ದೇವರಹಿಪ್ಪರಗಿ  18 : ಮಾನವ  ದೈಹಿಕವಾಗಿ ಸಬಲನಾಗಿ ಎಲ್ಲ ರೀತಿಯಲ್ಲಿ ಮಾನಸಿಕ ಸಾಮರ್ಥ್ಯವನ್ನು ಹೊಂದಿದ್ದರೂ ಅದನ್ನು ಸದುಪಯೋಗ ಪಡಿಸಿಕೊಳ್ಳುವಲ್ಲಿ ವಿಫಲನಾಗುತ್ತಾನೆ.  ಆದರೆ ಪ್ರಾಣಿಗಳ ಮಾತ್ರ ತಮ್ಮ ಶಕ್ತಿ  ತೋರುವಲ್ಲಿ ಎಂದೂ?ಹಿಂದೆ ಬಿದ್ದಿಲ್ಲ.ಅದಕ್ಕೆ ಪ್ರತ್ಯಕ್ಷ ಸಾಕ್ಷಿ ತಾಲ್ಲೂಕಿನ  ಕೋರವಾರ ಗ್ರಾಮದ ಅಶೋಕ ನಾಯಕಲ್ ಅವರು ಶುಕ್ರವಾರ ತಮ್ಮ ಜೋಡಿ ಎತ್ತುಗಳು 20 ಎಕರೆ ಜಮೀನು 8ತಾಸಿನಲ್ಲಿ ಹೋಗಿ  ಮರಳಿದ್ದು  ಗ್ರಾಮದಲ್ಲಿ ಹೊಸ ದಾಖಲೆ ಮಾಡಿ ಭಲೆ ಜೋಡಿ ಎತ್ತುಗಳು ಎನಿಸಿಕೊಂಡಿವೆ.

ಅಶೋಕ ನಾಯಕಲ್ ಎಂಬುವವರ ಎತ್ತುಗಳ ತಮ್ಮ ಹೊಲದಲ್ಲಿ ಬೆಳಿಗ್ಗೆ  7.30ರಿಂದ  ಮಧ್ಯಾಹ್ನ 3 ಗಂಟೆಯಷ್ಟೊತ್ತಿಗೆ ನಿರಂತರ ಕುಂಟೆಗಳನ್ನು ಹೆಗಲೇರಿಸಿಕೊಂಡು  20 ಎಕರೆ ಭೂಮಿಯಲ್ಲಿ  ಹೊಡೆದದ್ದು ನಿಜಕ್ಕೂ ತಾಲ್ಲೂಕಿನಾದ್ಯಂತ ಚರ್ಚೆಗೆ ಗ್ರಾಸವಾಗಿದೆ.  ಸಾಮಾನ್ಯವಾಗಿ  ಜೋಡಿ ಎತ್ತುಗಳು  ದಿನಕ್ಕೆ  ಐದು ಎಕರೆ  ಕುಂಟೆ ಹೊಡೆಯುತ್ತವೆ.ಹೆಚ್ಚೆಂದರೆ  8ರಿಂದ 10 ಎಕರೆ  ಎಡೆ ಹೊಡೆಯಲು ಸಾಧ್ಯ. ಆದರೆ ಈ ಎತ್ತುಗಳು ಅದರ ದ್ವಿಗುಣ ರೀತಿಯಲ್ಲಿ ಅಂದರೆ 20 ಎಕರೆ ಜಮೀನಿನಲ್ಲಿ ಕುಂಟೆ ಹೊಡೆದು  ಭಲೆ ಜೋಡಿ ಎನಿಸಿಕೊಂಡಿವೆ.ಎತ್ತುಗಳ  ಸಾಧನೆ ಕಂಡು ಗ್ರಾಮಸ್ಥರು ಗುಲಾಲ ಎರಚಿ ಗ್ರಾಮದಲ್ಲಿ ಎತ್ತುಗಳ ಮೆರವಣಿಗೆ ಮಾಡುವ ಮೂಲಕ ತೀವ್ರ ಹರ್ಷ ವ್ಯಕ್ತಪಡಿಸಿದರು.