ಲೋಕದರ್ಶನ

ಮುಂಡಗೋಡ 10 : ಅದು ಸುಮಾರು ಸಾವಿರ ಜನ ಬದುಕೋ ಜಾಗ, ಮನುಷ್ಯನ ಅತೀವ ಅವಶ್ಯಕತೆ ಏನೆಂದರೆ ನೀರು, ಅಂತಹ ನೀರಿಗೆ ಅಲ್ಲಿ ತತ್ವಾರ ಬಂದಿತ್ತು. ಆದರೆ ನಿಮ್ಮ ಜೊತೆ ಯಾವಾಗಲೂ ನಿಲ್ಲುವ ಜವಾಬ್ದಾರಿ ಹೊತ್ತಿರುವ ನಮಗೆ ಜನರ ಸಂವೇದನೆ ಅರ್ಥ ಮಾಡ್ಕೊಳ್ಳೋ ಶಕ್ತಿ ಇದೆ. ಆ ಶಕ್ತಿಯೇ ಶಬ್ದವಾಗಿ ಒಂದು ಖಡಕ್ ವರದಿ ತಯಾರಾಗಿತ್ತು, ಪರಿಣಾಮ ಇವತ್ತು ಆ ಓಣಿಯ ಜನರಿಗೆ ‘ಜಲ ಭಾಗ್ಯ’ ಬಂದಿದೆ.ಮುಂಡಗೋಡ ತಾಲೂಕಿನ ಕಂಬಾರುಗಟ್ಟಿ ವ್ಯಾಪ್ತಿಯ ಬೋರ್ ವೆಲ್ ಒಂದು ಹಾಳಾಗಿ ಜಮಾನಾನೇ ಆಗಿತ್ತು, ದಿಕ್ಕಿಲ್ಲ, ದೆಸೆಯಿಲ್ಲ ಎಂಬಂತೆ ತುಕ್ಕು ಹಿಡಿಯುತ್ತಾ ಬಿದ್ದಿದ್ದ ಬೋರ್ವೆಲ್ ಒಂದು ಬದಿಯಾದರೆ ದೂರದೂರದಿಂದ ನೀರು ಹೊತ್ತು ಸಾಗೋ ಹೆಂಗಸರು ಮತ್ತೊಂದು ಕಡೆ. ಪಟ್ಟಣದ ಪ್ರಮುಖ ಭಾಗದಲ್ಲಿರೋ ಕಾರಣ ಸಂಜೆಯಾದಾಗ ದಣಿವಾರಿಸಿಕೊಳ್ಳೋಕೆ ಬಡ ಕೂಲಿಯಾಳುಗಳು ಇದೇ ಬೋರ್ ವೆಲ್ ನೀರಿಗೆ ಕೈ ಚಾಚುತ್ತಿದ್ದರು.

ಆ ಕೆಟ್ಟುಹೋದ ಬೋರ್ ನಿಂದ ಕಂಬಾರುಗಟ್ಟಿಯಲ್ಲಿ ನೀರಿನ ಹಾಹಾಕಾರ ಉಂಟಾಗಿತ್ತು, 30-40 ಮನೆಗಳ 300 ಜನ ಕುಡಿಯುವ ನೀರಿನ ಸಮಸ್ಯೆ ಎದುರಿಸುತ್ತಿದ್ದರು. ಬೀದಿಗಿಳಿದರು, ಕೊಡ ಇಟ್ಟು ಪ್ರತಿಭಟನೆ ಮಾಡಿದರು. ಉಹೂಂ, ಯಾವುದಕ್ಕೂ ತಲೆ ಕೆಡಿಸಿಕೊಳ್ಳಲಿಲ್ಲ ಅಧಿಕಾರಿಗಳು, ಯಾವಾಗ ನಮ್ಮ ಲೋಕದರ್ಶನ ಪತ್ರಿಕೆ ಈ ವಿಷಯಕ್ಕೆ ತಲೆ ಹಾಕಿತೋ ಆಗ ಅದು ವೈರಲ್ ಆಯಿತು. ಜನರು ಬಾಯಿಂದ ಬಾಯಿಗೆ ವಿಷಯ ಸಾಗಿ ಇಂದು ನಾಲ್ಕೈದು ಜನ ರಿಪೇರಿ ಮಾಡಿ ಬೋರ್ ವೆಲ್ ಅನ್ನು ಸರಿಮಾಡಿದ್ದಾರೆ. ಕಳೆದ 30 ವರ್ಷದಿಂದ ಜನರ ಜೀವನಾಡಿಯಾಗಿದ್ದ ಹ್ಯಾಂಡ್ ಪಂಪ್ ಗೆ ಮರು ಜೀವ ಬಂದಿದೆ. ಅಂತೂ ಇಂತೂ ಈ ಬಿರು ಬೇಸಿಗೆಯಲ್ಲಿ ದಣಿದಿದ್ದ ಜೀವಗಳಿಗೆ ತುಸು ನೆಮ್ಮದಿ ಹಾಗೂ ನಮ್ಮ ವರದಿ ಗೆದ್ದಿತು, ಅಧಿಕಾರಿಗಳು ಸಹಕರಿಸಿದರು ಎಂಬಲ್ಲಿಗೆ ಬೋರ್ ವೆಲ್ ಪ್ರಸಂಗ ಸುಖಾಂತ್ಯ ಕಂಡಿದೆ.