ಬೆಳಗಾವಿ 12 : ಸಂಜೀವಿನಿ ಫೌಂಡೇಶನ್ ವತಿಯಿಂದ ಅಂತರರಾಷ್ಟ್ರೀಯ ಮಹಿಳಾ ದಿನವನ್ನು ಸಂಭ್ರಮದಿಂದ ಆಚರಿಸಲಾಯಿತು. ಈ ಕಾರ್ಯಕ್ರಮಕ್ಕೆ ಮನೋವೈದ್ಯ ತಜ್ಞೆ ಜಯಲಕ್ಷ್ಮಿ ದೇಸಾಯಿ ಅವರು ವಿಷಯ ತಜ್ಞ ಮಾರ್ಗದರ್ಶಕರಾಗಿ ಉಪಸ್ಥಿತರಿದ್ದರು.  ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ಸಂಜೀವಿನಿ ಫೌಂಡೇಶನ್ ಸಂಸ್ಥಾಪಕಿ ಡಾ. ಸವಿತಾ ದೇಗಿನಾಳ ವಹಿಸಿದ್ದರು. ವಡಗಾಂವಿನ ಮಂಗಾಯಿ ಭಜನಿ ಮಂಡಳದ ನೀತಾ ಚಂದಗಡಕರ ಅವರು ಮುಖ್ಯ ಅತಿಥಿಗಳಾಗಿ ಉಪಸ್ಥಿತರಿದ್ದರು.

ಕಾವೇರಿ ಲಮಾಣಿ ಅವರು ಸ್ವಾಗತ ಹಾಗೂ ಅತಿಥಿಗಳ ಪರಿಚಯ ಮಾಡಿಕೊಟ್ಟರು. ಡಾ. ಸವಿತಾ ದೇಗಿನಾಳ ಅವರು ಮುಖ್ಯ ಅತಿಥಿಗಳಿಗೆ ಪುಷ್ಪಗುಚ್ಛ ನೀಡಿ ಸನ್ಮಾನಿಸಿದರು.ಈ ಸಂದರ್ಭದಲ್ಲಿ ವಿಷಯ ತಜ್ಞೆ ಜಯಲಕ್ಷ್ಮಿ ದೇಸಾಯಿ ಅವರು ಭಾವನಾತ್ಮಕ ತಾಳ್ಮೆ ಮತ್ತು ಸ್ವಯಂ ಆರೈಕೆ ಎಂಬ ವಿಷಯದ ಕುರಿತು ಮಾರ್ಗದರ್ಶನ ನೀಡಿದರು. ಇಂದಿನ ಧಾವಂತದ ಜೀವನದಲ್ಲಿ ಮಹಿಳೆಯರು ತಮ್ಮ ಭಾವನಾತ್ಮಕ ಆರೋಗ್ಯದ ಕಡೆ ಗಮನ ಹರಿಸುವುದು ಅತ್ಯಂತ ಅಗತ್ಯ ಎಂದು ಅವರು ತಿಳಿಸಿದರು. ತಮ್ಮ ಭಾವನೆಗಳನ್ನು ಗುರುತಿಸಿ ಅವುಗಳನ್ನು ಸರಿಯಾಗಿ ನಿರ್ವಹಿಸುವುದು ಹೇಗೆ ಎಂಬುದರ ಬಗ್ಗೆ ಉದಾಹರಣೆಗಳೊಂದಿಗೆ ವಿವರಿಸಿದರು.  

ಒತ್ತಡ ಕಡಿಮೆ ಮಾಡಲು ಶೇಕಿಂಗ್ ಮತ್ತು ಟ್ಯಾಪಿಂಗ್ ಮೊದಲಾದ ಸರಳ ವ್ಯಾಯಾಮಗಳನ್ನು ಪ್ರಾಯೋಗಿಕವಾಗಿ ತೋರಿಸಿದರು. ಹಾಗೆಯೇ ನಿಯಮಿತವಾಗಿ ನಡೆಯುವುದು, ವ್ಯಾಯಾಮ ಮತ್ತು ಯೋಗ ಮಾಡುವುದು, ಹಾಗೂ ತಮ್ಮ ಮನದ ಭಾವನೆಗಳನ್ನು ಸ್ನೇಹಿತರೊಂದಿಗೆ ಹಂಚಿಕೊಳ್ಳುವುದು ಮಾನಸಿಕ ಒತ್ತಡ ಕಡಿಮೆ ಮಾಡಲು ಸಹಾಯಕವಾಗುತ್ತದೆ ಎಂದು ಹೇಳಿದರು. ಅಧ್ಯಕ್ಷೀಯ ಭಾಷಣದಲ್ಲಿ ಡಾ. ಸವಿತಾ ದೇಗಿನಾಳ ಅವರು ಮಾತನಾಡಿ, ಸಂಜೀವಿನಿ ಫೌಂಡೇಶನ್ ವತಿಯಿಂದ ಕಳೆದ ವರ್ಷದಿಂದ **ಮಾರ್ಚ್‌ 8 ರಿಂದ ಏಪ್ರಿಲ್ 8ರವರೆಗೆ “ಮಹಿಳಾ ಆರೋಗ್ಯ ಜಾಗೃತಿ ಮಾಸ”* ವಾಗಿ ಆಚರಿಸಲಾಗುತ್ತಿದೆ ಎಂದು ಹೇಳಿದರು. ಈ ಅವಧಿಯಲ್ಲಿ ಬೆಳಗಾವಿ ನಗರ ಮತ್ತು ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ವಿವಿಧ ಮಾರ್ಗದರ್ಶನ ಶಿಬಿರಗಳು ಮತ್ತು ಜಾಗೃತಿ ಕಾರ್ಯಕ್ರಮಗಳು ಆಯೋಜಿಸಲಾಗುತ್ತವೆ. ಈ ವರ್ಷದ ಮಹಿಳಾ ಆರೋಗ್ಯ ಜಾಗೃತಿ ಮಾಸದ ಆರಂಭವೂ ಈ ಕಾರ್ಯಕ್ರಮದ ಮೂಲಕವೇ ನಡೆಯಿತು ಎಂದು ಅವರು ತಿಳಿಸಿದರು.  

ಮಹಿಳೆಯರು ತಮ್ಮ ಮಾನಸಿಕ ಆರೋಗ್ಯ ಮತ್ತು ಸ್ವಯಂ ಆರೈಕೆಗೆ ಮಹತ್ವ ನೀಡಬೇಕು ಎಂದು ಅವರು ಒತ್ತಿ ಹೇಳಿದರು.ಈ ಸಂದರ್ಭದಲ್ಲಿ ಉಪಸ್ಥಿತರಿದ್ದ ಮಹಿಳೆಯರೊಂದಿಗೆ ಪರಸ್ಪರ ಸಂವಾದ ನಡೆಸಲಾಯಿತು. ಕಾರ್ಯಕ್ರಮದ ನಿರೂಪಣೆಯನ್ನು ಪದ್ಮಾ ಓಶೇಕರ್ ನಡೆಸಿದರು. ಸರಿತಾ ಸಿದ್ಧಿ ಅವರು ಕೃತಜ್ಞತೆ ಸಲ್ಲಿಸಿದರು.ಕಾರ್ಯಕ್ರಮದಲ್ಲಿ ಸಲಹೆಗಾರರಾದ ಡಾ. ಸುರೇಖಾ ಪೋತೆ, ಶಂಕರ ಪಾಟೀಲ, ಮಂಗಾಯಿ ಭಜನಿ ಮಂಡಳದ ಸದಸ್ಯೆಯರು ಹಾಗೂ ಸಂಜೀವಿನಿ ಫೌಂಡೇಶನ್ ಸಿಬ್ಬಂದಿ ಉಪಸ್ಥಿತರಿದ್ದರು. ಒಟ್ಟಾರೆ ಕಾರ್ಯಕ್ರಮಕ್ಕೆ ಮಹಿಳೆಯರಿಂದ ಉತ್ತಮ ಪ್ರತಿಕ್ರಿಯೆ ದೊರೆಯಿತು.