ಬೆಂಗಳೂರು, ಡಿ. 20 ರಾಷ್ಟ್ರಗೀತೆಯನ್ನು ಹಾಡುವ ಮೂಲಕ ಪ್ರತಿಭಟನೆಯನ್ನು ತಣ್ಣಗಾಗಿಸುವಲ್ಲಿ  ಬೆಂಗಳೂರು ಕೇಂದ್ರ ವಿಭಾಗದ ಡಿಸಿಪಿ ಚೇತನ್ ರಾಥೋಡ್ ಯಶಸ್ವಿಯಾಗಿದ್ದಾರೆ. ಇದರ ವೀಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು, ಈ ಅಧಿಕಾರಿಯ ಜಾಣತನಕ್ಕೆ ಎಲ್ಲೆಡೆ ಪ್ರಶಂಸೆಯ ಮಹಾಪೂರವೇ ಹರಿದು ಬರುತ್ತಿದೆ.ಪೌರತ್ವ ತಿದ್ದುಪಡಿ ಕಾಯಿದೆ ವಿರೋಧಿಸಿ ರಾಜ್ಯಾದ್ಯಂತ ಪ್ರತಿಭಟನೆಗಳು ನಡೆಯುತ್ತಿದ್ದು ಮಂಗಳೂರು ಸೇರಿದಂತೆ ಕೆಲವೆಡೆ ಪರಿಸ್ಥಿತಿ ಉದ್ವಿಗ್ನಗೊಂಡಿದೆ. ಕೆಲವೆಡೆ ಪೊಲೀಸರು ಪ್ರತಿಭಟನೆಯನ್ನು ಹತ್ತಿಕ್ಕಲು ಲಾಠಿ ಪ್ರಹಾರ ಆಶ್ರುವಾಯುಪ್ರಯೋಗ ಬಂಧನದ ರುಚಿ‌ತೋರಿಸಿದರೆ ಚೇತನ್ ರಾಥೋಡ್ ಮಾತ್ರ ವಿಭಿನ್ನವಾಗಿ ಶಾಂತಿಯುತವಾಗಿ ಪ್ರತಿಭಟನಕಾರರ ಮನಗೆದ್ದು, ಅವರನ್ನು ಸಮಾಧಾನದಿಂದಲೇ ಕಳುಹಿಸಿಕೊಟ್ಟಿದ್ದಾರೆ.ಶುಕ್ರವಾರ ಬೆಳಿಗ್ಗೆ ನಗರದ ಕಮರ್ಷಿಕಲ್ ಕಾಂಪ್ಲೆಕ್ಸ್ ಸಮೀಪ ನಿಷೇಧಾಜ್ಞೆಯನ್ನೂ ಲೆಕ್ಕಿಸದೇ ಕೆಲ ಪ್ರಗತಿಪರ ಸಂಘಟನೆಯವರು, ಮುಸ್ಲಿಂ ವರ್ತಕರು ಪ್ರತಿಭಟನೆಗೆ ಮುಂದಾಗಿದ್ದರು.ಆಗ ‌ಡಿಸಿಪಿ ಚೇತನ್ ಅವರು ಪ್ರತಿಭಟನಕಾರರೊಂದಿಗೆ ಪ್ರೀತಿಯಿಂದ ಹಿಂದಿಯಲ್ಲಿ ಮಾತನಾಡಿ, "ನಾನು ಹೇಳುವುದನ್ನು ಗಮನವಿಟ್ಟು ಕೇಳಿ. ನಿಮಗೆ ತೊಂದರೆ ಕೊಡಲೆಂದು ನಾನು ಇಲ್ಲಿ ಬಂದಿಲ್ಲ. ನಿಮ್ಮಗಳ ಮಧ್ಯೆಯೇ ಯಾರಾದ್ರೂ ನಮಗೆ ನಿಮಗೆ ಗೊತ್ತಿಲ್ಲದಂತೆಯೇ ದುರುಳ ದೇಶದ್ರೋಹಿ ಇರಬಹುದು. ಆದರೆ ಅವನು ಯಾರೆಂದು ಪತ್ತೆ ಹಚ್ಚಬೇಕಷ್ಟೆ. ಶಾಂತವಾಗಿರಿ. ನನ್ನ ಹಾಡು ಕೇಳಿ ಎಂದು ಜನಗಣಮನ ರಾಷ್ಟ್ರಗೀತೆ ಹಾಡಲಾರಂಭಿಸಿದರು." ಆಗ ಎಲ್ಲಾ ಪ್ರತಿಭಟನಕಾರರು ಸಹ ಎದ್ದು ನಿಂತು ರಾಥೋಡ್ ಜೊತೆಗೂಡಿ ಜನಣಮನ ಹಾಡಿದರು.ಬಿಗಡಾಯಿಸಿದ ಪರಿಸ್ಥಿತಿಯಲ್ಲಿ ಜನರಿಗೆ ಅರಿವು ಮೂಡಿಸಿರುವ ನಿಮ್ಮ ಪ್ರಯತ್ನ ಅತ್ಯತ್ತಮ ಎಂದು ಸಿಐಡಿಯ ಆರ್ಥಿಕ ಅಪರಾಧ ವಿಭಾಗದ ಐಜಿ ಆಗಿದ್ದ ಹೇಮಂತ್ ನಿಂಬಾಳ್ಕರ್ ಟ್ವೀಟ್ ಮಾಡಿದ್ದಾರೆ.‘ಭಾರತೀಯರಾಗಿರುವುದು ನಮ್ಮ ಹೆಮ್ಮೆ. ರಾಷ್ಟ್ರಭಕ್ತಿಯ ವಿಚಾರದಲ್ಲಿ  ಪೊಲೀಸರೇನೂ ಭಿನ್ನರಲ್ಲ. ಕಾಯಿದೆಗಳು ಇರುತ್ತವೆ ಮತ್ತು ಉತ್ತಮ ಸಮಾಜಕ್ಕಾಗಿ ಅವುಗಳನ್ನು ತಿದ್ದುಪಡಿ ಮಾಡಲಾಗುತ್ತದೆ. ಆದರೆ, ಭಾರತೀಯ ಎನ್ನುವುದು ಶಾಶ್ವತ ಭಾವನೆ. ಇಂತಹ ಸ್ಥಿತಿಯಲ್ಲಿ ಪ್ರತಿಯೊಬ್ಬರಲ್ಲೂ ಅರಿವು ಮೂಡಿಸಿದ್ದಕ್ಕಾಗಿ ಧನ್ಯವಾದ ಚೇತನ್’ ಎಂದು ಟ್ವೀಟ್ ಮಾಡಿದ್ದಾರೆ.