ಗದಗ 14 :-  ಅವಳಿ ನಗರವಾದ ಗದಗ ಬೆಟಗೇರಿ ನಗರಸಭೆಯ 20, 23,ಹಾಗೂ 25 ನೇ ಕೂಡು ವಾರ್ಡಗಳ ಮಧ್ಯವರ್ತಿ ಸ್ಥಳವಾದ ಹನಮನ ಗರಡಿ 3 ನೇ ನಂಬರ್ ಶಾಲೆಯ ಹತ್ತಿರದಲ್ಲಿನ ಸಾರ್ವಜನಿಕ ಮೂತ್ರಾಲಯದ ಪಕ್ಕದಲ್ಲಿಯೇ ಬಡಾವಣೆಯ ನಾಗರಿಕರಿಗೆ ತುಂಗಭದ್ರಾ ಕುಡಿಯುವ ನೀರಿನ ಪೂರೈಕೆಯ ವಾಲ್ವ್‌ ಇರುವ ನಿಗದಿತ ಸ್ಥಳದ ಮೇಲೆಯೇ ಕೆಲವೇ ಕೆಲವು ಪ್ರಜ್ಞಾಹೀನ ನಾಗರಿಕರು ತಮ್ಮ ತಮ್ಮ ಮನೆಯಲ್ಲಿ ಸಂಗ್ರಹವಾಗುವ ಕಸವನ್ನು ಅವೈಜ್ಞಾನಿಕವಾಗಿ ಹಾಕುತ್ತಿರುವರು ಇದರಿಂದ ಬಡಾವಣೆ ನಾಗರಿಕರಿಗೆ ರೋಗ ರೂಜಿನಗಳ ಭಯ, ವಿಪರೀತ ಸೊಳ್ಳೆಗಳ ಕಾಟ  ಹಾಗೂ ಬೀಡಾಡಿ ದನಗಳು ಸದರ ಕಸವನ್ನೇ ಸೇವಿಸುತ್ತಿದ್ದವು.  

ಆದರೆ ಕಸ ವಿಲೇವಾರಿಗಾಗಿಯೇ ಎಂದು ಗೌರವಾನ್ವಿತ ಗದಗ ಬೆಟಗೇರಿ ನಗರಸಭೆಯ ವತಿಯಿಂದ ಪೌರ ಕಾರ್ಮಿಕರ ಸಹಕಾರದೊಂದಿಗೆ ಕಸ ವಿಲೇವಾರಿ ವಾಹನದಲ್ಲಿ ಬಡಾವಣೆಯ ಪ್ರತಿಯೊಂದು ಮನೆ ಮನೆಯಿಂದಲೂ ಕಸವನ್ನು ಸಂಗ್ರಹಿಸಿಕೊಂಡು ವಿಲೇವಾರಿ ಮಾಡುವ ಕಾರ್ಯ ನಿರಂತರವಾಗಿ ಜರುಗುತ್ತಿದ್ದರೂ ಪ್ರಜ್ಞಾಹೀನ ನಾಗರಿಕರು ಮಾತ್ರ ಕಸವನ್ನು ಕುಡಿಯುವ ನೀರು ಸರಬರಾಜು ಮಾಡುವ ವಾಲ್ವ್‌ ಮೇಲೆಯೇ ಕಸವನ್ನು ನಿರಾತಂಕವಾಗಿ  ಸುರಿಯುತ್ತಿರುವದನ್ನು ಮನಗಂಡ ಬಡಾವಣೆಯ ಪ್ರಮುಖರಾದ ರಾಘವೇಂದ್ರ ಪಾಲನಕರ ರವರ ನಿರಂತರ ಪರಿಶ್ರಮದ ಮೂಲಕ ಅವೈಜ್ಞಾನಿಕ ಕಸ ವಿಲೇವಾರಿಯನ್ನು ತಡೆಯಲು ಪ್ರಯತ್ನ ಮಾಡಿದರೂ ಕೂಡಾ ಫಲಪ್ರದವಾಗದಿರುವುದನ್ನು ಮನಗಂಡು ಗದಗ ಬೆಟಗೇರಿ ನಗರಸಭೆಯ ಸಹಕಾರದೊಂದಿಗೆ ಬ್ಲಾಕ್ ಸ್ಪಾಟ್ ಗಳಲ್ಲಿ ಮೂರನೇ ಕಣ್ಣು ಎಂದೇ ಖ್ಯಾತವಾಗಿರುವ ಸಿ ಸಿ ಕ್ಯಾಮರಾ ಅಳವಡಿಸುವ ಮೂಲಕ ಬಡಾವಣೆಯಲ್ಲಿ ಅವೈಜ್ಞಾನಿಕವಾಗಿ ಕಸ ವಿಲೇವಾರಿ ಮಾಡುವವರನ್ನು ಗುರುತಿಸಲು ಮುಂದಾಗಿರುವರು. 

ಇದರಿಂದಾಗಿ ಗೊತ್ತುಗುರಿಯಿಲ್ಲದೆ ಎಲ್ಲೆಂದರಲ್ಲಿ ಕಸ ಹಾಕುವವರನ್ನು ಗುರುತಿಸಿ ಅವರ ಕಸ ಅವರ ಮನೆಗೆ ಹಾಗೂ ನಗರಸಭೆ ಪರಿಸರ ವಿಭಾಗದಿಂದ ದಂಡ ವಿಧಿಸುವ ಮೂಲಕ ಅವೈಜ್ಞಾನಿಕವಾಗಿ ಕಸ ವಿಲೇವಾರಿ ಮಾಡುವುದನ್ನು ತಡೆಯಲು ದಿಟ್ಟ ಕ್ರಮಕ್ಕೆ ಮುಂದಾಗಿರುವರು. ಇದಕ್ಕೆ ಸಹಕಾರಪೂರ್ವಕವಾಗಿ  ಸಿ ಸಿ ಕ್ಯಾಮರಾದಿಂದ ಗುರುತಿಸಲ್ಪಟ್ಟ ರಸ್ತೆಯಲ್ಲಿ ಕಸ ಹಾಕುವ ದುರುಳರಿಗೆ ಗದಗ ಬೆಟಗೇರಿ ನಗರಸಭೆಯಿಂದ ದಂಡಮ್ ದಶಗುಣಂ ಅಸ್ತ್ರಕ್ಕೆ ಮುಂದಾಗುವದು ಸ್ವಚ್ಛ ನಗರ ಸುಂದರ ಪರಿಸರಕ್ಕೆ ನಾಂದಿಯಾಗಬೇಕಾಗಿದೆ ಎನ್ನುವದು ಬಡಾವಣೆಯ ನಾಗರಿಕರ ಆಶಯವಾಗಿರುತ್ತದೆ. ಈ ಸಂಧರ್ಭದಲ್ಲಿ ಸಾಮಾಜಿಕ ಕಾರ್ಯಕರ್ತರಾದ ಅಬ್ದುಲ್ ಮುನಾಫ್ ಮುಲ್ಲಾ, ನಗರಸಭೆಯ ವಾಲ್ ಮನ್ ರಾಜು ಆರಟ್ಟಿ, ನಾಗರಾಜ್ ಬೆನಮಟ್ಟಿ ಮತ್ತು ನ್ಯಾಯವಾದಿ ಹಾಗೂ ಸಾಮಾಜಿಕ ಕಾರ್ಯಕರ್ತರಾದ ರಾಘವೇಂದ್ರ ಪಾಲನಕರ ಹಾಗೂ ಬಡಾವಣೆಯ ನಾಗರಿಕರು ಉಪಸ್ಥಿತರಿದ್ದರು.