ಧಾರವಾಡ10: ತಾಲೂಕಿನ ಅಮ್ಮಿನಭಾವಿ ಗ್ರಾಮಪಂಚಾಯಿತಿ ಆವರಣ ನಿನ್ನೆ ಮಂಗಳವಾರ ಸಂಜೆ ತೆಂಗು, ಮಾವಿನ ತಳಿರು ತೋರಣಗಳು, ಬಲೂನಗಳು, ಝಗಮಗಿಸುವ ದೀಪಗಳು ಹೀಗೆ ವೈವಿಧ್ಯಮಯ ಅಲಂಕಾರದಿಂದ ಸಿಂಗರಿಸಲ್ಪಟ್ಟಿತ್ತು. ಜಿಲ್ಲಾ ಸ್ವೀಪ್ ಸಮಿತಿಯ ಸಹಯೋಗದಲ್ಲಿ ಸ್ಥಳೀಯ ಗ್ರಾಮಪಂಚಾಯಿತಿಯು ಸಡಗರದಿಂದ ಆಯೋಜಿಸಿದ್ದ ಮತದಾರರ ಜಾಗೃತಿ ಕಾರ್ಯಕ್ರಮದಲ್ಲಿ ಗ್ರಾಮಸ್ಥರು ಅಷ್ಟೇ ಸಂಭ್ರಮದಿಂದ ಭಾಗವಹಿಸಿದ್ದು ವಿಶೇಷವಾಗಿತ್ತು. 

ಧಾರವಾಡ ಕೃಷಿ ವಿಶ್ವವಿದ್ಯಾಲಯದಲ್ಲಿ ವಿಶೇಷವಾಗಿ ಸಿದ್ಧಪಡಿಸಲಾಗಿದ್ದ ಬೃಹತ್ ಸ್ವೀಪ್ ಕೇಕ್ಗಳನ್ನು ಕತ್ತರಿಸಿ, ಸಸಿಗೆ ನೀರೆರೆದು ಮತದಾರರ ಜಾಗೃತಿ ಕಾರ್ಯಕ್ರಮಕ್ಕೆ ಚಾಲನೆ ನೀಡಿದ ಜಿಲ್ಲಾ ಸ್ವೀಪ್ ಸಮಿತಿಯ ಅಧ್ಯಕ್ಷರಾಗಿರುವ ಜಿಲ್ಲಾ ಪಂಚಾಯತ್ ಕಾರ್ಯನಿರ್ವಹಣಾಧಿಕಾರಿ ಡಾ. ಬಿ.ಸಿ. ಸತೀಶ್ ಅವರು,  ಏಪ್ರಿಲ್ 23 ರಂದು ನಾನು ಖಂಡಿತ ಮತದಾನ ಮಾಡುತ್ತೇನೆ. ನೀವೂ ಮತದಾನ ಮಾಡಿ ಎಂದು ಬೃಹತ್ ಪರದೆಯ ಮೇಲೆ ಬರೆದು ಸಹಿ ಹಾಕುವ ಮೂಲಕ ಗ್ರಾಮಸ್ಥರನ್ನು ಸಹಿ ಸಂಗ್ರಹಣಾ ಅಭಿಯಾನದಲ್ಲಿ ಪಾಲ್ಗೊಳ್ಳುವಂತೆ ಪ್ರೋತ್ಸಾಹಿಸಿದರು.

ಜಿಲ್ಲಾ ಸ್ವೀಪ್ ಸಮಿತಿಯು ಜಿಲ್ಲೆಯಾದ್ಯಂತ ಮತದಾನ ಪ್ರಮಾಣವನ್ನು ಉತ್ತಮಪಡಿಸಲು ಈಗಾಗಲೇ ನಿರಂತರವಾಗಿ ನೂರಾರು ಕಾರ್ಯಕ್ರಮಗಳನ್ನು ನಡೆಸುತ್ತಿದೆ. ಗಾಳಿಪಟ ಉತ್ಸವ, ಮೆಹಂದಿ ಅಭಿಯಾನ, ಬೈಕ್ರ್ಯಾಲಿ ಮೊದಲಾದ ಕಾರ್ಯಕ್ರಮಗಳು ಯಶಸ್ವಿಯಾಗಿ ಜರುಗಿವೆ. ಬರುವ ದಿನಗಳಲ್ಲಿ ಇನ್ನಷ್ಟು ವಿಭಿನ್ನ ಕಾರ್ಯಕ್ರಮಗಳನ್ನು ರೂಪಿಸಿರುವ ಸ್ವೀಪ್ ಸಮಿತಿ ಗ್ರಾಮೀಣ ಭಾಗದಲ್ಲಿನ ಹೊಸ ಮತದಾರರು ಹಾಗೂ ಹಿರಿಯ ನಾಗರಿಕರನ್ನು ಮತದಾನದಲ್ಲಿ ಪಾಲ್ಗೊಳ್ಳುವಂತೆ ಮಾಡಲು ಜಾಗೃತಿ ಮೂಡಿಸುತ್ತಿದೆ.

 ಅಮ್ಮಿನಭಾವಿಯ ಹಿರಿಯ ಮತದಾರರಾದ 86 ವರ್ಷದ ಅಂದಾನಪ್ಪ ಯಡಹಳ್ಳಿ, 76 ವರ್ಷದ ಕಲ್ಲಪ್ಪ, 78 ವರ್ಷದ ಶಾಂತಮ್ಮ ಹಾಗೂ ಹೊಸದಾಗಿ ಮತದಾನಕ್ಕೆ ಅರ್ಹತೆ ಪಡೆದಿರುವ ಯುವಮತದಾರರಾದ ಜ್ಯೋತಿ ಮೊರಬದ ಮತ್ತು ಆಂಜನೇಯ ಅವರಿಂದ ಸ್ವೀಪ್ ಕೇಕ್ ಕತ್ತರಿಸಿ ಸಿಹಿ ಹಂಚಿ, ಇವಿಎಂ ವಿವಿಪ್ಯಾಟ್ಗಳ ಬಳಕೆ, ಅಣಕು ಮತದಾನ ಮಾಡಿಸಲಾಯಿತು. 

ಬಿಂದಿಗೆಗಳ ಮೇಲೆ ವರ್ಣರಂಜಿತವಾಗಿ ಲೋಕಸಭಾ ಚುನಾವಣೆ-2019 ಎಂದು ಬರೆದು ಬಲೂನುಗಳನ್ನು ವಿದ್ಯುತ್ ಬಲ್ಬ್ಗಳ ಮಾದರಿಯಲ್ಲಿ ಆಕರ್ಷಕವಾಗಿ ವಿನ್ಯಾಸಗೊಳಿಸಿ ಚುನಾವಣಾ ಆಯೋಗದ ಸಂದೇಶವನ್ನು ಸಾರ್ವಜನಿಕರಿಗೆ ತಲುಪಿಸುವ ಪ್ರಯತ್ನಕ್ಕೆ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಯಿತು. 

ಶಿಕ್ಷಕರಾದ ಎಫ್.ಬಿ. ಕಣವಿ, ರಾಮು ಮೂಲಗಿ, ದೇವರಾಜ ಕಂಬಳಿ, ವೈ.ಎಫ್. ಹೊಸಮನಿ ಮತ್ತಿತರ ಕಲಾವಿದರನ್ನೊಳಗೊಂಡ ತಂಡವು ಜನಪದ ಶೈಲಿಯಲ್ಲಿ ಮತದಾರರ ಜಾಗೃತಿ ಗೀತೆಗಳನ್ನು ಪ್ರಸ್ತುತಪಡಿಸಿತು. ಹೊನ್ನಾಪೂರದ ಪ್ರಭುದೇವ ಪ್ರೌಢಶಾಲೆಯ ಶಿಕ್ಷಕಿಯರ ತಂಡವು ಮಹಾಂತೇಶ ಹುಬ್ಬಳ್ಳಿ ಅವರು ರಚಿಸಿ, ಬಾಬಾಜಾನ ಮುಲ್ಲಾ ರಾಗ ಸಂಯೋಜಿಸಿದ್ದ ಚುನಾವಣಾ ಗೀತೆಗೆ ಲಯಬದ್ಧವಾಗಿ ಹೆಜ್ಜೆ ಹಾಕಿತು. ಶಿಕ್ಷಕ, ಕಲಾವಿದ ಮಹಾದೇವ ಸತ್ತಿಗೇರಿ ಅವರು ನಗೆಹನಿಗಳ ಮೂಲಕ ಗ್ರಾಮಸ್ಥರನ್ನು ಹಿಡಿದಿಟ್ಟರು ಜೊತೆಗೆ ಹಾಸ್ಯದ ಮೂಲಕವೇ ಮತದಾನದ ಮಹತ್ವ ಸಾರುವ ಸಂದೇಶ ಹರಡಿದರು. 

ಕಾರ್ಯಕ್ರಮದಲ್ಲಿ ತಾಲೂಕು ಪಂಚಾಯತ್ ಕಾರ್ಯನಿವರ್ಾಹಕ ಅಧಿಕಾರಿ ಎಸ್.ಎಸ್. ಕಾದ್ರೊಳ್ಳಿ, ಧಾರವಾಡ ಗ್ರಾಮೀಣ ಕ್ಷೇತ್ರಶಿಕ್ಷಣಾಧಿಕಾರಿ ವಿದ್ಯಾ ನಾಡಿಗೇರ, ವಾತರ್ಾ ಮತ್ತು ಸಾರ್ವಜನಿಕ ಸಂಪರ್ಕ ಇಲಾಖೆಯ ಹಿರಿಯ ಸಹಾಯಕ ನಿದರ್ೆಶಕ ಮಂಜುನಾಥ ಡೊಳ್ಳಿನ, ಸ್ವೀಪ್ ರಾಜ್ಯ ಮಟ್ಟದ ತರಬೇತಿದಾರ ಕೆ.ಎಂ. ಶೇಖ್, ಜಿಲ್ಲಾ ಮಟ್ಟದ ತರಬೇತಿದಾರ ಜಿ.ಎನ್. ನಂದನ್, ಗ್ರಾಮ ಪಂಚಾಯತಿ ಅಭಿವೃದ್ಧಿ ಅಧಿಕಾರಿ ಸುರೇಶ್ ಸಿಂಗನಹಳ್ಳಿ, ತಹಶೀಲ್ದಾರ ಪ್ರಕಾಶ್ ಕುದರಿ ಹಾಗೂ ಮತ್ತಿತರರು ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು.