ಲೋಕದರ್ಶನ ವರದಿ 

ಬೆಳಗಾವಿ ಜು 06: ಗ್ರಾಮೀಣ ಪ್ರದೇಶದ ವಿದ್ಯಾರ್ಥಿಗಳು, ಮಹಿಳೆಯರು, ಹಿರಿಯ ನಾಗರಿಕರು ಹಾಗೂ ಸಾರ್ವಜನಿಕರಿಗೆ ಮಳೆ, ಬಿಸಿಲು ರಕ್ಷಣೆ ಒದಗಿಸುವ ಉದ್ದೇಶದಿಂದ ನಿರ್ಮಿಸಲಾದ ಆಧುನಿಕ ಬಸ್ ತಂಗುದಾಣಗಳನ್ನು ಶಿಂಧೋಳಿ ಮತ್ತು ಬಡಾಲ ಅಂಕಲಗಿ ಗ್ರಾಮಗಳಲ್ಲಿ ಸೋಮವಾರ ಉದ್ಘಾಟಿಸಲಾಯಿತು.   ರಾಜ್ಯಸಭೆಯ ಮಾಜಿ ಸಂಸದ ಈರಣ್ಣ ಕಡಾಡಿ ಅವರು ಸಂಸದರ ಸ್ಥಳೀಯ ಪ್ರದೇಶಾಭಿವೃದ್ಧಿ ಯೋಜನೆ ನಿಧಿಯಿಂದ ನಿರ್ಮಿಸಲಾದ ಬಸ್ ತಂಗುದಾಣಗಳನ್ನು ಉದ್ಘಾಟಿಸಿ ಮಾತನಾಡಿದರು.  

"ಜನರ ಬೇಡಿಕೆಗಳಿಗೆ ಅನುಗುಣವಾಗಿ ಸಂಸದರ ನಿಧಿಯನ್ನು ಸಂಪೂರ್ಣ ಪಾರದರ್ಶಕವಾಗಿ ಅಗತ್ಯ ಕಾಮಗಾರಿಗಳಿಗೆ ಬಳಸಲಾಗಿದೆ. ಅಭಿವೃದ್ಧಿ ಕಾಮಗಾರಿಗಳು ಕೇವಲ ಕಾಗದದಲ್ಲೇ ಉಳಿಯದೆ ಜನರಿಗೆ ನೇರ ಪ್ರಯೋಜನವಾಗಬೇಕು. ಮುಂದೆಯೂ ಗ್ರಾಮೀಣ ಮೂಲಸೌಕರ್ಯ ಅಭಿವೃದ್ಧಿಗೆ ನನ್ನ ಬೆಂಬಲ ನಿರಂತರವಾಗಿರಲಿದೆ" ಎಂದು ಹೇಳಿದರು.  

ಬಿಜೆಪಿ ಬೆಳಗಾವಿ ಗ್ರಾಮೀಣ ಮಂಡಲದ ಮಾಜಿ ಅಧ್ಯಕ್ಷ ಧನಂಜಯ ಜಾಧವ ಮಾತನಾಡಿ, "ಶಿಂಧೋಳಿ ಮತ್ತು ಬಡಾಲ ಅಂಕಲಗಿ ಗ್ರಾಮಗಳ ಸಾರ್ವಜನಿಕರು ಹಾಗೂ ಶಾಲಾ- ಕಾಲೇಜ ವಿದ್ಯಾರ್ಥಿಗಳು ಸೂಕ್ತ ಬಸ್ ತಂಗುದಾಣದ ಕೊರತೆಯಿಂದ ಮಳೆ ಮತ್ತು ಬಿಸಿಲಿನಲ್ಲಿ ತೊಂದರೆ ಅನುಭವಿಸುತ್ತಿದ್ದರು. ಈ ಸಮಸ್ಯೆಗೆ ತಕ್ಷಣ ಸ್ಪಂದಿಸಿದ ಈರಣ್ಣ ಕಡಾಡಿ ಅವರು ಸಂಸದರ ನಿಧಿಯಿಂದ ಅನುದಾನ ಮಂಜೂರು ಮಾಡಿ ಆಧುನಿಕ ತಂಗುದಾಣಗಳನ್ನು ನಿರ್ಮಿಸಿದ್ದಾರೆ. ಸಾರ್ವಜನಿಕರು ಈ ಆಸ್ತಿಯನ್ನು ಸ್ವಚ್ಛವಾಗಿ ಕಾಪಾಡಿಕೊಂಡು ಸದ್ಬಳಕೆ ಮಾಡಿಕೊಳ್ಳಬೇಕು" ಎಂದು ಮನವಿ ಮಾಡಿದರು.  

ಈರಣ್ಣ ಕಡಾಡಿ ಅವರ ಕಾರ್ಯವೈಖರಿಯನ್ನು ಶ್ಲಾಘಿಸಿದ ಅವರು, "ಅನುದಾನ ಮಂಜೂರು ಮಾಡುವುದಷ್ಟೇ ಅಲ್ಲದೆ, ಕಾಮಗಾರಿಗಳ ಗುಣಮಟ್ಟ ಹಾಗೂ ಸಮಯಕ್ಕೆ ಪೂರ್ಣಗೊಳ್ಳುವಿಕೆಯನ್ನು ಸ್ವತಃ ಮೇಲ್ವಿಚಾರಣೆ ಮಾಡುವುದು ಅವರ ವಿಶೇಷತೆ" ಎಂದು ಹೇಳಿದರು.  ಕಾರ್ಯಕ್ರಮದಲ್ಲಿ ಸತೀಶ್ ಶಹಾಪೂರಕರ, ಬಾಬಾಗೌಡ ಪಾಟೀಲ, ಪಿರಾಜಿ ಅನಗೋಳಕರ, ಸವಿತಾ ಮುಚ್ಚಂಡಿ, ಪಿರಾಜಿ ಕಣಬರಗಿ, ಮರೆಪ್ಪ ಶಹಾಪೂರಕರ, ಅಶೋಕ ಚಾಪಗಾಂವ, ಪಿಂಟು ಕಮತಗಿ, ರಮೇಶ್ ಕಲಂಬಾವಿ, ಬಸವರಾಜ ಕಮತಗಿ, ರಾಹುಲ್ ಬೆಳಗಾವಿ, ಶಿವಪ್ಪ ಬೆಳಗಾವಿ, ರಮೇಶ್ ಸೇರಿದಂತೆ ಸ್ಥಳೀಯ ಮುಖಂಡರು, ಕಾರ್ಯಕರ್ತರು ಹಾಗೂ ಗ್ರಾಮಸ್ಥರು ಉಪಸ್ಥಿತರಿದ್ದರು.