ಪಾಲಬಾವಿ, ಸೆ.23: ಗ್ರಾಮೀಣ ಭಾಗದಲ್ಲಿ ಶಿಕ್ಷಣ ಪಡೆದು ವೈದ್ಯಕೀಯ ಕ್ಷೇತ್ರದಲ್ಲಿ ಸಾಧನೆ ಮಾಡಿರುವ ಹಿಡಕಲ್ಲ ಗ್ರಾಮದ ತೇಜಸ್ವಿನಿ ಹೊಸಟ್ಟಿ ಅವರು ಎಂಬಿಬಿಎಸ್ ಪದವಿಗೆ ಆಯ್ಕೆಯಾಗುವ ಮೂಲಕ ಗ್ರಾಮಕ್ಕೆ ಕೀರ್ತಿ ತಂದಿದ್ದಾರೆ.  ರಾಯಬಾಗ ತಾಲ್ಲೂಕಿನ ಹಿಡಕಲ್ಲ ಗ್ರಾಮದ ಚನ್ನಪ್ಪ ಹೊಸಟ್ಟಿ ಹಾಗೂ ಪ್ರೀತಿಯ ದಂಪತಿಯ ಪುತ್ರಿ ತೇಜಸ್ವಿನಿ, ಗ್ರಾಮದ ಕವಿರತ್ನ ಕಾಳಿದಾಸ ಅನುದಾನಿತ ಕನ್ನಡ ಮಾಧ್ಯಮ ಹಿರಿಯ ಪ್ರಾಥಮಿಕ ಶಾಲೆಯಲ್ಲಿ 1ರಿಂದ 7ನೇ ತರಗತಿವರೆಗೆ ವ್ಯಾಸಂಗ ಮಾಡಿದರು. ನಂತರ ಹಾರೂಗೇರಿ ಪಟ್ಟಣದ ಪ್ರಗತಿ ಪ್ರೌಢಶಾಲೆಯಲ್ಲಿ ಎಸ್‌ಎಸ್‌ಎಲ್ಸಿಯಲ್ಲಿ ಶೇ.96.64 ಅಂಕ ಗಳಿಸಿ ಶಾಲೆಗೆ ಕೀರ್ತಿ ತಂದರು.  

ಹುಬ್ಬಳ್ಳಿಯ ಚೇತನ ಪದವಿ ಪೂರ್ವ ಮಹಾವಿದ್ಯಾಲಯದಲ್ಲಿ ದ್ವಿತೀಯ ಪಿಯುಸಿಯಲ್ಲಿ ಶೇ.97.15 ಅಂಕ ಗಳಿಸಿ ಪ್ರತಿಭಾವಂತ ವಿದ್ಯಾರ್ಥಿನಿಯಾಗಿ ಹೊರಹೊಮ್ಮಿದರು. ಬಳಿಕ 136768 ನೀಟ್ ರ್ಯಾಂಕ್ ಹಾಗೂ 468 ನೀಟ್ ಅಂಕಗಳೊಂದಿಗೆ ಬೆಂಗಳೂರಿನ ಕನಕಪುರ ರಸ್ತೆಯ ಚಂದ್ರಮ ದಯಾನಂದ ಸಾಗರ ವಿಶ್ವವಿದ್ಯಾಲಯದಲ್ಲಿ ಉಚಿತ ಎಂಬಿಬಿಎಸ್ ಸೀಟು ಪಡೆದುಕೊಂಡಿದ್ದಾರೆ.  ತೇಜಸ್ವಿನಿ ಅವರ ಸಾಧನೆಗೆ ಗ್ರಾಮದ ಗುರು-ಹಿರಿಯರು, ಶಿಕ್ಷಣದ ದಾರಿ ತೋರಿದ ಶಿಕ್ಷಕರು ಹಾಗೂ ಹೆತ್ತ ತಂದೆ-ತಾಯಿ ಆಶೀರ್ವದಿಸಿ ಅಭಿನಂದಿಸಿದ್ದಾರೆ.