ವಿಜಯಪುರ 21: ನಿವೃತ್ತ ಬ್ಯಾಂಕ್ ನೌಕರರ ಪಿಂಚಣಿಯನ್ನು ಕೂಡಲೇ ವೈಜ್ಞಾನಿಕವಾಗಿ ಪರಿಷ್ಕರಣೆ ಮಾಡಿ ನ್ಯಾಯ ಒದಗಿಸಬೇಕು, ಇಲ್ಲವಾದರೆ ಹೋರಾಟ ಅನಿವಾರ್ಯ ಎಂದು ಅಖಿಲ ಭಾರತ ಬ್ಯಾಂಕ್ ನಿವೃತ್ತರ ಒಕ್ಕೂಟದ ರಾಷ್ಟ್ರೀಯ ಜಂಟಿ ಪ್ರಧಾನ ಕಾರ್ಯದರ್ಶಿ ವಿಶ್ವನಾಥ ನಾಯಕ ಕರೆ ನೀಡಿದರು. 

ಪಿಡಿಜೆ ಮಹಾವಿದ್ಯಾಲಯದ ಸಭಾಂಗಣದಲ್ಲಿ ನಡೆದ ಅಖಿಲ ಭಾರತ ಬ್ಯಾಂಕ್ ನಿವೃತ್ತರ ಒಕ್ಕೂಟದ ವಿಜಯಪುರ ಜಿಲ್ಲಾ ಘಟಕದ ಕಾರ್ಯಕಾರಿ ಸಮಿತಿ ಸಭೆಯಲ್ಲಿ ಮಾತನಾಡಿದ ಅವರು, 1993ರಲ್ಲಿಯೇ ರಿಸರ್ವ ಬ್ಯಾಂಕಿನ ಮಾದರಿಯಲ್ಲಿಯೇ ಉಳಿದ ಬ್ಯಾಂಕ್ ನೌಕರರಿಗೆ ಪಿಂಚಣಿ ಕೊಡುವುದಾಗಿ ಕೇಂದ್ರ ಸರ್ಕಾರ ಒಪ್ಪಂದ ಮಾಡಿಕೊಂಡಿತ್ತು, ಆದರೆ ಕಳೆದ 30 ವರ್ಷಗಳಿಂದ ಕ್ಷುಲಕ ಕಾರಣಗಳಿಂದ ನಿವೃತ್ತ ನೌಕರರ ಪಿಂಚಣಿಯನ್ನು ಪರಿಷ್ಕರಣೆಯನ್ನೇ ಮಾಡಿಲ್ಲ, ಇದು ನೌಕರರಿಗೆ ದೊಡ್ಡ ಅನ್ಯಾಯವಾಗಿದೆ ಎಂದರು.  

ಈ ಹಿನ್ನೆಲೆಯಲ್ಲಿ ನಿವೃತ್ತ ಸೈನಿಕರ ಸಂಘಟನೆ ಮಾದರಿಯಲ್ಲಿಯೇ ಹೋರಾಟದ ಹಾದಿ ತುಳಿದು ಬೇಡಿಕೆ ಈಡೇರಿಸಿಕೊಳ್ಳಲು ನಮ್ಮ ಸಂಘಟನೆ ಬದ್ಧವಾಗಿದೆ ಎಂದರು. 

ವಿವಿಧ ಬ್ಯಾಂಕುಗಳಲ್ಲಿ ಹೇರಳ ಪ್ರಮಾಣದಲ್ಲಿ ಪಿಂಚಣಿ ನಿಧಿ ಅಸ್ತಿತ್ವದಲ್ಲಿದೆ, ಆದರೂ ಸಹ ಸರ್ಕಾರಗಳು ಪಿಂಚಣಿ ಪರಿಷ್ಕರಣೆ ಮಾಡದೇ ಅನ್ಯಾಯ ಮಾಡಿವೆ ಎಂದರು.  

ಎಐಬಿಆರ್‌ಎಫ್ ಸಂಘಟನೆಯ ಪ್ರಧಾನ ಕಾರ್ಯದರ್ಶಿ ಎಂ.ಎಸ್‌. ಭಟ್ ಮಾತನಾಡಿ, ಪಿಂಚಣಿ ಪರಿಷ್ಕರಣೆಯಂತಹ ನ್ಯಾಯಯುತ ಬೇಡಿಕೆಗಳ ಜೊತೆಗೆ ಉಳಿದ ನ್ಯಾಯಯುತ ಬೇಡಿಕೆಗಳನ್ನು ಈಡೇರಿಸಿಕೊಳ್ಳಲು ಸಂಘಟಿತ ಹೋರಾಟ ಅಗತ್ಯ ಎಂದರು.  

ಒಕ್ಕೂಟದ ಜಿಲ್ಲಾಧ್ಯಕ್ಷ ವಿಠ್ಠಲ ಕಾಳೆ ಅಧ್ಯಕ್ಷತೆ ವಹಿಸಿದ್ದರು.  

ಎಐಬಿಆರ್‌ಎಫ್ ಉಪ ಮುಖ್ಯ ಕಾರ್ಯದರ್ಶಿ ಅಜಯಕುಮಾರ, ವಿವಿಧ ಬ್ಯಾಂಕಗಳ ನಿವೃತ್ತ ನೌಕರರ ಸಂಘದ ಪದಾಧಿಕಾರಿಗಳಾದ ಸುಹಾಸ ದೇಶಪಾಂಡೆ, ಬಿ. ನವೀನಕುಮಾರ, ಜಯರಾಮ, ಜೆ.ಜೆ. ಗಾಂಧಿ, ಮಲ್ಲಿಕಾರ್ಜುನ ಮುದನೂರ, ಜಿಲ್ಲಾ ಘಟಕದ ಕಾರ್ಯದರ್ಶಿ ಸಿ.ಎ. ಗಂಟೆಪ್ಪಗೋಳ, ಮಹಾದೇವ ಹಾಲಳ್ಳಿ ಉಪಸ್ಥಿತರಿದ್ದರು. 

ಹಿರಿಯರಾದ ಎಸ್‌.ಆರ್‌. ಮುರಾಳ, ಅಶೋಕ ಇನಾಮದಾರ, ಮೋಹನ ಪಾಟೀಲ ಅವರನ್ನು ಸನ್ಮಾನಿಸಲಾಯಿತು