ಕಾರವಾರ 04: ದಾಂಡೇಲಿ ತಾಲೂಕಾ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷ,  ನಗರಸಭೆಯ ಹಾಲಿ ಸದಸ್ಯ  ಮೋಹನ ಹಲವಾಯಿ ರಸ್ತೆ ಅಪಘಾತದಲ್ಲಿ ತೀವ್ರ ಗಾಯಗೊಂಡ ಘಟನೆ ಮಂಗಳವಾರ ಬೆಳಿಗ್ಗೆ ನಡೆದಿದೆ. 

ತೀವ್ರ ಗಾಯಗೊಂಡ ಅವರನ್ನು  ಧಾರವಾಡದ ಎಸ್‌.ಡಿ.ಎಂ.ಆಸ್ಪತ್ರೆಗೆ ದಾಖಲಿಸಲಾಗಿದೆ.  ದಾಂಡೇಲಿ ನಗರಸಭೆಯ ಸದಸ್ಯ ಮೋಹನ ಹಲವಾಯಿ  ಬೆಳಿಗ್ಗೆ 9-30 ರ ಸುಮಾರಿಗೆ ದಾಂಡೇಲಿಯ ಮುಖ್ಯ ಅಂಚೆ ಕಛೇರಿ ಹತ್ತಿರದ ಬರ್ಚಿ ರಸ್ತೆಯಲ್ಲಿ ಸ್ಕೂಟಿ ಚಲಾಯಿಸಿಕೊಂಡು ಹೋಗುತ್ತಿದ್ದಾಗ ಎದುರಿನಿಂದ ಬಂದ ಟ್ರಾಕ್ಟರ್ ಡಿಕ್ಕಿ ಹೊಡೆದ ಪರಿಣಾಮವಾಗಿ ಟ್ರಾಕ್ಟರ್ ಟೈರ್ ಕೆಳಗೆ ಸ್ಕೂಟಿ ಸಮೇತ ಸಿಲುಕಿದ್ದಾರೆನ್ನಲಾಗಿದೆ. ಅವರ ತಲೆ ಮತ್ತು ಮುಖಕ್ಕೆ ತೀವ್ರ ಸ್ವರೂಪದ ಗಾಯಗಳಾಗಿವೆ, ಕೂಡಲೇ ಸ್ಥಳೀಯರು ಅವರನ್ನು ದಾಂಡೇಲಿಯ  ಸರಕಾರಿ ಆಸ್ಪತ್ರೆಗೆ ದಾಖಲಿಸಿ ಪ್ರಥಮ ಚಿಕಿತ್ಸೆ ಕೊಡಿಸಿದರು. ಗಂಭೀರ ಸ್ವರೂಪದ ಪೆಟ್ಟು ಬಿದ್ದಿರುವ ಹಿನ್ನಲೆಯಲ್ಲಿ ಅವರನ್ನು ಧಾರವಾಡದ ಎಸ್‌.ಡಿ.ಎಂ. ಆಸ್ಪತ್ರೆಗೆ ದಾಖಲಿಸಲಾಗಿದೆ.   

ಅಪಘಾತಕ್ಕೆ  ಕಾರಣವನ್ನು  ಸ್ಥಳೀಯ ಪೋಲಿಸರು ಹುಡುಕುತ್ತಿದ್ದಾರೆ.  ಪ್ರಕರಣ ದಾಖಲಿಸಿಕೊಂಡಿದ್ದು, ಸ್ಥಳ ಪರೀಶೀಲನೆ ನಡೆಸಿ, ತನಿಖೆ ನಡೆಸುತ್ತಿದ್ದಾರೆ.