ಸಿಂದಗಿ  14: ಇಂದಿನ ಡಿಜಿಟಲ್ ಯುಗದಲ್ಲಿಯೂ ಗ್ರಂಥಾಲಯ ವಿಜ್ಞಾನದ ಪಿತಾಮಹರಾದ ಡಾ. ಎಸ್‌.ಆರ್‌. ರಂಗನಾಥನ್ ಅವರನ್ನು ನಾವು ಸ್ಮರಿಸಲೇಬೇಕು. ಇಂದಿನ ಆಧುನಿಕ ತಂತ್ರಜ್ಞಾನದ ಯುಗದಲ್ಲಿ ಗ್ರಂಥಾಲಯ ಮತ್ತು ಅಂತರ್ಜಾಲದ ಮೂಲಕ ಜ್ಞಾನವನ್ನು ಗಳಿಸಿಕೊಳ್ಳುತ್ತಿದ್ಧೇವೆ ಎಂದರೆ ಅದು ಗ್ರಂಥಾಲಯದ ಸೇವೆಯಿಂದ ಎಂದು ಸಿ.ಎಂ. ಮನಗೂಳಿ ಕಲಾ, ವಾಣಿಜ್ಯ ಹಾಗೂ ವಿಜ್ಞಾನ ಮಹಾವಿದ್ಯಾಲಯದ ಗ್ರಂಥಪಾಲಕ ಸತೀಶ ಬಿರಾದಾರ ಹೇಳಿದರು. 

ಪಟ್ಟಣದ ಟಿ.ಎಸ್‌.ಪಿ ಮಂಡಳಿ ಸಂಸ್ಥೆಯ ಸಿ.ಎಮ್‌. ಮನಗೂಳಿ ಕಲಾ, ವಾಣಿಜ್ಯ ಹಾಗೂ ವಿಜ್ಞಾನ ಮಹಾವಿದ್ಯಾಲಯದಲ್ಲಿ ಮಂಗಳವಾರ ಡಾ.ಎಸ್‌.ಆರ್‌. ರಂಗನಾಥ ರವರ ಸ್ಮರಣಾರ್ಥ ಹಮ್ಮಿಕೊಂಡ ರಾಷ್ಟ್ರೀಯ ಗ್ರಂಥಪಾಲಕರ ದಿನಾಚರಣೆ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು. 

ಮನುಷ್ಯನ ಸರ್ವತೋಮುಖ ಬೆಳವಣಿಗೆ ಆಗಬೇಕು ಎಂದರೆ ಪುಸ್ತಕಗಳಿಂದ ಮಾತ್ರ ಸಾಧ್ಯ. ಪುಸ್ತಕದ ಮೌಲ್ಯ ಮತ್ತು ಸಾರ್ಥಕ್ಯ ಪಡೆಯಬೇಕಾದರೆ ಗ್ರಂಥಾಲಯಗಳು ಅವಶ್ಯ ಹಾಗೂ ಗ್ರಂಥಪಾಲಕನ ಪಾತ್ರ ಅತೀ ಮಹತ್ವದ್ದಾಗಿದೆ ಎಂದು ಹೇಳಿದರು. 

ಅಧ್ಯಕ್ಷತೆ ವಹಿಸಿದ ಪ್ರಾಚಾರ್ಯ ಬಿ.ಡಿ. ಮಾಸ್ತಿ ಮಾತನಾಡಿ, ಭಾರತದ ಗ್ರಂಥಾಲಯ ವಿಜ್ಞಾನದ ಪಿತಾಮಹರಾದ ಡಾ. ಎಸ್ ಆರ್‌.ರಂಗನಾಥನ್ ಅವರ ಜನ್ಮ ದಿನ ಆಗಸ್ಟ್‌ 12 ರಂದು ಅವರ ಸ್ಮರಣಾರ್ಥ ಗ್ರಂಥಪಾಲಕರ ದಿನಾಚರಣೆ ಆಚರಿಸಲಾಗುತ್ತಿದೆ ಎಂದು ಹೇಳಿದರು. 

ಡಾ.ಅರವಿಂದ ಮನಗೂಳಿ, ಪ್ರೊ.ಎಸ್‌.ಎಮ್‌. ಬಿರಾದಾರ, ಪ್ರೊ.ಎಸ್‌.ಕೆ. ಹೂಗಾರ, ಅಮೀತ ಈಳಗೇರ, ಡಾ.ಚಂದ್ರಕಾಂತ ಪಾಟೀಲ, ವಿ.ಬಿ. ಪಾಟೀಲ, ಎಸ್‌.ಎಮ್‌. ಅರ್ಜುಣಗಿ, ಮಾಳು ಪೂಜಾರಿ, ಸಂತೋಷ ಕುಂಟೋಜಿ ಸೇರಿದಂತೆ ಸಿಬ್ಬಂಧಿ ಹಾಗೂ ವಿದ್ಯಾರ್ಥಿಗಳು ಭಾಗವಹಿಸಿದ್ದರು. 

ಗ್ರಂಥಪಾಲಕ ಸತೀಶ ಬಿರಾದಾರ ಸ್ವಾಗತಿಸಿದರು. ಡಾ.ಅಂಬರೀಶ ಬಿರಾದಾರ ನಿರೂಪಿಸಿದರು. ರಾಹುಲ ಕಾಂಬಳೆ ವಂದಿಸಿದರು.