ಲೋಕದರ್ಶನ ವರದಿ  

ಮುಂಡಗೋಡ 08 :  ಮುಂಜಾನೆ ಸಮಯದಲ್ಲಿ ಮುಂಡಗೋಡ ತಾಲೂಕಿನ ವಿವಿಧ ಪ್ರದೇಶಗಳಲ್ಲಿ ದಟ್ಟ ಇಬ್ಬನಿ ಆವರಿಸಿಕೊಂಡಿದ್ದು, ರಸ್ತೆಗಳು ಮತ್ತು ಸುತ್ತಮುತ್ತಲಿನ ಅರಣ್ಯ ಪ್ರದೇಶಗಳು ಮುಸುಕಿನ ಹೊದಿಕೆಯಲ್ಲಿ ಮರೆಮಾಚಿದಂತ ವಾತಾವರಣ ಕಂಡುಬಂತು. ಬೆಳಗಿನ ವೇಳೆಯಲ್ಲಿ ರಸ್ತೆಯಲ್ಲಿ ಸಾಗುವ ವಾಹನಗಳು ಹಾಗೂ ಮರಗಳು ಇಬ್ಬನಿಯ ಮಂಜಿನಲ್ಲಿ ಕಾಣಿಸಿಕೊಂಡ ದೃಶ್ಯಗಳು ಪ್ರಕೃತಿಯ ಸೌಂದರ್ಯವನ್ನು ಮತ್ತಷ್ಟು ಮೆರೆದವು. ಕೆಲವೆಡೆ ದೃಶ್ಯಮಾನತೆ ಕಡಿಮೆಯಾಗಿದ್ದರಿಂದ ವಾಹನ ಸವಾರರು ಎಚ್ಚರಿಕೆಯಿಂದ ಸಂಚರಿಸುವ ಪರಿಸ್ಥಿತಿ ನಿರ್ಮಾಣವಾಯಿತು. ಕಳೆದ ಕೆಲ ದಿನಗಳಿಂದ ಉಷ್ಣತೆಯ ತಾಪದಿಂದ ಬಳಲುತ್ತಿದ್ದ ಜನರಿಗೆ ಮುಂಜಾನೆ ಕಾಣಿಸಿಕೊಂಡ ಈ ಇಬ್ಬನಿ ಸ್ವಲ್ಪ ತಂಪಿನ ಅನುಭವವನ್ನು ನೀಡಿತು. ಬೆಳಗಿನ ಚಳಿಗಾಳಿ ಹಾಗೂ ಮಂಜಿನ ವಾತಾವರಣದಿಂದ ಪ್ರದೇಶದಲ್ಲಿ ಶಾಂತ ಹಾಗೂ ಸುಂದರ ದೃಶ್ಯಗಳು ಮೂಡಿಬಂದವು. ಸ್ಥಳೀಯರು ಸಹ ಈ ಪ್ರಕೃತಿ ಸೌಂದರ್ಯವನ್ನು ಕಣ್ತುಂಬಿಕೊಳ್ಳುತ್ತಾ ಬೆಳಗಿನ ವಾತಾವರಣವನ್ನು ಆಸ್ವಾದಿಸಿದರು. ಮುಂಡಗೋಡದ ಸುತ್ತಮುತ್ತಲಿನ ಅರಣ್ಯ ಪ್ರದೇಶಗಳಲ್ಲಿ ಈ ರೀತಿಯ ಮುಸುಕು ವಾತಾವರಣ ಹೆಚ್ಚಾಗಿ ಕಾಣಿಸಿಕೊಳ್ಳುವುದು ಸಾಮಾನ್ಯವಾಗಿದ್ದು, ಬೆಳಗಿನ ಸಮಯದಲ್ಲಿ ಮನಮೋಹಕ ದೃಶ್ಯಗಳನ್ನು ಸೃಷ್ಟಿಸುತ್ತದೆ.