‘ಬಾಹುಬಲಿ’ ಎದುರು ತೆರೆಗೆ ಬಂದ ‘ರಂಗಿತರಂಗ’ ಗೆದ್ದು ಇತಿಹಾಸ ನಿರ್ಮಿಸಿತ್ತು. ಇದೀಗ ಬಹು ನೀರೀಕ್ಷಿತ ‘ಪುಷ್ಪ-2’ ಎದುರು ಹೊಸಬರ ‘ಧೀರ ಭಗತ್ ರಾಯ್‌’ ಚಿತ್ರವನ್ನು ರೀಲೀಸ್ ಮಾಡಲು ತಂಡ ತಯಾರಾಗಿದೆ. ಹೌದು ಡಿಸೆಂಬರ್ 5ರಂದು ‘ಪುಷ್ಪ-2’ ಬಹು ಭಾಷೆಯಲ್ಲಿ ತೆರೆಗೆ ಬರುತ್ತಿದೆ. ಡಿಸೆಂಬರ್ 6ರಂದು ಕನ್ನಡದ ‘ಧೀರ ಭಗತ್ ರಾಯ್‌’ ಥಿಯೇಟರ್‌ಗೆ ಬರುತ್ತಿದ್ದಾನೆ. ಕರ್ಣನ್ ಎಂಬ ಯುವ ಪ್ರತೀಭೆ ಈ ಚಿತ್ರಕ್ಕೆ ಕಥೆ, ಚಿತ್ರಕಥೆ ಬರೆದು ನಿರ್ದೇಶನ ಮಾಡಿದ್ದಾರೆ. ಚಿತ್ರದ ಉದ್ದೇಶ ಮತ್ತು ಕ್ವಾಲಿಟಿ ನೋಡಿ ದುನಿಯಾ ವಿಜಯ್ ಬೆನ್ನೆಲುಬಾಗಿ ನಿಂತಿದ್ದಾರೆ. ಈಗಾಗಲೇ ಟ್ರೇಲರ್, ಹಾಡುಗಳಿಂದ ಸೌಂಡ್ ಮಾಡುತ್ತಿರುವ ಈ ಚಿತ್ರ ‘ಕಾಟೇರ’ ರೀತಿ ಮತ್ತೊಂದು ನಮ್ಮ ಮಣ್ಣಿನ ಕಥೆ ಒಳಗೊಂಡ ಸಿನಿಮಾ ಎನ್ನಬಹುದು. ಹೌದು ದೇಶದಲ್ಲಿ ಉಳುವವನೇ ಭೂಮಿಯ ಒಡೆಯ ಕಾನೂನು ಜಾರಿಗೆ ಬಂದ ಸಂದರ್ಭದಲ್ಲಿ ಉತ್ತರ ಕರ್ನಾಟಕದಲ್ಲಿ ನಡೆದ ನೈಜಘಟನೆ ಆಧಾರಿತವಾಗಿ ತಯಾರಾದ ಸಿನಿಮಾ ಈ ‘ಧೀರ ಭಗತ್ ರಾಯ್‌’.  

ಈ ಚಿತ್ರದ ಮೂಲಕ ರಾಕೇಶ್ ದಳವಾಯಿ ಎಂಬ ಯುವ ಪ್ರತಿಭೆ ನಾಯಕನಾಗಿ ಸ್ಯಾಂಡಲ್‌ವುಡ್ ಅಂಗಳದಲ್ಲಿ ಸಂಚಲನ ಸೃಷ್ಟಿಸೋದಕ್ಕೆ ಸಜ್ಜಾಗಿದ್ದು, ಇವರಿಗೆ ನಾಯಕಿಯಾಗಿ ಸುಚರಿತಾ ಅನ್ನೋ ಹೊಸ ಮುಖ ಪರಿಚಯವಾಗ್ತಿದೆ. ಅವರ ಜೊತೆಗೆ ಶರತ್ ಲೋಹಿತಶ್ವ, ನೀನಾಸಂ ಅಶ್ವಥ್, ಪ್ರವೀಣ್ ಗೌಡ ಹೆಚ್ ಸಿ, ಹರಿರಾಮ್, ಕೆ.ಎ ಮ್ ಸಂದೇಶ್, ಸುಧೀರ್ ಕುಮಾರ್ ಮುರೋಳಿ ಮುಂತಾದವರು ತಾರಾಗಣದಲ್ಲಿದ್ದಾರೆ. ವೈಟ್ ಲೋಟಸ್ ಎಂಟರ್ಟೈನ್ಮೆಂಟ್ ಮತ್ತು ಶ್ರೀ ಓಂ ಸಿನಿ ಎಂಟ್ರಟೈನರ್ಸ್‌ ಬ್ಯಾನರ್ ನಡಿಯಲ್ಲಿ ಈ ಚಿತ್ರ ನಿರ್ಮಾಣವಾಗಿದೆ. ತಾಂತ್ರಿಕವಾಗಿ ಸಖತ್ ಸ್ಟ್ರಾಂಗ್ ಆಗಿ ಕಾಣ್ತಿರೋ ಈ ಸಿನಿಮಾಗೆ ಪೂರ್ಣಚಂದ್ರ ತೇಜಸ್ವಿ ಸಂಗೀತ ಸಂಯೋಜಿಸಿದ್ದು, ಸೆಲ್ಪಂ ಜಾನ್ ಛಾಯಾಗ್ರಹಣ ಮಾಡಿದ್ದಾರೆ. ಎನ್‌.ಎಂ ವಿಶ್ವ ಈ ಚಿತ್ರಕ್ಕೆ ಸಂಕಲನ ಮಾಡಿದ್ದಾರೆ.