿದೆ.

ದಕ್ಷಿಣ ರೈಲ್ವೆ ಅಧಿಕಾರಿಗಳ ಪ್ರಕಾರ, ದೇಶದಾದ್ಯಂತ 75 ಪುನರ್ ಅಭಿವೃದ್ಧಿಗೊಂಡ ಅಮೃತ್ ಭಾರತ್ ರೈಲು ನಿಲ್ದಾಣಗಳನ್ನು ರಾಷ್ಟ್ರಕ್ಕೆ ಸಮರ್ಪಿಸುವ ಕಾರ್ಯಕ್ರಮದ ಭಾಗವಾಗಿ ಚೆನ್ನೈ ಪಾರ್ಕ್ ರೈಲು ನಿಲ್ದಾಣವನ್ನು ಉದ್ಘಾಟಿಸಲಾಗುತ್ತಿದೆ. ಇದುವರೆಗೆ ಅಮೃತ್ ಭಾರತ್ ಸ್ಟೇಷನ್ ಯೋಜನೆಯಡಿ 261 ರೈಲು ನಿಲ್ದಾಣಗಳನ್ನು ಅಭಿವೃದ್ಧಿಪಡಿಸಲಾಗಿದೆ.

ಚೆನ್ನೈ ಬೀಚ್–ಚೆಂಗಲ್ಪಟ್ಟು ಉಪನಗರ ರೈಲು ಮಾರ್ಗದಲ್ಲಿರುವ ಚೆನ್ನೈ ಪಾರ್ಕ್ ರೈಲು ನಿಲ್ದಾಣವು ಭಾರತೀಯ ರೈಲ್ವೆ ಇತಿಹಾಸದಲ್ಲಿ ವಿಶೇಷ ಸ್ಥಾನವನ್ನು ಹೊಂದಿದೆ. ದಕ್ಷಿಣ ಭಾರತೀಯ ರೈಲ್ವೆ ಕಂಪನಿಯು ನಿರ್ಮಿಸಿದ್ದ ಈ ನಿಲ್ದಾಣವು ದೇಶದ ಮೊದಲ ವಿದ್ಯುದೀಕೃತ ಉಪನಗರ ರೈಲು ಮಾರ್ಗವಾದ ಚೆನ್ನೈ ಬೀಚ್–ತಾಂಬರಂ ಮಾರ್ಗದ ಭಾಗವಾಗಿದೆ. ಈ ಮಾರ್ಗದ ಹಳಿ ನಿರ್ಮಾಣ ಕಾರ್ಯವು 1928ರಲ್ಲಿ ಆರಂಭಗೊಂಡಿದ್ದು, ರೈಲು ನಿಲ್ದಾಣವು 1931ರ ಮೇ 11ರಂದು ಸಾರ್ವಜನಿಕ ಸೇವೆಗೆ ತೆರೆದಿಡಲಾಯಿತು.

ಕಾಲಕ್ರಮೇಣ ಈ ನಿಲ್ದಾಣವು ದಕ್ಷಿಣ ಭಾರತದ ಪ್ರಮುಖ ಬಹು-ಮಾದರಿ ಸಾರಿಗೆ ಕೇಂದ್ರವಾಗಿ ಬೆಳೆಯಿದ್ದು, ಪ್ರಸ್ತುತ 198 ಉಪನಗರ ರೈಲುಗಳ ಸಂಚಾರ ಹಾಗೂ ಪ್ರತಿದಿನ ಸುಮಾರು 29 ಸಾವಿರ ಪ್ರಯಾಣಿಕರ ಓಡಾಟವನ್ನು ನಿರ್ವಹಿಸುತ್ತಿದೆ.

ಪಾರ್ಕ್ ಟೌನ್‌ನ ಪೂನಮಲ್ಲೆ ಹೈರೋಡ್‌ನಲ್ಲಿ ನೆಲೆಗೊಂಡಿರುವ ಈ ನಿಲ್ದಾಣವು ಪುರಚ್ಚಿ ತಲೈವರ ಡಾ. ಎಂ.ಜಿ. ರಾಮಚಂದ್ರನ್ ಸೆಂಟ್ರಲ್ ರೈಲು ನಿಲ್ದಾಣ, ಚೆನ್ನೈ ಸೆಂಟ್ರಲ್ ಉಪನಗರ (ಎಂಎಂಸಿ) ಸಂಕೀರ್ಣ, ಚೆನ್ನೈ ಪಾರ್ಕ್ ಟೌನ್ ಎಂಆರ್‌ಟಿಎಸ್ ನಿಲ್ದಾಣ ಹಾಗೂ ಪುರಚ್ಚಿ ತಲೈವರ ಡಾ. ಎಂ.ಜಿ.ಆರ್. ಸೆಂಟ್ರಲ್ ಮೆಟ್ರೋ ನಿಲ್ದಾಣಗಳೊಂದಿಗೆ ಸುಗಮ ಸಂಪರ್ಕ ಹೊಂದಿದ್ದು, ಪ್ರಮುಖ ಸಂಚಾರ ಕೇಂದ್ರವಾಗಿ ಕಾರ್ಯನಿರ್ವಹಿಸುತ್ತಿದೆ.

ಪುನರ್ ಅಭಿವೃದ್ಧಿಯ ಭಾಗವಾಗಿ ನೂತನ ಪ್ರವೇಶ ದ್ವಾರ, ಆಕರ್ಷಕ ಕ್ಯಾನೊಪಿ ಹಾಗೂ ಲ್ಯಾಂಡ್‌ಮಾರ್ಕ್ ಟವರ್ ನಿರ್ಮಿಸಲಾಗಿದ್ದು, ನಿಲ್ದಾಣದ ಹೊಸ ಗುರುತನ್ನು ರೂಪಿಸಿದೆ. ಪ್ರಯಾಣಿಕರ ಮಾರ್ಗದರ್ಶನಕ್ಕಾಗಿ ಆಧುನಿಕ ಸೂಚನಾ ಫಲಕಗಳನ್ನು ಅಳವಡಿಸಲಾಗಿದೆ. ಹೊಸ ಟಿಕೆಟ್ ಕಾಯ್ದಿರಿಸುವ ಕಚೇರಿ, ನಿರೀಕ್ಷಣಾ ಸ್ಥಳ, ಪ್ಲಾಟ್‌ಫಾರ್ಮ್‌ಗಳು 1, 1ಎ ಮತ್ತು 2ರಲ್ಲಿ ಹೊಸ ನೆಲಹಾಸು, ಹೆಚ್ಚುವರಿ ಆಶ್ರಯ ಶೆಡ್‌ಗಳು ಹಾಗೂ ಸಂಪೂರ್ಣ ಹೊಸ ಮೇಲ್ಛಾವಣಿ ನಿರ್ಮಾಣ ಮಾಡಲಾಗಿದೆ.

ಪಾದಚಾರಿ ಮೇಲ್ಸೇತುವೆಗೆ (ಎಫ್‌ಒಬಿ) ಎರಡು ಹೊಸ ಲಿಫ್ಟ್‌ಗಳನ್ನು ಅಳವಡಿಸಲಾಗಿದ್ದು, ಎಂಆರ್‌ಟಿಎಸ್ ನಿಲ್ದಾಣಕ್ಕೆ ನೇರ ಸಂಪರ್ಕ ಕಲ್ಪಿಸುವ ವಿಶೇಷ ಪಾದಚಾರಿ ಮಾರ್ಗಗಳನ್ನು ನಿರ್ಮಿಸಲಾಗಿದೆ. ಈಗಾಗಲೇ ಇರುವ ಭೂಗತ ಮೆಟ್ರೋ ಸಂಪರ್ಕವನ್ನು ಇನ್ನಷ್ಟು ಸಮನ್ವಯಗೊಳಿಸಿ ಬಹು-ಮಾದರಿ ಸಾರಿಗೆ ವ್ಯವಸ್ಥೆಯ ನಡುವೆ ಸುಗಮ ಸಂಚಾರಕ್ಕೆ ಅವಕಾಶ ಕಲ್ಪಿಸಲಾಗಿದೆ.

ಹಿರಿಯ ನಾಗರಿಕರು, ದಿವ್ಯಾಂಗರು ಹಾಗೂ ಸಮೀಪದ ಸರ್ಕಾರಿ ಸಾಮಾನ್ಯ ಆಸ್ಪತ್ರೆಗೆ ಭೇಟಿ ನೀಡುವ ರೋಗಿಗಳಿಗೆ ಸುಲಭ ಸಂಚಾರ ಒದಗಿಸುವ ಉದ್ದೇಶದಿಂದ ಸಂಪೂರ್ಣ ತಡೆರಹಿತ (Barrier-Free) ವ್ಯವಸ್ಥೆಯನ್ನು ರೂಪಿಸಲಾಗಿದೆ.

ಉತ್ತಮ ಪ್ರಯಾಣಿಕರ ಸಂಚಾರ ವ್ಯವಸ್ಥೆ, ಆಧುನಿಕ ಸೌಲಭ್ಯಗಳು, ಪ್ಲಾಟ್‌ಫಾರ್ಮ್‌ಗಳಲ್ಲಿನ ದಟ್ಟಣೆ ಕಡಿತ ಹಾಗೂ ವಿವಿಧ ಸಾರಿಗೆ ವ್ಯವಸ್ಥೆಗಳ ನಡುವೆ ಸುಗಮ ಸಂಪರ್ಕದೊಂದಿಗೆ ಪುನರ್ ಅಭಿವೃದ್ಧಿಗೊಂಡ ಚೆನ್ನೈ ಪಾರ್ಕ್ ರೈಲು ನಿಲ್ದಾಣವು ನಗರದ ಸುರಕ್ಷಿತ, ಆಧುನಿಕ ಮತ್ತು ಪರಿಣಾಮಕಾರಿ ಸಂಚಾರ ದ್ವಾರವಾಗಿ ಹೊರಹೊಮ್ಮಲಿದೆ.