ರಬಕವಿ-ಬನಹಟ್ಟಿ 21 : ನೆರೆಯ ಭೂತಾನ್ ದೇಶದಲ್ಲಿ ಇತ್ತೀಚೆಗೆ ನಡೆದ ಮೊದಲನೇ ಜೂನಿಯರ್ ಅಟ್ಯಾ-ಪಟ್ಯಾ ಚಾಂಪಿಯನ್ಶಿಪ್ ನಲ್ಲಿ ಭಾರತ ತಂಡವನ್ನು ಪ್ರತಿನಿಧಿಸಿ, ದೇಶಕ್ಕೆ ಚಿನ್ನದ ಪದಕ ತಂದುಕೊಟ್ಟ ತಾಲೂಕಿನ ಮಾದಿಗ ಸಮುದಾಯದ ಹೆಮ್ಮೆಯ ಪುತ್ರ ಸುಹಾನ ರಾಕೇಶ್ ನಡುವಿನಮನಿ ಗೆ ರಬಕವಿ-ಬನಹಟ್ಟಿ ನಗರದ ಮಾದಿಗ ಸಮಾಜದ ಗುರುಹಿರಿಯರು ಹಾಗೂ ಯುವಕರು ಸೇರಿ ಆತ್ಮೀಯವಾಗಿ ಸನ್ಮಾನಿಸಿ ಗೌರವಿಸಿದರು.ಅಂತರರಾಷ್ಟ್ರೀಯ ಮಟ್ಟದಲ್ಲಿ ಚಿನ್ನದ ಪದಕ ಗೆಲ್ಲುವ ಮೂಲಕ ಸುಹಾನ ಕೇವಲ ರಬಕವಿ-ಬನಹಟ್ಟಿ ತಾಲೂಕಿಗೆ ಮಾತ್ರವಲ್ಲದೆ, ಇಡೀ ಭಾರತ ದೇಶಕ್ಕೆ ಹಾಗೂ ತಮ್ಮ ಸಮುದಾಯಕ್ಕೆ ಅಪಾರ ಕೀರ್ತಿಯನ್ನು ತಂದಿದ್ದಾರೆ. ಸಮುದಾಯದ ವತಿಯಿಂದ ಸನ್ಮಾನ ಮತ್ತು ಹರಕೆ: ಸುಹಾನ ಅವರ ಈ ಐತಿಹಾಸಿಕ ಸಾಧನೆಯನ್ನು ಸಂಭ್ರಮಿಸಿದ ಊರಿನ ಪ್ರಮುಖರು ಹಾಗೂ ಯುವಕರು, "ನಮ್ಮ ಭಾಗದ ಗ್ರಾಮೀಣ ಪ್ರತಿಭೆಯೊಂದು ಇಂದು ಜಾಗತಿಕ ಮಟ್ಟದಲ್ಲಿ ದೇಶದ ಧ್ವಜವನ್ನು ಎತ್ತಿ ಹಿಡಿದಿರುವುದು ಹೆಮ್ಮೆಯ ಸಂಗತಿ. ಸುಹಾನ ಮುಂಬರುವ ದಿನಗಳಲ್ಲಿ ದೇಶಕ್ಕಾಗಿ ಇನ್ನೂ ಹೆಚ್ಚಿನ ಚಿನ್ನದ ಪದಕಗಳನ್ನು ಮುಡಿಗೇರಿಸಿಕೊಳ್ಳಲಿ, ಅವರ ಕ್ರೀಡಾ ಪಯಣಕ್ಕೆ ನಮ್ಮ ಸಮಾಜದ ಸಂಪೂರ್ಣ ಬೆಂಬಲವಿದೆ" ಎಂದು ಹಾರೈಸಿದರು.