ಸಿರುಗುಪ್ಪ, 17: ಸಿರುಗುಪ್ಪ ತಾಲೂಕಿನ ಮುಸ್ಲಿಂ ಬಾಂಧವರು ಪವಿತ್ರ ಉಮ್ರಾ ಯಾತ್ರೆ ಕೈಗೊಂಡು ಸೋಮವಾರ ಬೆಂಗಳೂರಿನ ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಮೂಲಕ ಸೌದಿ ಅರೇಬಿಯಾದ ಮೆಕ್ಕಾ ಹಾಗೂ ಮದೀನಾ ನಗರಗಳತ್ತ ಪ್ರಯಾಣ ಬೆಳೆಸಿದರು. ಯಾತ್ರಾರ್ಥಿಗಳನ್ನು ಬೀಳ್ಕೊಡಲು ಕುಟುಂಬಸ್ಥರು, ಬಂಧು-ಬಳಗ, ಸ್ನೇಹಿತರು ಹಾಗೂ ಸಮುದಾಯದ ಹಿರಿಯರು ಆಗಮಿಸಿ ಶುಭ ಹಾರೈಸಿದರು. ಯಾತ್ರೆಯು ಸುಗಮವಾಗಿ ನೆರವೇರಲಿ ಹಾಗೂ ಎಲ್ಲರೂ ಕ್ಷೇಮವಾಗಿ ಮರಳಲಿ ಎಂದು ಪ್ರಾರ್ಥಿಸಿದರು.  

ಯಾತ್ರಾರ್ಥಿಗಳು ಮೆಕ್ಕಾದ ಮಸ್ಜಿದ್ ಅಲ್ ಹರಾಮ್‌ನಲ್ಲಿ ಪವಿತ್ರ ಕಅಬಾಕ್ಕೆ ತವಾಫ್ ಹಾಗೂ ಸಈ ಸೇರಿದಂತೆ ಧಾರ್ಮಿಕ ವಿಧಿವಿಧಾನಗಳನ್ನು ನೆರವೇರಿಸಲಿದ್ದು, ಬಳಿಕ ಮದೀನಾದ ಮಸ್ಜಿದ್ ಅನ್ ನಬವಿಗೆ ಭೇಟಿ ನೀಡಿ ಪ್ರಾರ್ಥನೆ ಸಲ್ಲಿಸಲಿದ್ದಾರೆ.  

ಉಮ್ರಾ ಯಾತ್ರೆಯು ಆತ್ಮಶುದ್ಧಿ, ದೇವಭಕ್ತಿ, ತಾಳ್ಮೆ ಹಾಗೂ ಮಾನವೀಯ ಮೌಲ್ಯಗಳನ್ನು ಬೆಳೆಸುವ ಪವಿತ್ರ ಪಯಣವಾಗಿದ್ದು, ಯಾತ್ರಾರ್ಥಿಗಳಿಗೆ ಆಧ್ಯಾತ್ಮಿಕ ನೆಮ್ಮದಿ ಹಾಗೂ ಮನಃಶಾಂತಿ ದೊರೆಯಲಿ ಎಂದು ಸಮುದಾಯದ ಹಿರಿಯರು ಹಾರೈಸಿದರು.  ಗಚ್ಛಿನ ಮನೆ ಮೆಹಬೂಬ್ ಭಾಷಾ, ಸರ್ವರ್ ಭಾಷಾ, ರಸೂಲ್ ಬೀ, ಜಮಾಲ್ ರಂಜಾನ್ ಸಾಬ್, ಜಮಾಲಮ್ಮ ಸೇರಿದಂತೆ ಹಲವರು ಉಮ್ರಾ ಯಾತ್ರೆಗೆ ತೆರಳಿದ್ದಾರೆ.