ಎಳನೀರು ದರ ಏರಿಕೆಗೆ ಗ್ರಾಹಕರು ಕಂಗಾಲು  ಅಷ್ಟಾದರೂ ನೈಸರ್ಗಿಕ ಪಾನೀಯಕ್ಕೆ ದುಂಬಾಲು 

ಮಾಂಜರಿ 24: ಪ್ರಸಕ್ತ ವರ್ಷ ಫೆಬ್ರವರಿಯಲ್ಲೇ ಸೂರ್ಯ ಉಗ್ರ ಪ್ರತಾಪ ತೋರುತ್ತಿದ್ದು, ಬಿಸಿಲಿನ ಬೇಗೆ ದಿನೇ ದಿನೆ ಹೆಚ್ಚುತ್ತಿದೆ. ಜಳ ತಾಳಲಾರದ ಜನರು ತಂಪು ಪಾನೀಯಗಳ ಮೊರೆ ಹೋಗುತ್ತಿದ್ದು, ಎಳನೀರಿನ ಬೆಲೆ ಕೇಳಿ ಹೌಹಾರುವಂತಾಗಿದೆ. ಒಂದು ಎಳನೀರಿಗೆ 35-40 ರೂ. ಇದ್ದ ಬೆಲೆ ಈಗ 50 ರೂ.ಬಂದು ತಲುಪಿದ್ದು, ದಾಹ ತೀರಿಸುತ್ತಿದ್ದ ನೈಸರ್ಗಿಕ ಪಾನೀಯದ ಬೆಲೆ ಏಕದಮ್ ಏರಿರುವುದು ಜನರಿಗೆ ಹೊರೆಯಾಗುತ್ತಿದೆ. ಈ ವರ್ಷ ಎಳನೀರಿನ ಇಳುವರಿಯೂ ಕುಸಿದಿದ್ದರಿಂದ ಬೇಡಿಕೆ ಹೆಚ್ಚಾಗಿದೆ.ಬಿಸಿಲಿನ ಜಳ ಹೆಚ್ಚುತ್ತಿರುವುದರಿಂದ ಬೆಲೆ ಕೂಡ ಹೆಚ್ಚುತ್ತಿದೆ.   ನೆಚ್ಚಿನ ಪಾನೀಯ: ಎಳನೀರು ವರ್ಷಪೂರ್ತಿಯೂ ಬಹುತೇಕರ ನೆಚ್ಚಿನ ಪಾನೀಯ. ಅದರಲ್ಲೂ ಬಿಸಿಲಿನ ಬೇಗೆಯಿಂದ ಪಾರಾಗಲು ಜನರು ಆರೋಗ್ಯಯುತ ಎಳನೀರು ಸೇವಿಸುತ್ತಾರೆ. ಆದರೆ, ಎಳನೀರು ಪೂರೈಕೆಯಲ್ಲಿ ವಿಳಂಬದಿಂದಾಗಿ ಬೆಲೆ ಗಗನಕ್ಕೇರಿದೆ. ಅನಿವಾರ್ಯವಾಗಿ ಕೇಳಿದಷ್ಟು ಹಣ ನೀಡಿ ಸೇವಿಸುವಂತಾಗಿದೆ. ರೈತರಿಗೆ ಕಡಿಮೆ ಲಾಭ: ಮರದಿಂದ ಎಳನೀರು ಇಳಿಸುವುದು, ವಾಹನಗಳಿಗೆ ತುಂಬುವುದು, ಸಾಗಾಣಿಕೆ ಖರ್ಚು ಎಲ್ಲವೂ ವ್ಯಾಪಾರಿಗಳದ್ದು, ಎಲ್ಲ ವೆಚ್ಚವನ್ನು ಸೇರಿಸಿ ನಗರದ ಮುಕ್ತ ಮಾರುಕಟ್ಟೆಯಲ್ಲಿ 50 ರೂ.ಗೆ ಎಳನೀರು ಮಾರಾಟ ಮಾಡುತ್ತಿದ್ದಾರೆ. ಇದರಿಂದ ವ್ಯಾಪಾರಿಗಳಿಗೆ ಹೆಚ್ಚಿನ ಲಾಭವಾಗುತ್ತದೆ. ರೈತರಿಗೆ ಅದರಲ್ಲಿ ಅರ್ಧದಷ್ಟು ಹಣ ಮಾತ್ರ ಸಿಗುತ್ತದೆ. ಇದರಿಂದ ರೈತರು ಮತ್ತು ಗ್ರಾಹಕರ ನಡುವೆ ಮಧ್ಯವರ್ತಿಗಳೇ ದುಂಡಗಾಗುತ್ತಾರೆ. ಪೂರೈಕೆ ಪ್ರಮಾಣ ಕಡಿಮೆ: ಜಿಲ್ಲೆಯ ಚಿಕ್ಕೋಡಿ ಪಟ್ಟಣ ಸೇರಿದಂತೆ ಮಾಂಜರಿ  ಅಂಕಲಿ  ಪ್ರದೇಶದಲ್ಲಿ ಅಲ್ಪ ಪ್ರಮಾಣದಲ್ಲಿ ಎಳನೀರಿನ ಬೆಳೆ ಇದೆ. ಹೀಗಾಗಿ ಮಂಡ್ಯದ ಮದ್ದೂರು, ಚಿತ್ರದುರ್ಗ, ದಾವಣಗೆರೆ ಜಿಲ್ಲೆಗಳಿಂದ ನಿಯ ಮಿತವಾಗಿ ಎಳನೀರು ಪೂರೈಕೆಯಾಗುತ್ತಿತ್ತು. ಅಲ್ಲಿಯೂ ಇಳುವರಿ ಕಡಿಮೆ ಆಗಿರುವುದರಿಂದ ಗ್ರಾಹಕರಿಗೆ ಬೆಲೆ ಏರಿಕೆ ಬಿಸಿ ತಟ್ಟಿದೆ. 

ಗಾತ್ರಕ್ಕೆ ತಕ್ಕ ದರ 

ಎಳನೀರಿನ ಕಾಯಿಗಳಲ್ಲಿ ಮೂರು ವಿಭಾಗ ಮಾಡಿರುತ್ತಾರೆ. ಸಣ್ಣಗ್ರಾತ್ರದ ಎಳನೀರಿಗೆ 30 ರೂ., ಸಾಧಾರಣ ಗಾತ್ರಕ್ಕೆ 40 ರೂ., ದೊಡ್ಡಗಾತ್ರದ ಎಳನೀರಿಗೆ 50 ರೂ. ನಿಗದಿ ಮಾಡಿದ್ದಾರೆ. ಮುಂದಿನ ದಿನಗಲ್ಲಿ ದರ ಇನ್ನೂ ಹೆಚ್ಚಲಿದೆ ಎಂದು ಎಳನೀರು ವ್ಯಾಪಾರಿಗಳು ಹೇಳುತ್ತಾರೆ. ಆದರೆ, ಆರೋಗ್ಯಕ್ಕೆ ಉತ್ತಮ ಎನ್ನುವ ಕಾರಣಕ್ಕೆ ಎಷ್ಟು ದುಬಾರಿಯಾದರೂ ಜನರು ಎಳನೀರು ಕುಡಿಯವುದರಿಂದ ದರ ಹೆಚ್ಚುತ್ತಲೇ ಇದೆ.