ಇಸ್ಲಾಮಾಬಾದ್, ಜೂನ್ 29: ಪಾಕಿಸ್ತಾನ್ ಷೇರು  ಮಾರುಕಟ್ಟೆಗೆ ಸೋಮವಾರ ಬೆಳಗ್ಗೆ ಗ್ರೆನೇಡ್ ಎಸೆದ ದಾಳಿಯಲ್ಲಿ  ಇಬ್ಬರು  ನಾಗರಿಕರು ಮೃತಪಟ್ಟಿದ್ದು ಇತರೆ  ನಾಲ್ವರು ಉಗ್ರರನ್ನು ಹತ್ಯೆ ಮಾಡಲಾಗಿದೆ ಎಂದು  ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ.ಕರಾಚಿಯಲ್ಲಿರುವ ಬಿಗಿ ಭದ್ರತೆ ಪ್ರದೇಶದಲ್ಲಿದ್ದ ಸ್ಟಾಕ್ ಎಕ್ಸ್ ಚೇಂಜ್ ಕಟ್ಟಡದೊಳಕ್ಕೆ ಗ್ರೆನೇಡ್ ಎಸೆದು ಉಗ್ರರು, ನಂತರ ಏಕಾಏಕಿ ಗುಂಡಿನ ದಾಳಿ ನಡೆಸಿದರು  ಘಟನೆಯಲ್ಲಿ ಕರ್ತವ್ಯದಲ್ಲಿದ್ದ ಸಬ್ ಇನ್ಸ್ ಪೆಕ್ಟರ್ ಸಹ  ಸಾವನ್ನಪ್ಪಿದ್ದು ಇತರೆ ಹಲವರು ಗಾಯಗೊಂಡಿದ್ದಾರೆಎಂದು ವರದಿಯಾಗಿದೆ.ವರದಿಯ ಪ್ರಕಾರ, ನಾಲ್ವರು ಉಗ್ರರು ದಾಳಿ ನಡೆಸಿದ್ದು, ನಂತರ   ಭದ್ರತಾ ಪಡೆಗಳು ನಾಲ್ವರು ಉಗ್ರರನ್ನು ಹತ್ಯೆಗೈದಿರುವುದಾಗಿ ತಿಳಿಸಿದೆ. ಸದ್ಯ ಭದ್ರತಾ ಪಡೆಗಳು ಪ್ರದೇಶವನ್ನು ಸುತ್ತುವರಿದು ಪರಿಶೀಲನೆ ನಡೆಸುತ್ತಿದ್ದಾರೆ ಎಂದು ವರದಿ ಹೇಳಿದೆ.ಉಗ್ರರು ಪೊಲೀಸ್ ಸಮವಸ್ತ್ರದಲ್ಲಿ ಆಗಮಿಸಿ ದಾಳಿ ನಡೆಸಿದ್ದರು ಎಂದು ಮೂಲಗಳು ತಿಳಿಸಿವೆ. ಪಾಕಿಸ್ತಾನದ ಮಾಧ್ಯಮಗಳ ವರದಿ ಪ್ರಕಾರ, ಪಾಕ್ ಸ್ಟಾಕ್ ಎಕ್ಸ್ ಚೇಂಜ್ ಮೇಲಿನ ದಾಳಿಯ ಹೊಣೆಯನ್ನು ಬಲೂಚ್ ಲಿಬರೇಷನ್ ಆರ್ಮಿ ಹೊತ್ತುಕೊಂಡಿರುವುದಾಗಿ ಹೇಳಲಾಗಿದೆ.