ಲೋಕದರ್ಶನ ವರದಿ 

ಶಿಗ್ಗಾವಿ 18 : ಇ-ಕೆವೈಸಿ ನಿಯಮಗಳನ್ನು ಸರಳಗೊಳಿಸಿ ಬ್ಯಾಂಕ್ ವಹಿವಾಟು ಮತ್ತು ಖಾತೆ ತೆರೆಯುವ ಪ್ರಕ್ರಿಯೆ ಸುಲಭವಾಗಿ ಬಳಕೆಗೆ ಅವಕಾಶ ನೀಡಲಾಗಿದೆ ಎಂದು ಹಾವೇರಿ ಕೆನರಾ ಬ್ಯಾಂಕ್ ಪ್ರಾದೇಶಿಕ ಕಚೇರಿಯ ಅಧಿಕಾರಿ ಶರತ್ ಬಾಬು ಹೇಳಿದರು.  ತಾಲೂಕಿನ ಮುಗಳಿ ಗ್ರಾಮದ ಪ್ರಾಥಮಿಕ ಕೃಷಿ ಪತ್ತಿನ ಸಹಕಾರಿ ಸಂಘದಲ್ಲಿ ಹಾವೇರಿ ಕೆನರಾ ಬ್ಯಾಂಕಿನ ಪ್ರಾದೇಶಿಕ ಕಚೇರಿ ವತಿಯಿಂದ ಹಮ್ಮಿಕೊಂಡ ಅಂತಾರಾಷ್ಟ್ರೀಯ ಮಹಿಳಾ ದಿನಾಚರಣೆ ' ಮತ್ತು ಆರ್ಥಿಕ ಸಾಕ್ಷರತೆ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು ಭಾರತದ ಸೈಬರ್‌ಸ್ಪೇಸ್ ಹಿಂದೆಂದಿಗಿಂತಲೂ ಹೆಚ್ಚು ಚಟುವಟಿಕೆಯಿಂದ ಕೂಡಿದ್ದು, ಪ್ರತಿದಿನ ಕೋಟ್ಯಂತರ ವ್ಯವಹಾರ ಮತ್ತು ಸಂವಹನಗಳನ್ನು ನಿರ್ವಹಿಸುತ್ತಿದೆ. ಸೈಬರ್ ವಂಚನೆಗಳು ಎಂದರೆ ಅನಧಿಕೃತ ಪ್ರವೇಶ, ದತ್ತಾಂಶ ಕಳ್ಳತನ ಅಥವಾ ಆನ್‌ಲೈನ್ ವಂಚನೆಗಳಂತಹ ಡಿಜಿಟಲ್ ವೇದಿಕೆಗಳ ಮೂಲಕ ನಡೆಸಲಾಗುವ ವಂಚನೆ ಚಟುವಟಿಕೆಗಳು.

ಇವು ಸಾಮಾನ್ಯವಾಗಿ ಸಂತ್ರಸ್ಥರಿಗೆ ಆರ್ಥಿಕ ನಷ್ಟ ಉಂಟು ಮಾಡುವ ಉದ್ದೇಶ ಹೊಂದಿರುತ್ತದೆ ಎಂದರು. ಕೆನರಾ ಬ್ಯಾಂಕಿನ ಶಾಖಾಧಿಕಾರಿ ಲಲಿತಾ ಅವರು ಮಾತನಾಡಿ ಬ್ಯಾಂಕಿನ ಮಹಿಳೆಯರ ಸಂಬಂಧಪಟ್ಟಂತ ಕೆನರಾ ಎಂಜಿಲ್ ಅಕೌಂಟ್, ಆರ್‌ಡಿ ಖಾತೆ, ವಿದ್ಯಾರ್ಥಿಗಳ ಕಾಲರ್ ಶಿಪ್ ಖಾತೆಗಳ ಕುರಿತು ಹಾಗೂ ಇತ್ತೀಚಿನ ಡಿಜಿಟಲ್ ಪೇಂಟಿನ ಬಗ್ಗೆ ಪ್ರಾತ್ಯೇಕ್ಷಿಕ ಮಾಹಿತಿ ನೀಡಿದರು. ಸಂಪನ್ಮೂಲ ವ್ಯಕ್ತಿ ಎನ್‌.ಎನ್‌. ಸಕ್ರಿಯವರು ಮಹಿಳಾ ಸಬಲೀಕರಣ ವಿಷಯ ಕುರಿತು ಮಾತನಾಡಿದರು. ಸೊಸೈಟಿ ಕಾರ್ಯದರ್ಶಿ ಸುಮಾ ಬೆಂಗೇರಿ ಅಧ್ಯಕ್ಷತೆ ವಹಿಸಿದ್ದರು. ಅಮೂಲ್ಯ ಸಾಕ್ಷರತಾ ಕೇಂದ್ರದ ಅಧಿಕಾರಿ ರಾಜು ಕೆಂಭಾವಿ, ಈರಮ್ಮ ಮತ್ತೂರುಮಠ, ಮಹದೇವಕ್ಕ ಬದ್ರಶೆಟ್ಟಿ, ವಿಜಯಲಕ್ಷ್ಮೀ ಅರಳಿಕಟ್ಟಿ ಸೇರಿದಂತೆ ಇತರರು ಇದ್ದರು.