ಬೆಳಗಾವಿ 06: ನಗರದ ಹನುಮಾನಗರದಲ್ಲಿ ಮಹಿಳೆಯ ಕೊರಳಲ್ಲಿಯ ಬಂಗಾರದ ಸರವನ್ನು ಖದೀಮರು ಕಿತ್ತುಕೊಂಡು ಪರಾರಿಯಾದ ಘಟನೆ ನಡೆದಿದೆ. 

ಶುಕ್ರವಾರ ಸಂಜೆ 4.30 ಕ್ಕೆ ಈ ಘಟನೆ ನಡೆದಿದ್ದು, ನಗರದ ವಿಶೇಷವಾಗಿ ಹೊರವಲಯದ ನಾಗರಿಕರು ಬೆಚ್ಚಿ ಬಿದ್ದಿದ್ದಾರೆ.  

ಸಂಜೆ ಮಹಿಳೆಯೊಬ್ಬರು ತಮ್ಮ ಬೈಕ್ ಮೇಲೆ ಹನುಮಾನನಗರದ ಟಿವಿ ಸೆಂಟರ್ ಡಬಲ್ ರಸ್ತೆಯಲ್ಲಿ ನಿಧಾನವಾಗಿ ಹೊರಟಿದ್ದರು. ಮಾಜಿ ಶಾಸಕ ಫಿರೋಜ್ ಸೇಟ್ ಅವರ ನಿವಾಸದ ಬಳಿ ಈ ಮಹಿಳೆಯನ್ನು ಬೆನ್ನಟ್ಟಿ ಬಂದ ಇಬ್ಬರು ಮೋಟರ ಸೈಕಲ್ ಸವಾರರು ಮಹಿಳೆಯ ಕುತ್ತಿಗೆಗೆ ಕೈ ಹಾಕಿ ಸರ ಕಿತ್ತುಕೊಂಡಿದ್ದಾರೆ. ಆಕೆ ಚಿರಾಡಿದಾಗ ಬೈಕ್ ಸವಾರರು 20 ಗ್ರಾಂ ಬಂಗಾರದ ಸರದೊಂದಿಗೆ ಪರಾರಿಯಾಗಿದ್ದಾರೆ.  

ಈ ಬೈಕ್ ಸವಾರರ ಪತ್ತೆಗಾಗಿ ನಗರದ ಪೊಲೀಸರು ವ್ಯಾಪಕ ಬಲೆ ಬೀಸಿದ್ದಾರೆ. ಈ ಹಿಂದೆ ಸಂಜೆ ಮಬ್ಬುಗತ್ತಲಲ್ಲಿ ಅಥವಾ ರಾತ್ರಿ ವೇಳೆ ಹೊರವಲಯಗಳಲ್ಲಿ ಮತ್ತು ದೇವಸ್ಥಾನಗಳ ಬಳಿ ಸರಗಳ್ಳತನ ನಡೆದ ಉದಾಹರಣೆಗಳಿವೆ.  

ಈ ಘಟನೆ ಮಹಿಳೆಯರಲ್ಲಿ ಗಾಬರಿ ಹುಟ್ಟಿಸಿದೆ.