ಲೋಕದರ್ಶನ ವರದಿ 

ಬೆಳಗಾವಿ 14: ಹೆತ್ತ ತಾಯಿಗೆ ಉತ್ತಮ ಮಗನಾಗಿ, ವಿದ್ಯೆ ಕಲಿಸಿದ ಗುರುವಿಗೆ ವಿಧೇಯ ಶಿಷ್ಯನಾಗಿ, ದೇಶವೇ ಹೆಮ್ಮ ಪಡುವಂತಾ ಪ್ರಜೆಯಾಗಿ ವಿದ್ಯಾರ್ಥಿಗಳು ರೂಪಗೊಳ್ಳಬೇಕು ಎಂದು ನಾಗನೂರು ರುದ್ರಾಕ್ಷಿ ಮಠದ ಡಾ. ಅಲ್ಲಮಪ್ರಭು ಮಹಾಸ್ವಾಮಿಗಳು ಹೇಳಿದರು. 

ಅವರು ಇಂದು ನಾಗನೂರು ರುದ್ರಾಕ್ಷಿ ಮಠದ ಪ್ರಭುದೇವ ಸಭಾಂಗಣದಲ್ಲಿ ಸಿದ್ಧರಾಮೇಶ್ವರ ಸಂಯುಕ್ತ ಪ.ಪೂ. ಕಾಲೇಜಿನ ಪ್ರೌಢಶಾಲಾ ವಿಭಾಗದ ವಾರ್ಷಿಕ ಸ್ನೇಹ ಸಮ್ಮೇಳನದ ಸಾನಿದ್ಯ ವಹಿಸಿ ಅವರು ಆಶೀರ್ವಚನ ನೀಡಿದರು. 

ಮುಂದುವರೆದು ಮಾತನಾಡಿದ ಶ್ರೀಗಳು ತಂದೆ ತಾಯಿಗಳು ನಮ್ಮ ಬದುಕು ರೂಪಿಸಲು ಇಂದು ಕಷ್ಟಪಟ್ಟರೆ, ಭವಿಷ್ಯದಲ್ಲಿ ಅವರನ್ನು ಉತ್ತಮವಾಗಿ ನೋಡಿಕೊಳ್ಳಲು ಬಾಲ್ಯದಲ್ಲೇ ಕಷ್ಟ ಪಟ್ಟು ಓದಿ ಉತ್ತಮ ಜೀವನ ರೂಪಿಸಿಕೊಳ್ಳಬೇಕು ಎಂದರು. 

ಕಾರ್ಯಕ್ರಮದಲ್ಲಿ ಮುಖ್ಯ ಅತಿಥಿಯಾಗಿ ಪಾಲ್ಗೊಂಡಿದ್ದ ಜೆ.ಎನ್‌. ವೈದ್ಯಕೀಯ ಮಹಾವಿದ್ಯಾಲಯದ ಪ್ರದ್ಯಾಪಕ ಹಾಗೂ ಕೆ.ಎಲ್‌.ಇ. ಡಾ. ಪ್ರಭಾಕರ ಕೋರೆ  ಆಸ್ಪತ್ರೆಯ ತಜ್ಞ ವೈದ್ಯ ಡಾ. ಶಿವಾನಂದ ಬುಬನಾಳೆ ಮಾತನಾಡಿ ವಿದ್ಯಾರ್ಥಿಗಳು ಇಂದಿನ ತಂತ್ರಜ್ಞಾನ ಯುಗದಲ್ಲಿ ಎ.ಐ. ಹಾಗು ಚಾಟ್ ಜಿ.ಪಿ.ಟಿ. ಮೂಲಕ ದೊರೆಯುವ ಮಾಹಿತಿಗಳ ಮೇಲೆ ಹೆಚ್ಚು ಅವಲಂಬಿತರಾಗದೇ ಗ್ರಂಥಾಲಯದಲ್ಲಿ ಕುರಿತು ಅಧ್ಯಯನ ಮಾಡಿ ಜ್ಞಾನ ವೃದ್ದಿಸಿಕೊಳ್ಳಬೇಕು ಎಂದರು. ಉತ್ತಮವಾದ ದೇಹಾರೋಗ್ಯವಿದ್ದಲ್ಲಿ ಮಾತ್ರ ಜ್ಞಾನ ಸಂಪಾದನೆಯಾಗುತ್ತದೆ. ವಿದ್ಯಾರ್ಥಿಗಳು ಮೊಬೈಲ್ ಗೇಮ್ ಬಿಟ್ಟು ಮೈದಾನದಲ್ಲಿ ಆಟವಾಡಿ ಆರೋಗ್ಯ ಸುಧಾರಿಸಿಕೊಳ್ಳಬೇಕು ಎಂದರು. 

ಕಾರ್ಯಕ್ರಮದಲ್ಲಿ ಸ್ವಾಗತಿಸಿ ಪ್ರಾಸ್ತಾವಿಕವಾಗಿ ಮಾತನಾಡಿದ ಶಾಲೆಯ ಉಪಪ್ರಾಚಾರ್ಯೆ ಶಿವಲೀಲಾ ಪೂಜಾರ, ಹಣ್ಣಿನಲ್ಲಿರುವ ಬೀಜ ಭೂಮಿಗೆ ಬಿದ್ದು  ಮೊಳಕೆಯೊಡೆದು ಮತ್ತೊಂದು ಹೆಮ್ಮರವಾಗುವಂತೆ ವಿದ್ಯಾರ್ಥಿಗಳು ಜೀವನದಲ್ಲಿ ಬೆಳೆಯುತ್ತೇನೆಂಬ ಆತ್ಮವಿಶ್ವಾಸ ಹೊಂದಿರಬೇಕು ಎಂದರು. 

ವೇದಿಕೆಯ ಮೇಲೆ ಹಳೆ ವಿದ್ಯಾರ್ಥಿಗಳ ಸಂಘದ ಅಧ್ಯಕ್ಷ ಬಸವರಾಜ ರೊಟ್ಟಿ, ಸಂಸ್ಕೃತ ಪಾಠಶಾಲೆಯ ಪ್ರಾಚಾರ್ಯ ವಿ.ಎಸ್‌. ಹಿರೇಮಠ, ಶಾಲಾ ಪ್ರಧಾನಿ ಶ್ರವಣ ಕೋರಿಶೆಟ್ಟಿ ಉಪಸ್ಥಿತರಿದ್ದರು. 

ಶಿಕ್ಷಕ ಆರ್‌. ಎಲ್‌. ಸಜ್ಜನ ವರದಿ ವಾಚಿಸಿದರು. ಸಾಂಸ್ಕೃತಿಕ ವಿಭಾಗದ ಮುಖ್ಯಸ್ಥ ಮನೋಹರ ಉಳ್ಳಾಗಡ್ಡಿ ನಿರೂಪಿಸಿದರು. ಪ್ರಿಯಾ ಪಾಚಂಗಿ ಪರಿಚಯಿಸಿದರು. ಕೊನೆಗೆ ಸಂದೇಶ ಮಠ ವಂದಿಸಿದರು.