ಮುಂಡಗೋಡ 25: ಪಟ್ಟಣದ ತುಕಾರಾಮ ಇಂಗಳೇರ ಅವರ ತೋಟದಲ್ಲಿರುವ ಸುಮಾರು 12 ಅಡಿ ಆಳದ ತೊಟ್ಟಿಯಲ್ಲಿ ವಿಷಕಾರಿ ಕೊಳಕು ಮಂಡಲ ಹಾವು ಸಿಲುಕಿಕೊಂಡಿದ್ದ ಘಟನೆ ಇತ್ತೀಚೆಗೆ ಬೆಳಕಿಗೆ ಬಂದಿದೆ. ತೊಟ್ಟಿಯಲ್ಲಿ ನೀರು ಇಲ್ಲದ ಕಾರಣ ಹಾವು ಹೊರಬರಲು ಸಾಧ್ಯವಾಗದೇ ತೊಟ್ಟಿಯೊಳಗೇ ಅಸಹಾಯಕವಾಗಿ ಸಿಲುಕಿಕೊಂಡಿತ್ತು. ಹಾವು ಯಾವಾಗ ತೊಟ್ಟಿಗೆ ಬಿದ್ದಿದೆ ಎಂಬ ಮಾಹಿತಿ ಲಭ್ಯವಾಗಿಲ್ಲ.  

ಈ ಕುರಿತು ಮಾಹಿತಿ ಪಡೆದ ಮುತ್ತುರಾಜ ಹಳ್ಳಿ, ಗಸ್ತು ಅರಣ್ಯ ಪಾಲಕರು ತಕ್ಷಣವೇ ಸ್ಥಳಕ್ಕೆ ಆಗಮಿಸಿ, ಧೈರ್ಯದಿಂದ ತೊಟ್ಟಿಯೊಳಗೆ ಇಳಿದು ಅಪಾಯಕರ ಕೊಳಕು ಮಂಡಲ ಹಾವನ್ನು ಸುರಕ್ಷಿತವಾಗಿ ರಕ್ಷಿಸಿದರು. ಅದೇ ತೋಟದಲ್ಲಿ ಇನ್ನೊಂದು ಹೆಬ್ಬಾವು ಇರುವ ಮಾಹಿತಿ ದೊರಕಿದ ಹಿನ್ನೆಲೆಯಲ್ಲಿ, ಅರಣ್ಯ ಇಲಾಖೆಯ ಸಿಬ್ಬಂದಿ ಅದನ್ನೂ ಸಹ ಎಚ್ಚರಿಕೆಯಿಂದ ಹಿಡಿದು, ಎರಡೂ ಹಾವುಗಳನ್ನು ಅವುಗಳ ಸ್ವಾಭಾವಿಕ ಆವಾಸಸ್ಥಾನಕ್ಕೆ ಸುರಕ್ಷಿತವಾಗಿ ಬಿಡಲಾಯಿತು.  

ಈ ರಕ್ಷಣಾ ಕಾರ್ಯಾಚರಣೆಯಲ್ಲಿ ಸಮಾಜ ಸೇವಕರು ಹಾಗೂ ಪ್ರಾಣಿ ಪ್ರಿಯರಾದ ನಾಗರಾಜ ಗುಬ್ಬಕ್ಕನವರು ಹಾಗೂ ವಕೀಲರಾದ ಪವನ ತುಕಾರಾಮ ಇಂಗಳೆ ಅವರು ಉಪಸ್ಥಿತರಿದ್ದು, ಅರಣ್ಯ ಸಿಬ್ಬಂದಿಗೆ ಸಹಕಾರ ನೀಡಿದರು.