ಬೆಳಗಾವಿ 09: ಸಂಜೀವಿನಿ ಕಾಳಜಿ ಕೇಂದ್ರವು ಪರಿಪೂರ್ಣ ಕುಟುಂಬವಾಗಿದ್ದು, ಐದು ವರ್ಷಗಳ ಪ್ರೇರಣಾದಾಯಕ ಹಾಗೂ ಪ್ರಶಂಸನೀಯ ಪಯಣ, ಹೃದಯಪೂರ್ವಕವಾಗಿ ಕೆಲಸ ಮಾಡುವ ಸಿಬ್ಬಂದಿ ಮತ್ತು ತನ್ನ ಹೆಸರಿನಂತೆ ರೋಗಿಗಳ ಬದುಕಿಗೆ ಸಂಜೀವಿನಿ ನೀಡುವ ಸಂಸ್ಥೆಯಾಗಿ ಗುರುತಿಸಿಕೊಂಡಿದೆ ಎಂದು ಉಗಾರ ಸಕ್ಕರೆ ಕಾರ್ಖಾನೆಯ ಪ್ರಮುಖರಾದ ಹಾಗೂ ಅತಿಥಿಯಾಗಿ ಆಗಮಿಸಿದ ಸ್ಮಿತಾ ಶಿರಗಾವ್ಕರ್ ಅಭಿಪ್ರಾಯಪಟ್ಟರು. ಸವಾಲುಗಳನ್ನು ಸ್ವೀಕರಿಸಿದಾಗ ಅಥವಾ ಅವುಗಳನ್ನು ಎದುರಿಸಿದಾಗ ಜೀವನ ಹೆಚ್ಚು ಶಕ್ತಿಶಾಲಿಯಾಗುತ್ತದೆ; ಅದೇ ಕಾರ್ಯವನ್ನು ಈ ತಂಡ ಮಾಡುತ್ತಿದೆ ಎಂದು ಅವರು ಹೇಳಿದರು.ಸಂಜೀವಿನಿ ಫೌಂಡೇಶನ್‌ನ ಕುಟುಂಬ ಸ್ನೇಹಸಮ್ಮೇಳನ ಹಾಗೂ ಐದನೇ ವಾರ್ಷಿಕೋತ್ಸವದ ಅಂಗವಾಗಿ ಆಯೋಜಿಸಿದ ಕಾರ್ಯಕ್ರಮ ಭಾರೀ ಉತ್ಸಾಹದಲ್ಲಿ ನೆರವೇರಿತು.

ಈ ಸಂದರ್ಭದಲ್ಲಿ ಅವರು ಮಾತನಾಡಿದರು.ಇನ್ನೊಬ್ಬ ಪ್ರಮುಖ ಅತಿಥಿಯಾದ ಜಯಭಾರತ್ ಫೌಂಡೇಶನ್ ವ್ಯವಸ್ಥಾಪಕ ಬಸನಗೌಡ ಪಾಟೀಲ ಸಂಸ್ಥೆಯ ಕಾರ್ಯವನ್ನು ಶ್ಲಾಘಿಸಿ, “ಒಂದು ಸಂಸ್ಥೆಯನ್ನು ಸ್ಥಾಪಿಸುವುದು ಸುಲಭ, ಆದರೆ ಅದನ್ನು ನಿರಂತರವಾಗಿ ನಡೆಸಿ ಸಮಾಜಮುಖಿ ಕಾರ್ಯ ಮಾಡುವುದು ಅತ್ಯಂತ ಸವಾಲಿನದ್ದು. ಆ ಸವಾಲನ್ನು ಸ್ವೀಕರಿಸಿ ಸಂಜೀವಿನಿ ತಂಡ ಮಹತ್ವದ ಕಾರ್ಯ ಮಾಡುತ್ತಿದೆ” ಎಂದು ಹೇಳಿ ಶುಭಾಶಯ ಕೋರಿದರು.ಕಾರ್ಯಕ್ರಮದ ಆರಂಭವನ್ನು ಶೋಭಾ ಕುಲಕರ್ಣಿ ಅವರು ಹಾಡಿದ ಗಣಪತಿ ಭಕ್ತಿಗೀತೆಯೊಂದಿಗೆ ಮಾಡಲಾಯಿತು. ಗಣ್ಯರ ಕೈಯಲ್ಲಿ ದೀಪಪ್ರಜ್ವಲನೆ ಮೂಲಕ ಉದ್ಘಾಟನೆ ನಡೆಯಿತು. ಪ್ರಸ್ತಾವಿಕದಲ್ಲಿ ಸಂಸ್ಥಾಪಕಿ ಡಾ. ಸವಿತಾ ದೇಗಿನಾಳ ಅವರು ಐದು ವರ್ಷಗಳ ಪಯಣದ ಸಮಗ್ರ ಅವಲೋಕನ ನೀಡಿದರು. ಅತಿಥಿಗಳ ಸ್ವಾಗತ ಹಾಗೂ ಪರಿಚಯವನ್ನು ಸಂಜೀವಿನಿ ಪೊತ್ದಾರ್ ಮಾಡಿದರು.ಪ್ರಮುಖ ಅತಿಥಿಗಳಿಗೆ ಕಾಳಜಿ ಕೇಂದ್ರದಲ್ಲಿ ತಯಾರಿಸಿದ ನ್ಯಾಪ್ಕಿನ್ ಬುಕೆ, ಸ್ಮರಣಿಕೆ ಮತ್ತು ತಿನಿಸು ನೀಡಿ ಗೌರವಿಸಲಾಯಿತು. ಸ್ಮಿತಾ ಶಿರಗಾವ್ಕರ್ ಅವರನ್ನು ಡಾ. ಸವಿತಾ ದೇಗಿನಾಳ ಅವರು ಹಾಗೂ ಬಸನಗೌಡ ಪಾಟೀಲರನ್ನು ಅಧ್ಯಕ್ಷ ಮದನ್ ಬಾಮಣೆ ಅವರು ಸನ್ಮಾನಿಸಿದರು.ಸಂಜೀವಿನಿ ಫೌಂಡೇಶನ್‌ಗೆ ಐದು ವರ್ಷಗಳು ಪೂರ್ಣಗೊಂಡ ಹಿನ್ನೆಲೆಯಲ್ಲಿ ಅತಿಥಿಗಳು, ಸದಸ್ಯರು, ಕುಟುಂಬಸ್ಥರು ಮತ್ತು ಸಿಬ್ಬಂದಿ ಸೇರಿ ಕೇಕ್ ಕತ್ತರಿಸಿದರು.ನಂತರ ವಾರ್ಷಿಕ ಕ್ರೀಡಾ ಸ್ಪರ್ಧೆಯ ವಿಜೇತರಿಗೆ ಪ್ರಮಾಣಪತ್ರಗಳನ್ನು ಡಾ. ಚಂದ್ರಶೇಖರ ಇ.ಟಿ., ಡಾ. ಅನಿಲ್ ಪೋಟೆ, ಡಾ. ರವೀಂದ್ರ ಅನಗೋಳ, ಡಾ. ತೃಪ್ತಿ ಪೋಟೆ, ಸೌರಭ ಪೋಟೆ, ಸನ್ನಿ ಕಾಂಬಳೆ, ಭಾಗ್ಯಶ್ರೀ ಕಾಂಬಳೆ, ಸಿ.ವಿ. ಕುಲಕರ್ಣಿ, ಆಸಾವರಿ ಭೋಕರೇ, ಡಾ.ನವೀನಾ ಶೆಟ್ಟಿಗಾರ್, ಪ್ರೀತಿ ಚೌಗುಲೆ, ರೇಖಾ ಬಾಮಣೆ ಮತ್ತು ವಿದ್ಯಾ ಸರ್ನೋಬತ್ ಅವರಿಂದ ವಿತರಿಸಲಾಯಿತು.ಕುಟುಂಬ ಸ್ನೇಹಸಮ್ಮೇಳನದ ಮುಖ್ಯ ಆಕರ್ಷಣೆಯಾಗಿ ಕಾಳಜಿ ಕೇಂದ್ರದ ಸದಸ್ಯರ ನೃತ್ಯ ಪ್ರದರ್ಶನ ಗಮನಸೆಳೆಯಿತು. ವಿವಿಧ ಹಾಡುಗಳಿಗೆ ವಯೋವೃದ್ಧರು ನೀಡಿದ ನೃತ್ಯಕ್ಕೆ ಪ್ರೇಕ್ಷಕರು ಭರ್ಜರಿ ಮೆಚ್ಚುಗೆ ವ್ಯಕ್ತಪಡಿಸಿದರು. ಮನೋವೈದ್ಯಕೀಯ ವಿಭಾಗದ ಸದಸ್ಯರೂ ಕೂಡ ತಮ್ಮ ಪ್ರದರ್ಶನದಿಂದ ಎಲ್ಲರ ಮನ ಗೆದ್ದರು. ಕೊನೆಯಲ್ಲಿ ಸಿಬ್ಬಂದಿ ನೀಡಿದ ಉತ್ಸಾಹಭರಿತ ನೃತ್ಯ ಕಾರ್ಯಕ್ರಮಕ್ಕೆ ಮತ್ತಷ್ಟು ರಂಗು ತುಂಬಿತು.ಅಧ್ಯಕ್ಷೀಯ ಭಾಷಣದಲ್ಲಿ ಅಧ್ಯಕ್ಷ ಮದನ ಬಾಮಣೆ ಎಲ್ಲ ವಿಜೇತರಿಗೆ ಅಭಿನಂದನೆ ಸಲ್ಲಿಸಿ, ಕಳೆದ ತಿಂಗಳೀಡೀ ಕಾರ್ಯಕ್ರಮ ಯಶಸ್ವಿಗೊಳಿಸಲು ಶ್ರಮಿಸಿದ ಎಲ್ಲರನ್ನೂ ಪ್ರಶಂಸಿಸಿದರು. ದಾನಿಗಳ ಸಹಕಾರಕ್ಕೆ ಕೃತಜ್ಞತೆ ಸಲ್ಲಿಸಿ, ಮುಂದಿನ ಎರಡು ವರ್ಷಗಳಲ್ಲಿ ಸ್ವಂತ ಕಟ್ಟಡದಲ್ಲಿ ಕಾಳಜಿ ಕೇಂದ್ರವನ್ನು 200 ಹಾಸಿಗೆಗಳವರೆಗೆ ವಿಸ್ತರಿಸುವ ಯೋಜನೆ ಇರುವುದಾಗಿ ತಿಳಿಸಿದರು.ಕಾರ್ಯಕ್ರಮವನ್ನು ತೇಜಸ್ವಿನಿ ಸೋಮಸಾಳೆ ನಿರೂಪಿಸಿದರು, ಸಾಗರಿಕಾ ವಂದಿಸಿದರು.  

ಕಾರ್ಯಕ್ರಮಕ್ಕೆ ಕುಟುಂಬಸ್ಥರು, ಹಿತೈಷಿಗಳು ಮತ್ತು ಅನೇಕ ಗಣ್ಯರು ಉಪಸ್ಥಿತರಿದ್ದರು.ಒಟ್ಟಾರೆ ಸಂಜೀವಿನಿ ಕುಟುಂಬ ಸ್ನೇಹಸಮ್ಮೇಳನ ಆತ್ಮೀಯತೆ ಮತ್ತು ಉತ್ಸಾಹದ ವಾತಾವರಣದಲ್ಲಿ ಯಶಸ್ವಿಯಾಗಿ ನೆರವೇರಿತು.