ಬೆಳಗಾವಿ 18: ನಗರದ ರಾಮದೇವ ಗಲ್ಲಿಯಲ್ಲಿರುವ ಬಂಗಾರದ ಅಂಗಡಿಯಲ್ಲಿ ನಡೆದಿದ್ದ ಕಳ್ಳತನ ಪ್ರಕರಣವನ್ನು ಖಡೇಬಜಾರ್ ಪೊಲೀಸರು ಕ್ಷಿಪ್ರ ಹಾಗೂ ಸಮರ್ಥ ತನಿಖೆಯ ಮೂಲಕ ಭೇದಿಸಿದ್ದಾರೆ. ತನಿಖೆಯಲ್ಲಿ, ಅಂಗಡಿಯ ಮಾಲೀಕನೇ ತಾನೇ ಕಳ್ಳತನ ನಡೆಸಿ ಬಳಿಕ ಅಪರಿಚಿತರು ಕಳ್ಳತನ ಮಾಡಿದ್ದಾರೆ ಎಂದು ಸುಳ್ಳು ದೂರು ದಾಖಲಿಸಿರುವುದು ಬೆಳಕಿಗೆ ಬಂದಿದೆ.  

ತಿಲಕವಾಡಿಯ ಸಾವರ್ಕರ್ ರಸ್ತೆಯ ನಿವಾಸಿ ಕೃಷ್ಣಾನಂದ ವಿಶ್ವನಾಥ ವೇರ್ಣೇಕರ ಅವರು ಜುಲೈ 17ರಂದು ಖಡೇಬಜಾರ್ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿ, ಜುಲೈ 16ರ ರಾತ್ರಿ ರಾಮದೇವ ಗಲ್ಲಿಯಲ್ಲಿರುವ ತಮ್ಮ ವಿ.ಪಿ. ವೇರ್ಣೇಕರ ್ಘ ಸನ್ಸ್‌ ಬಂಗಾರದ ಅಂಗಡಿಯ ಬಾಗಿಲು ಮುರಿದು ದುಷ್ಕರ್ಮಿಗಳು ಬಂಗಾರ, ಬೆಳ್ಳಿ ಆಭರಣಗಳು ಹಾಗೂ ನಗದು ಕಳವು ಮಾಡಿದ್ದಾರೆ ಎಂದು ಆರೋಪಿಸಿದ್ದರು.  

ದೂರಿನ ಆಧಾರದಲ್ಲಿ ಪೊಲೀಸರು ಅಪರಾಧ ಸಂಖ್ಯೆ 74/2026 ಅಡಿ ಬಿಎನ್‌ಎಸ್‌-2023ರ ಕಲಂ 331(4) ಹಾಗೂ 305(ಎ) ಅನ್ವಯ ಪ್ರಕರಣ ದಾಖಲಿಸಿ ತನಿಖೆ ಆರಂಭಿಸಿದರು.  ಘಟನಾ ಸ್ಥಳದ ಪರೀಶೀಲನೆ, ತಾಂತ್ರಿಕ ಮಾಹಿತಿ ಹಾಗೂ ಇತರೆ ಸಾಕ್ಷ್ಯಾಧಾರಗಳ ಪರೀಶೀಲನೆಯ ವೇಳೆ ದೂರುದಾರನ ಮೇಲೆಯೇ ಪೊಲೀಸರಿಗೆ ಅನುಮಾನ ಮೂಡಿತು. ಬಳಿಕ ನಡೆಸಿದ ವಿಚಾರಣೆಯಲ್ಲಿ ಕೃಷ್ಣಾನಂದ ವೇರ್ಣೇಕರನೇ ಅಂಗಡಿಯಲ್ಲಿದ್ದ ಬಂಗಾರ, ಬೆಳ್ಳಿ ಆಭರಣಗಳು ಹಾಗೂ ನಗದು ಹಣವನ್ನು ತೆಗೆದುಕೊಂಡು ತನ್ನ ಕೆಎ-22/ಇಡಬ್ಲ್ಯೂ-4822 ಸಂಖ್ಯೆಯ ಆ್ಯಕ್ಟಿವಾ ಸ್ಕೂಟಿಯ ಡಿಕ್ಕಿಯಲ್ಲಿ ಸಾಗಿಸಿರುವುದಾಗಿ ಒಪ್ಪಿಕೊಂಡಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ.  

ಆರೋಪಿಯಿಂದ 519.8 ಗ್ರಾಂ ಬಂಗಾರದ ಆಭರಣಗಳು, 31 ಗ್ರಾಂ ಬೆಳ್ಳಿಯ ಆಭರಣಗಳು, ?2,83,010 ನಗದು ಹಾಗೂ ಕೃತ್ಯಕ್ಕೆ ಬಳಸಿದ ಸ್ಕೂಟಿ ಸೇರಿದಂತೆ ಒಟ್ಟು 65.95 ಲಕ್ಷ ಮೌಲ್ಯದ ಸ್ವತ್ತನ್ನು ಪೊಲೀಸರು ವಶಪಡಿಸಿಕೊಂಡಿದ್ದಾರೆ.  ದೂರುದಾರನೇ ಪ್ರಕರಣದ ಆರೋಪಿ ಎಂಬುದು ದೃಢಪಟ್ಟ ಹಿನ್ನೆಲೆಯಲ್ಲಿ ಆತನ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳಲಾಗಿದ್ದು, ತನಿಖೆ ಪೂರ್ಣಗೊಳಿಸಿ ನ್ಯಾಯಾಲಯಕ್ಕೆ ದೋಷಾರೋಪಣಾ ಪತ್ರ ಸಲ್ಲಿಸಲಾಗುವುದು ಎಂದು ಪೊಲೀಸರು ತಿಳಿಸಿದ್ದಾರೆ.