ಕಾರವಾರ   08: ಯಲ್ಲಾಪುರ  ತಾಲೂಕಿನ ಡೊಮಗೇರಿ ಬಳಿಯ ಕಿರವತ್ತಿಯಲ್ಲಿ ಅಂಗನವಾಡಿ ಸಮೀಪದಲ್ಲಿ ಆಲದಮರ  ನೆಲಕ್ಕುರುಳಿದ ಪರಿಣಾಮ  ಗರ್ಭಿಣಿ ಮಹಿಳೆ ಸಾವನ್ನಪ್ಪಿದ ದುರ್ಘಟನೆ ಇಂದು ನಡೆದಿದೆ. ಈ ಘಟನೆಯಲ್ಲಿ ಮಕ್ಕಳು , ಯುವತಿ ಸೇರಿದಂತೆ ಏಳು ಜನ ಗಾಯಗೊಂಡಿದ್ದಾರೆ.ಐದು ತಿಂಗಳ ಗರ್ಭಿಣಿ ಮಹಿಳೆಸಾವಿತ್ರಿ ಬಾಬು ಖರಾತ್ (28), ಸಾವನ್ನಪ್ಪಿದ್ದಾಳೆ.  

ಘಟನೆಯಲ್ಲಿ ಸ್ವಾತಿ ಬಾಬು ಖರಾತ್ (17), ಘಾಟು ಲಕ್ಕು ಕೊಕರೆ (5), ಶ್ರಾವಣಿ ಬಾಬು ಖರಾತ್ (2), ಶಾಂಭವಿ ಬಾಬು ಖರಾತ್ (4) ಗಂಭೀರವಾಗಿ ಗಾಯವಾಗಿದ್ದರೇ ಸಾನ್ವಿ ಬಾಬು ಕೊಕರೆ (5), ವಿನಯ ಲಕ್ಕು ಕೊಕರೆ (5) ಮತ್ತು ಅನುಶ್ರೀ ಮಾಂಬು ಕೊಕರೆ (5) ಸಣ್ಣಪುಟ್ಟ ಗಾಯಗಳೊಂದಿಗೆ ಪಾರಾಗಿದ್ದಾರೆ

.ಸಾವಿತ್ರಿ ಬಾಬು ಖರಾತ್ ರವರು ಅಂಗನವಾಡಿಯಿಂದ ಮನೆಗೆ ಮರಳುತ್ತಿದ್ದ ವೇಳೆ, ದಾರಿಯಲ್ಲಿದ್ದ ಆಲದ ಮರ ದಿಢೀರ್  ನೆಲಕ್ಕುರುಳಿತು.  ಮರದ ಅಡಿ ಸಿಲುಕಿದ ಸಾವಿತ್ರಿ  ದಾರುಣ ಸಾವು ಕಂಡರು. ಅಂಗನವಾಡಿ ಯಿಂದ ಮನೆಗೆ ಮರಳುತ್ತಿದ್ದ  ಯುವತಿ , ಮಕ್ಕಳು  ಬಿದ್ದ ಆಲದ ಮರದ ಟೊಂಗೆ ಅಡಿ ಸಿಲುಕಿದರು.  ಗಂಭೀರವಾಗಿ  ಗಾಯಗೊಂಡವರನ್ನು ಹುಬ್ಬಳ್ಳಿ ಕಿಮ್ಸ ಆಸ್ಪತ್ರೆಗೆ ಕಳುಹಿಸಲಾಗಿದೆ. ಉಳಿದ ಗಾಯಾಳು ಗಳಿಗೆ ಯಲ್ಲಾಪುರದಲ್ಲಿ ಚಿಕಿತ್ಸೆ ನೀಡಲಾಗುತ್ತಿದೆ. ಇನ್ನು ಆಲದ ಮರ ಬಿದ್ದ ಪರಿಣಾಮ ವಿದ್ಯುತ್ ಕಂಬಗಳು ಸಹ ತುಂಡಾಗಿ ನೆಲಕ್ಕುರುಳಿದೆ. ಘಟನೆ ಸಂಬಂಧ ಯಲ್ಲಾಪುರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.