ಯಮಕನಮರಡಿ 2: ಸಿಇಎಸ್ ವಾಣಿಜ್ಯ ಪದವಿ ಮಹಾವಿದ್ಯಾಲಯದಲ್ಲಿ ಪ್ರಸಕ್ತ ಸಾಲಿನ ವಿವಿಧ ಸಾಂಸ್ಕೃತಿಕ ಹಾಗೂ ಕ್ರೀಡಾ ಸಂಘಗಳ ಉದ್ಘಾಟನಾ ಸಮಾರಂಭ ಮತ್ತು ಬಿ.ಕಾಂ. ಪ್ರಥಮ ವರ್ಷದ ವಿದ್ಯಾರ್ಥಿಗಳ ಸ್ವಾಗತ ಸಮಾರಂಭ ವಿಜೃಂಭಣೆಯಿಂದ ನಡೆಯಿತು.  

ಕಾರ್ಯಕ್ರಮದ ಮುಖ್ಯ ಅತಿಥಿಯಾಗಿ ಭಾಗವಹಿಸಿದ್ದ ಚಾರ್ಟರ್ಡ್‌ ಅಕೌಂಟೆಂಟ್ ಶ್ರೀ ಶಿವಾನಂದ ಕಮತೆ ಅವರು ವಿದ್ಯಾರ್ಥಿಗಳನ್ನು ಉದ್ದೇಶಿಸಿ ಮಾತನಾಡಿ, ಸಿ.ಎ. ಕೋರ್ಸ್ನ ಮಹತ್ವ ಹಾಗೂ ಅವಕಾಶಗಳ ಕುರಿತು ವಿವರಿಸಿದರು. ವಿದ್ಯಾರ್ಥಿಗಳು ಏಕಾಗ್ರತೆ, ಶಿಸ್ತು ಮತ್ತು ನಿರಂತರ ಪರಿಶ್ರಮದಿಂದ ಅಧ್ಯಯನ ಮಾಡಿದರೆ ಯಶಸ್ಸು ಸಾಧಿಸಬಹುದು ಎಂದು ಕಿವಿಮಾತು ಹೇಳಿದರು.  

ಈ ಸಂದರ್ಭದಲ್ಲಿ 2025ಹಿ26್ಫೂ ಸಾಲಿನ ಬಿ.ಕಾಂ. ಅಂತಿಮ ವರ್ಷದ ಪರೀಕ್ಷೆಯಲ್ಲಿ ಕಾಲೇಜಿಗೆ ಅತ್ಯುತ್ತಮ ಫಲಿತಾಂಶ ತಂದುಕೊಟ್ಟ ವಿದ್ಯಾರ್ಥಿಗಳನ್ನು ಸನ್ಮಾನಿಸಲಾಯಿತು. ಕು. ಶ್ವೇತಾ ಹಂಚಿನಮನಿ ಪ್ರಥಮ, ಕು. ಪ್ರೀತಿ ಪಾಸಪ್ಪಗೋಳ  ದ್ವಿತೀಯ ಹಾಗೂ ಕು. ಸುಮತಿ ಬಿಸಿರೊಟ್ಟಿ  ತೃತೀಯ ಸ್ಥಾನ ಪಡೆದರು.  

ಅದೇ ರೀತಿ ಕಾಲೇಜಿನ ವಿದ್ಯಾರ್ಥಿನಿ ಕು. ಸ್ನೇಹಾ ರಾಜು ಅವರು ಸಿ.ಎ. ಅಧ್ಯಯನದಲ್ಲಿ ಸಾಧನೆ ಮಾಡಿದ ಹಿನ್ನೆಲೆಯಲ್ಲಿ ವಿಶೇಷವಾಗಿ ಗೌರವಿಸಲಾಯಿತು.  ಕಾರ್ಯಕ್ರಮದ ವೇದಿಕೆಯಲ್ಲಿ ಸಂಸ್ಥೆಯ ಅಧ್ಯಕ್ಷ ಆರ್‌. ಎಂ. ಹಂದಿಗುಂದ, ಉಪಾಧ್ಯಕ್ಷ ವಿ. ಎಂ. ದುಗಾಣಿ, ನಿರ್ದೇಶಕರಾದ ಎಸ್‌. ಎಸ್‌. ತುಬಚಿ, ರಾಜು ತುಬಚಿ, ಪ್ರಾಚಾರ್ಯೆ ಕು. ಎ.ಪಿ. ಸೂಜಿ, ಶ್ರೀಮತಿ ಮಂಗಳಾ ಕುಂಬಾರ, ಶ್ರೀ ಬನ್ನಿಗಿಡದ, ಸಂಸ್ಥೆಯ ಕಾರ್ಯದರ್ಶಿ ಬಿ.ಜಿ. ಹಿರೇಮಠ ಸೇರಿದಂತೆ ಹಲವು ಗಣ್ಯರು ಉಪಸ್ಥಿತರಿದ್ದರು.  

ಹಿರಿಯ ಸಾಹಿತಿ ಶ್ರೀ ಪ್ರಕಾಶ ಅವಲಕ್ಕಿ ಅಧ್ಯಕ್ಷೀಯ ನುಡಿಗಳನ್ನಾಡಿದರು. ಕಾರ್ಯಕ್ರಮವನ್ನು ಕು. ಲಕ್ಷ್ಮೀ ಕಮತಗಿ ನಿರೂಪಿಸಿದರು. ಶ್ರುತಿ ಅಕ್ಕತಂಗೇರಹಾಳ, ಕು. ಫೈರೋಜಾ ಚಡೇದಾರ, ಶಾಂತಾ ಕುಂಬಾರ ಹಾಗೂ ಲಕ್ಷ್ಮೀ ದೇವಮನಗೋಳ ಕಾರ್ಯಕ್ರಮದ ಯಶಸ್ಸಿಗೆ ಸಹಕರಿಸಿದರು.