ಲೋಕದರ್ಶನ ವರದಿ  

ಹೂವಿನಹಡಗಲಿ 18:  ಇಲ್ಲಿನ ರಂಗಭಾರತಿ ಮತ್ತು ಕರ್ನಾಟಕ ನಾಟಕ ಅಕಾಡೆಮಿಯ  ಸಹ ಯೋಗದಲ್ಲಿ  2025- 26 ಸಾಲಿನ ಜೀವಮಾನ ಸಾಧನೆ ಗೌರವ ಪ್ರಶಸ್ತಿ, ವಾರ್ಷಿಕ ಪ್ರಶಸ್ತಿ ಹಾಗೂ ದತ್ತಿನಿಧಿ ಪುರಸ್ಕಾರಗಳನ್ನು ಈಗಾಗಲೇ ಪ್ರಕಟಣೆ ಮಾಡಲಾಗಿದ್ದು, ಜೀವಮಾನ ಸಾಧನೆ ಪ್ರಶಸ್ತಿ  ಮತ್ತು ವಾರ್ಷಿಕ ಪ್ರಶಸ್ತಿ ಸೇರಿ 26 ಪ್ರಶಸ್ತಿಗಳನ್ನು ಹಾಗೂ 7 ದತ್ತಿ ಪುರಸ್ಕಾರಗಳನ್ನು ಪ್ರದಾನ ಮಾಡಲಾಗುತ್ತಿದೆ ಎಂದು ರಂಗಭಾರತಿ ಅದ್ಯಕ್ಷೆ ಎಂ.ಪಿ.ಸುಮಾ ವಿಜಯಾ ಹೇಳಿದರು. ಪಟ್ಟಣದಲ್ಲಿ ಬುಧವಾರ ಪತ್ರಿಕಾ ಗೋಷ್ಠಿಯಲ್ಲಿ ಮಾತನಾಡಿ   ಈ ಪ್ರಶಸ್ತಿ ಪ್ರದಾನ ಸಮಾರಂಭ  ಇಲ್ಲಿನ  ರಂಗಭಾರತಿ ರಂಗಮಂದಿರ ದಲ್ಲಿ ಮಾರ್ಚ್‌  22 ರಂದು ಸಂಜೆ 4ಗಂಟೆಗೆ  ಆಯೋಜಿಸಲಾಗಿದೆ.

ಕನ್ನಡ ಮತ್ತು ಸಂಸ್ಕೃತಿ  ಸಚಿವ ಶಿವರಾಜ ಎಸ್‌. ತಂಗಡಗಿ ಅವರು ಸಾಧಕರಿಗೆ ಪ್ರಶಸ್ತಿ ಪ್ರದಾನ ಮಾಡಲಿದ್ದಾರೆ.  ಮುಖ್ಯಮಂತ್ರಿಗಳ ಮಾಧ್ಯಮ ಸಲಹೆಗಾರರಾದ  ಕೆ.ವಿ.ಪ್ರಭಾಕರ್ ಅವರು ಹಾಗೂ ಸಂಸದ ಈ.ತುಕಾರಾಮ ಭಾಗವಹಿಸಲಿದ್ದಾರೆ. ಶಾಸಕ  ಎಲ್‌.ಕೃಷ್ಣ ನಾಯಕ  ಸಮಾರಂಭದ ಅಧ್ಯಕ್ಷತೆಯನ್ನು ವಹಿಸಲಿದ್ದಾರೆ. ಕುವೆಂಪು ಭಾಷಾ ಭಾರತಿ ಪ್ರಾಧಿಕಾರದ ಮಾಜಿ ಅಧ್ಯಕ್ಷ ಡಾ. ಕೆ.ಮರುಳಸಿದ್ಧಪ್ಪ ಅವರು ಪ್ರಶಸ್ತಿ ಸಂಚಿಕೆಯನ್ನು ಅನಾವರಣ ಮಾಡಲಿದ್ದಾರೆ. ಕನ್ನಡ ಮತ್ತು ಸಂಸ್ಕೃತಿ ಕಾರ್ಯದರ್ಶಿ  ಜೆ.ಮಂಜುನಾಥ, ನಿರ್ದೇಶಕ ಡಾ. ಬಿ.ಎಸ್‌.ಮಂಜುನಾಥಸ್ವಾಮಿ,  ರಂಗಭಾರತಿಯ ಅಧ್ಯಕ್ಷರಾದ ಶ್ರೀಮತಿ ಎಂ.ಪಿ.ಸುಮಾ ವಿಜಯ್ ಅವರು ಭಾಗವಹಿಸಲಿದ್ದು,ಕರ್ನಾಟಕ ನಾಟಕ ಅಕಾಡೆಮಿಯ ಅಧ್ಯಕ್ಷರಾದ ಡಾ. ಕೆ.ವಿ.ನಾಗರಾಜಮೂರ್ತಿ ಅವರು ಪ್ರಸ್ತಾವಿಕ ಮಾತನಾಡಲಿದ್ದಾರೆ ಎಂ.ಪಿ.ಸುಮಾವಿಜಯಾ ಹೇಳಿದರು. 

ಕನ್ನಡ ರಂಗಭೂಮಿಯ ಹಿರಿಯ ಚೇತನ. ನಟ. ನಾಟಕಕಾರ, ನಿರ್ದೇಶಕ ಮತ್ತು ಸಂಘಟಕರಾಗಿದ್ದ ಮಾಜಿ ಉಪಮುಖ್ಯಮಂತ್ರಿ  ಎಂ.ಪಿ.ಪ್ರಕಾಶ್ ಅವರ ತವರು ಹೂವಿನಹಡಗಲಿ ನಿರಂತರ ರಂಗ ಚಟುವಟಿಕೆಗಳಿಗೆ ಹೆಸರಾದ ಈ ಕ್ಷೇತ್ರದಲ್ಲಿ ಈ ಪ್ರಶಸ್ತಿ ಪ್ರದಾನ ಸಮಾರಂಭವನ್ನು ಆಯೋಜಿಸುತ್ತಿರುವುದು ಅತ್ಯಂತ ಹೆಮ್ಮೆಯ ಸಂಗತಿಯಾಗಿದೆ. 15 ವರ್ಷಗಳ ಹಿಂದೆ ಇದೇ ಸ್ಥಳದಲ್ಲಿ ಕರ್ನಾಟಕ ನಾಟಕ ಅಕಾಡೆಮಿ ಪ್ರಶಸ್ತಿ ಪ್ರದಾನ ಸಮಾರಂಭವನ್ನು ಆಯೋಜಿಸಿ ಸಾವಿರಾರು ಪ್ರೇಕ್ಷಕರ ಸಮ್ಮುಖದಲ್ಲಿ ಪ್ರಶಸ್ತಿ ಪ್ರದಾನ ಮಾಡಿದ ಸವಿನೆನಪನ್ನು ಈ ಸಂದರ್ಭದಲ್ಲಿ ಸ್ಮರಿಸಿಕೊಂಡರು.ಇದೇ ವೇಳೆ  ವಿಶ್ರಾಂತಿ ಪ್ರಾಚಾರ್ಯರಾದ ಪ್ರೋ.ಶಾಂತಮೂರ್ತಿ ಬಿ.ಕುಲಕರ್ಣಿ, ಉಪನ್ಯಾಸಕ ಸೊಪ್ಪಿನ ಪ್ರಭು, ಸಂತೋಷ ಜೈನ್, ಹನುಮಂತಪ್ಪ ಇದ್ದರು.