ಸಿಂದಗಿ 19:  ಪಟ್ಟಣದ ಊರಿನ ಹಿರಿಯ ಮಠದ ಲಿಂ. ಪೂಜ್ಯ  ಶಾಂತವೀರ ಪಟ್ಟಾಧ್ಯಕ್ಷರ 46 ನೇ ಸ್ಮರಣೋತ್ಸವ ಹಾಗೂ ಗದುಗಿನ ತೊಂಟದಾರ್ಯ ಮಠದ ಲಿಂ. ಪೂಜ್ಯ ಜಗದ್ಗುರು ಡಾ. ತೊಂಟದ ಸಿದ್ದಲಿಂಗ ಮಹಾಸ್ವಾಮಿಗಳ 8 ನೇ ಗುರು ಸ್ಮರಣೆ ಸಮಾರಂಭವು ಫೆ.20 ರಿಂದ ಫೆ.27 ರ ವರೆಗೆ ಪ್ರತಿದಿನ ಸಂಜೆ 7 ಗಂಟೆಗೆ ಊರಿನಹಿರಿಯ ಮಠದಲ್ಲಿ ಜರುಗಲಿದೆ. ಫೆ.20 ರಂದು ಜಂಜೆ 7 ಗಂಟೆಗೆ ಊರಿನಹಿರಿಯ ಮಠದ ಪೀಠಾಧ್ಯಕ್ಷರಾದ ಪೂಜ್ಯ  ಶಿವಾನಂದ ಶಿವಾಚಾರ್ಯರ ಅಧ್ಯಕ್ಷತೆಯಲ್ಲಿ ಪುರಾಣ ಪ್ರವಚನ ಉದ್ಘಾಟನೆ ನಡೆಯಲಿದೆ. 

                  ಫೆ.22 ರಂದು ರವಿವಾರ ಬೆಳಗ್ಗೆ 10 ಗಂಟೆಯಿಂದ ಮಧ್ಯಾಹ್ಹ್‌ 4 ಗಂಟಯವರೆಗೆ ನೇತ್ರ, ಎಲುಬು ಕೀಲು ಮತ್ತು ಚರ್ಮ ರೋಗಕ್ಕೆ ಸಂಬಂಧಿಸಿದ ಉಚಿತ ವೈದ್ಯಕೀಯ ತಪಾಸಣಾ ಶಿಬಿರ ನಡೆಯಲಿದ್ದು ವಿಜಯಪುರದ ಅನುಗ್ರಹ ಕಣ್ಣಿನ ಆಸ್ಪತ್ರೆಯ ಡಾ.ಪ್ರಭುಗೌಡ ಪಾಟೀಲ ಅವರು ನೇತ್ರ ತಪಾಸಣೆ ಮತ್ತು ಶಸ್ತ್ರ ಚಿಕಿತ್ಸೆಯನ್ನು, ಸಿಂದಗಿಯ ಈಶಾ ಆಸ್ಪತ್ರೆಯ ಡಾ.ವಿವೇಕ ನಿಡೋಣಿ ಅವರು ಮೂಳೆ ಮತ್ತು ಕೀಲುಗಳಿಗೆ ಸಂಬಂಧಿಸಿದ ಚಿಕಿತ್ಸೆಯನ್ನು ಹಾಗೂ ಡಾ.ನಿಖಿತಾ ಶಹಾಪೂರ ಅವರು ಚರ್ಮ ರೋಗಕ್ಕೆ ಸಂಬಂಧಿಸಿದ ಚಿಕಿತ್ಸೆಯನ್ನು ಉಚಿತವಾಗಿ ನೀಡಲಿದ್ದಾರೆ. ಅಂದು ಸಂಜೆ 7 ಗಂಟೆಗೆ ಆಲಮೇಲದ ಪ್ರಗತಿಪರ ರೈತ ಸುನೀಲ ನಾರಾಯಣಕರ ಅವರು ಜೀವನ ಶೈಲಿ ಮತ್ತು ಆಹಾರ ಪದ್ದತಿಯ ಬಗ್ಗೆ ಉಪನ್ಯಾಸ ನೀಡಲಿದ್ದಾರೆ. 

            ಫೆ.23 ರಂದು ಸಂಜೆ 7 ಶಿಕ್ಷಕ ಎಂ.ಬಿ.ಅಲ್ದಿ ಅವರು ರಚಿಸಿದ ಲಿಂ ಶಾಂತವೀರ ಪಟ್ಟಾಧ್ಯಕ್ಷರ ಧ್ವನಿ ಸುರಳಿ ಬಿಡುಗಡೆ ಹಾಗೂ ಗಾನ-ಕುಂಚ-ನ್ಯತ್ಯ ಸಮಾರಂಭ ನೆರವೇರಲಿದೆ. ಫೆ.24 ರಂದು ಸಂಜೆ 7 ಗಂಟೆಗೆ ಡಾ.ಸೀಮಾ ವಾರದ ಮತ್ತು ನಾಗರತ್ನ ಮನಗೂಳಿ ಅವರು ಮಹಿಳಾ ಜಾಗೃತಿಯ ಬಗ್ಗೆ ಉಪನ್ಯಾಸ ನೀಡಲಿದ್ದಾರೆ. ಫೆ.25 ರಂದು ಶಿವಾನುಭವ ಮಂಟಪದ ನೂತನ ಪ್ರಾಂಗಣದ ಉದ್ಘಾಟನೆಯನ್ನು ಶಾಸಕ ಅಶೋಕ ಮನಗೂಳಿ ಉದ್ಘಾಟನೆ ನೆರವೇರಿಸಲಿದ್ದಾರೆ. ಅಂದು ಸಿಂದಗಿಯ ಆದರ್ಶ ಶಿಕ್ಷಕ ಎಚ್‌.ಟಿ.ಕುಲಕರ್ಣಿ ಗುರುಗಳಿಗೆ ಶಾಂತಸಿರಿ ಪ್ರಶಸ್ತಿ ಪ್ರದಾನ ನೆರವೇರಲಿದೆ.

              ಫೆ.26 ರಂದು ಬೆಳಗ್ಗೆ 7 ಗಂಟೆಗೆ ಲಿಂ ಶಾಂತವೀರ ಪಟ್ಟಾಧ್ಯಕ್ಷರ ರಜತ ಮೂರ್ತಿಗೆ ರುದ್ರಾಭಿಷೇಕ ಹಾಗೂ ರಾಜೋಪಚಾರ ಪೂಜೆ ನಡೆಯಲಿದೆ. ಅಂದು ಸಂಜೆ 7 ಗಂಟೆಗೆ ಗದುಗಿನ ತೊಂಟದಾರ್ಯ ಮಠದ ಲಿಂ ಪೂಜ್ಯ ಜಗದ್ಗುರು ಡಾ. ತೊಂಟದ ಸಿದ್ದಲಿಂಗ ಮಹಾಸ್ವಾಮಿಗಳ ಗುರು ಸ್ಮರಣೆಯು ಸೊನ್ನ ದಾಸೋಹ ವಿರಕ್ತಮಠದ ಪೂಜ್ಯ  ಡಾ.ಶಿವಾನಂದ ಮಹಾಸ್ವಾಮಿಗಳ ಸಾನಿಧ್ಯದಲ್ಲಿ ಜರುಗಲಿದೆ. ಫೆ.27 ರಂದು ಬೆಳಗ್ಗೆ 8 ಗಂಟೆಗೆ ಲಿಂ ಶಾಂತವೀರ ಪಟ್ಟಾಧ್ಯಕ್ಷರ ರಜತ ಮೂರ್ತಿಯ ಮೆರವಣಿಗೆ ಜರುಗಲಿದೆ. ಅಂದು ಸಂಜೆ 7 ಗಂಟೆಗೆ ನಾಡಿನ ಅನೇಕ ಹರಗುರು ಚರಮೂರ್ತಿಗಳ ಸಾನಿಧ್ಯದಲ್ಲಿ ಮಹಾಮಂಗಲೋತ್ಸವ ಜರುಗಲಿದೆ ಎಂದು ಶ್ರೀಮಠ ಪ್ರಕಟಣೆಯಲ್ಲಿ ತಿಳಿಸಿದೆ.