ಧಾರವಾಡ.02 : ಇಂದು ಧಾರವಾಡ ಜನಜಾಗೃತಿ ಅಭಿಯಾನದಿಂದ, ಆರ್‌.ಎನ್ ಶೆಟ್ಟಿ ಕ್ರೀಡಾಂಗಣಕ್ಕೆ ಮೂಲಭೂತ ಸೌಲಭ್ಯ ಒದಗಿಸುವ ಕುರಿತು ಜಿಲ್ಲಾಧಿಕಾರಿಗಳಿಗೆ ಮನವಿ ಮಾಡಲಾಯಿತು. ಈ ಸಂದರ್ಭದಲ್ಲಿ ಜಿಲ್ಲಾಧಿಕಾರಿಗಳ ಪರವಾಗಿ ತಹಶೀಲ್ದಾರರು ಮನವಿ ಸ್ವೀಕರಿಸಿ ಉನ್ನತ ಅಧಿಕಾರಿಗಳ ಗಮನಕ್ಕೆ ತರುವುದಾಗಿ ತಿಳಿಸಿದರು. ಧಾರವಾಡದ ಹೃದಯ ಭಾಗದಲ್ಲಿರುವ ಪ್ರತಿಷ್ಠಿತ ಆರ್‌.ಎನ್ ಶೆಟ್ಟಿ ಕ್ರೀಡಾಂಗಣಕ್ಕೆ, ಬೆಳಗಿನ ಜಾವ ಮತ್ತು  ಸಾಯಂಕಾಲ ಕ್ರೀಡೆ, ವಾಕಿಂಗ್, ಜಾಗಿಂಗ್ ಗಾಗಿ  ಸಾವಿರಾರು ಸಾರ್ವಜನಿಕರು, ಯುವಕರು, ಮಹಿಳೆಯರು, ವೃದ್ಧರು, ಮಕ್ಕಳು ದಿನನಿತ್ಯ ಬಂದು ಹೋಗುತ್ತಾರೆ.

            ಸದರಿ ಸಾರ್ವಜನಿಕರಿಗೆ ಸಾಕಾಗುವಷ್ಟು ವ್ಯಾಯಾಮದ ಉಪಕರಣಗಳು ಇರುವುದಿಲ್ಲ. ಈಗ ಕೆಲವೇ ಕೆಲವು ಉಪಕರಣಗಳು  ಮಾತ್ರ ಸುಸ್ಥಿತಿ ಯಲ್ಲಿವೆ, ಇನ್ನು ಹೆಚ್ಚಿನ ವ್ಯಾಯಾಮದ ವಿವಿಧ ರೀತಿಯ ಉಪಕರಣಗಳ ಅವಶ್ಯಕತೆ ಇದ್ದು, ಅವುಗಳನ್ನು ಅಳವಡಿಸಲು ಸಾಕಷ್ಟು  ಸ್ಥಳಾವಕಾಶ ಇರುತ್ತದೆ. ಕೂಡಲೇ ಹೆಚ್ಚಿನ ಸಂಖ್ಯೆಯಲ್ಲಿ  ವಿವಿಧ ರೀತಿಯ ವ್ಯಾಯಾಮದ ಉಪಕರಣಗಳನ್ನು ಅಳವಡಿಸಬೇಕು. ಅದೇ ರೀತಿಯಾಗಿ ದೈಹಿಕ ಚಟುವಟಿಕೆಗಳಿಗಾಗಿ  ಬರುವ ಸಾರ್ವಜನಿಕರಿಗೆ ಶುದ್ಧ ಕುಡಿಯುವ ನೀರಿನ ವ್ಯವಸ್ಥೆ ಇರುವುದಿಲ್ಲ, ಕೂಡಲೇ ಶುದ್ಧ ಕುಡಿಯುವ ನೀರಿನ ವ್ಯವಸ್ಥೆ ಮಾಡಬೇಕು.ಅದೇ ರೀತಿಯಾಗಿ  ಸದರಿ ಕ್ರೀಡಾಂಗಣದಲ್ಲಿ ಒಂದೇ ಟಾಯ್ಲೆಟ್ ಮತ್ತು ಎರಡು ಯೂರಿನಲ್ಸ್‌ ಮಾತ್ರ ಇದ್ದು, ಅವು ಸಹ ಬಳಕೆಗೆ ಯೋಗ್ಯವಿಲ್ಲ.

           ದಿನನಿತ್ಯ  ಕ್ರೀಡಾಂಗಣಕ್ಕೆ ಬರುವ ಸಾರ್ವಜನಿಕರಿಗೆ  ತೊಂದರೆ ಯಾಗುತ್ತಿದ್ದು, ಕೂಡಲೇ ಹೆಚ್ಚಿನ ಸಂಖ್ಯೆಯಲ್ಲಿ ಸರಿಯಾದ ಶೌಚಾಲಯಗಳನ್ನು ನಿರ್ಮಿಸಬೇಕು.ಅದರಂತೆ ಕ್ರೀಡಾಂಗಣದಲ್ಲಿ ಬೀದಿ ನಾಯಿಗಳು ಒಳನುಸುಳಿ ಸಾರ್ವಜನಿಕರಿಗೆ ಹಲವು  ಬಾರಿ  ಕಚ್ಚಿದ ಘಟನೆ ತಮ್ಮ ಗಮನಕ್ಕೆ ಈಗಾಗಲೇ ಬಂದಿರುತ್ತದೆ. ಬೀದಿ ನಾಯಿಗಳು ಕ್ರೀಡಾಂಗಣದಲ್ಲಿ ಒಳ ನುಸುಳದಂತೆ  ಕೂಡಲೇ  ಸೂಕ್ತ ಕ್ರಮ  ಕೈಗೊಳ್ಳಬೇಕು. ಈ ಮೇಲೆ ವಿವರಿಸಿದಂತೆ, ಆರ್‌.ಎನ್ ಶೆಟ್ಟಿ ಕ್ರೀಡಾಂಗಣಕ್ಕೆ ಸಕಲ ಮೂಲಭೂತ ಸೌಲಭ್ಯಗಳನ್ನು ಒದಗಿಸಬೇಕೆಂದು ಧಾರವಾಡ ಜನ ಜಾಗೃತಿ ಅಭಿಯಾನವು ತಮ್ಮಲ್ಲಿ ವಿನಂತಿಸಿ ಮನವಿ ಸಲ್ಲಿಸಲಾಯಿತು. ಈ ಸಂದರ್ಭದಲ್ಲಿ ಹಿರಿಯ ವಕೀಲರಾದ ಎಂ ಬಿ ಹುಡೇದ, ಅಕ್ಷಯ ಊರಮುಂದಿನ, ಡಾ. ಮಲ್ಲಿಕಾರ್ಜುನ್, ಶರಣು ಪಾಟೀಲ್ ಇದ್ದರು...