ವಿಜಯಪುರ 11: ನಗರದ ಬಿ.ಎಲ್‌.ಡಿ.ಇ. ಸಂಸ್ಥೆಯ ಎಂಜಿನಿಯರಿಂಗ್ ಮತ್ತು ತಾಂತ್ರಿಕ ಮಹಾವಿದ್ಯಾಲಯದ ಎಂ.ಬಿ.ಎ. ವಿಭಾಗ, ಆರ್ಯನ್ ಡಿಜಿಟಲ್ ಲ್ಯಾಬ್ ಹಾಗೂ ನಿಕಾನ್ ಸ್ಕೂಲ್ ಇಂಡಿಯಾ ಸಹಯೋಗದಲ್ಲಿ ನಿಕಾನ್ ಮಿರರ್ಲೆಸ್ ಕ್ಯಾಮೆರಾ ತಂತ್ರಜ್ಞಾನ ಕುರಿತು ವಿಶೇಷ ಕಾರ್ಯಾಗಾರವನ್ನು ಜುಲೈ 14ರಂದು ಬೆಳಿಗ್ಗೆ 10.30ರಿಂದ ಮಧ್ಯಾಹ್ನ 3.30ರವರೆಗೆ ಕಾಲೇಜಿನ ಸಭಾಂಗಣದಲ್ಲಿ ಆಯೋಜಿಸಲಾಗಿದೆ.  

ಕಾರ್ಯಾಗಾರದಲ್ಲಿ ನಿಕಾನ್ನ ಅತ್ಯಾಧುನಿಕ ಮಿರರ್ಲೆಸ್ ಕ್ಯಾಮೆರಾಗಳ ತಂತ್ರಜ್ಞಾನ, ಪ್ರಾಯೋಗಿಕ ಬಳಕೆ, ಕ್ಯಾಮೆರಾ ನಿರ್ವಹಣೆ, ಆಟೋಫೋಕಸ್ ವ್ಯವಸ್ಥೆ, ಲೆನ್ಸ್‌ ಆಯ್ಕೆ, ವಿಡಿಯೋಗ್ರಫಿ ಹಾಗೂ ಡಿಜಿಟಲ್ ಕಂಟೆಂಟ್ ಕ್ರಿಯೇಷನ್ ಕುರಿತು ತಜ್ಞರಿಂದ ಸಮಗ್ರ ಮಾಹಿತಿ ನೀಡಲಾಗುತ್ತದೆ. ಜೊತೆಗೆ, ಆಧುನಿಕ ಇಮೇಜಿಂಗ್ ತಂತ್ರಜ್ಞಾನ ಮತ್ತು ವಿಜುವಲ್ ಸ್ಟೋರಿಟೆಲಿಂಗ್  ಕುರಿತ ಪ್ರಾಯೋಗಿಕ ತರಬೇತಿಯೂ ಇರಲಿದೆ.  

ನಿಕಾನ್ ಸ್ಕೂಲ್ ಇಂಡಿಯಾದ ತಜ್ಞರು ಹಾಗೂ ಖ್ಯಾತ ಛಾಯಾಗ್ರಾಹಕರು ಕಾರ್ಯಾಗಾರವನ್ನು ನಡೆಸಿಕೊಡಲಿದ್ದು, ವನ್ಯಜೀವಿ, ವಾಣಿಜ್ಯ ಮತ್ತು ಸೃಜನಾತ್ಮಕ ಛಾಯಾಗ್ರಹಣ ಕ್ಷೇತ್ರಗಳಲ್ಲಿನ ತಮ್ಮ ಅನುಭವಗಳನ್ನು ಹಂಚಿಕೊಳ್ಳಲಿದ್ದಾರೆ. ಭಾಗವಹಿಸುವವರಿಗೆ ಇತ್ತೀಚಿನ ಮಿರರ್ಲೆಸ್ ಕ್ಯಾಮೆರಾಗಳನ್ನು ನೇರವಾಗಿ ಬಳಸುವ ಅವಕಾಶವೂ ಕಲ್ಪಿಸಲಾಗಿದೆ.  ಛಾಯಾಗ್ರಹಣದಲ್ಲಿ ಆಸಕ್ತಿ ಹೊಂದಿರುವ ವಿದ್ಯಾರ್ಥಿಗಳು, ಛಾಯಾಗ್ರಹಣ ಪ್ರೇಮಿಗಳು, ಕಂಟೆಂಟ್ ಕ್ರಿಯೇಟರ್ಗಳು ಹಾಗೂ ಸೃಜನಶೀಲ ಕ್ಷೇತ್ರದಲ್ಲಿ ತೊಡಗಿಸಿಕೊಳ್ಳಲು ಬಯಸುವವರಿಗೆ ಈ ಕಾರ್ಯಾಗಾರವು ಉಪಯುಕ್ತವಾಗಲಿದೆ.