ಲೋಕದರ್ಶನ ವರದಿ 

ರಜೆ: ಮುಂಚಿತವಾಗಿ ಶಾಲೆಯಲ್ಲಿ ದೀಪಾವಳಿ ಆಚರಣೆ 

ಮಹಾಲಿಂಗಪುರ 21: ಸ್ಥಳೀಯ ಕೆಎಲ್‌ಇ ಸಂಸ್ಥೆಯ ಎಸ್‌ಸಿಪಿ ಪ್ರಾಥಮಿಕ ಶಾಲೆಯಲ್ಲಿ ದೀಪಾವಳಿ ಮುನ್ನವೇ ಹಬ್ಬ ಆಚರಿಸಿ ಸಂಭ್ರಮಿಸಿದರು. ಭಾನುವಾರದಿಂದ ಬುಧವಾರ ತನಕ ಶಾಲೆಗೆ ರಜೆ ಇದ್ದುದರಿಂದ ಮಕ್ಕಳಲ್ಲಿ ಹಬ್ಬದ ಕ್ರಮ ಮತ್ತು ಸಂಭ್ರಮ ಗೊತ್ತಾಗಲಿ ಎಂಬ ಕಾರಣಕ್ಕಾಗಿ ಶನಿವಾರ ದಿನವೇ ಶಾಲೆಯಲ್ಲಿ ಮಹಾಲಕ್ಷ್ಮೀ ಪೂಜಾ ಕಾರ್ಯಕ್ರಮ ಹಮ್ಮಿಕೊಳ್ಳಲಾಯಿತು.  

 ವಿದ್ಯಾರ್ಥಿಗಳು ಲಂಗ ದಾವಣಿ, ಸೀರೆಯುಟ್ಟು ಹರ್ಷದಿಂದ ಶಾಲೆಗೆ ತೆರಳಿ ತರಗತಿಗಳನ್ನೆಲ್ಲಾ ತಳಿರು-ತೋರಣಗಳಿಂದ ಅಲಂಕರಿಸಿ, ಅಂಗಳದಲ್ಲಿ ರಂಗೋಲಿ ಹುಯ್ದು, ಕಬ್ಬು-ಬಾಳೆಗಿಡದಿಂದ ಮಂಟಪ ಸಿದ್ದಪಡಿಸಿ, ಲಕ್ಷ್ಮೀ ಭಾವಚಿತ್ರಕ್ಕೆ ಪೂಜೆ ಸಲ್ಲಿಸಿದರು. ಶಿಕ್ಷಕಿಯರು ಮತ್ತು ವಿದ್ಯಾರ್ಥಿನಿಯರು ವಿವಿಧ ಅಂಗ ಸಂಸ್ಥೆಗಳ ಸಿಬ್ಬಂದಿಗೆ ಸಂಪ್ರದಾಯದಂತೆ ಕುಂಕುಮ ಹಚ್ಚಿ ಪೂಜಾ ಕಾರ್ಯಕ್ರಮಕ್ಕೆ ಆಹ್ವಾನಿಸಿದರು. ಎಲ್ಲ ಅಂಗ ಸಂಸ್ಥೆಗಳ ಮುಖ್ಯಸ್ಥರು ಕಾರ್ಯಕ್ರಮದಲ್ಲಿ ಭಾಗಿಯಾಗಿ ಪ್ರಸಾದ ರೂಪದಲ್ಲಿ ಸಿಹಿ ಮತ್ತು ಬಾದಾಮಿ ಹಾಲು ಸವಿದರು.