ಕಾರವಾರ 24:   ಕಾರವಾರ ನಗರದ ಪ್ರಸಿದ್ಧ  ಪಿಕಳೆ ನರ್ಸಿಂಗ್ ಹೋಂ , ಓಷಧ ವಿತರಕರಾಗಿದ್ದ ಫಾರ್ಮಸಿಸ್ಟ್‌  ರಾಜೀವ್ ಪಿಕಳೆ  ಸ್ವಯಂ ಗುಂಡು ಹಾರಿಸಿಕೊಂಡು ಆತ್ಮಹತ್ಯೆ ಮಾಡಿಕೊಂಡ ಪ್ರಕರಣಕ್ಕೆ ಸಂಬಂಧಿಸಿದಂತೆ   ಮೂವರನ್ನು ಅಂಕೋಲಾ  ಪೊಲೀಸರು ಶನಿವಾರ  ಬೆಳಗ್ಗೆ ವಶಕ್ಕೆ ಪಡೆದು, ವಿಚಾರಣೆ ನಡೆಸಿ ಸಂಜೆ ಬಂಧಿಸಿದರು.  ಕಾರವಾರ ಸನಿಹದ  ವೈಲವಾಡ ಗ್ರಾಮದ ಸುಭಾಷ್, ಹರಿಶ್ಚಂದ್ರ ಮತ್ತು ಅನಿಲ್ ಎಂಬವರನ್ನು  ಶನಿವಾರ ಬೆಳಗ್ಗೆ  ಪೊಲೀಸರು ವಶಕ್ಕೆ ಪಡೆದು ,ವಿಚಾರಣೆ ನಡೆಸಿದರು.

             ಅವರ್ಸಾ ಸನಿಹದ  ಹಟ್ಟಿಕೇರಿಯ ಮನೆಯ ಅಂಗಳದಲ್ಲಿ   ರಾಜೀವ್  ಪಿಕಳೆ (63) ಡಬಲ್ ಬ್ಯಾರಲ್ ಗನ್ನಿಂದ  ಸ್ವಯಂ ಗುಂಡು ಹಾರಿಸಿಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದರು.  ಸುಮಾರು ಹದಿನೈದು ದಿನಗಳ ಹಿಂದೆ ಪಿಕಳೆ ನರ್ಸಿಂಗ್ ಹೋಂನಲ್ಲಿ , ಅವಧಿ ಮುಗಿದ ಓಷಧವನ್ನು ಫಾರ್ಮಸಿಸ್ಟ್‌ ರಾಜೀವ್ ಪಿಕಳೆ ವಿತರಣೆ ಮಾಡಿದ  ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿತ್ತು. ಅವಧಿ ಮೀರಿದ ಓಷಧ ನೀಡಲಾಗಿದೆ ಎಂದು ಪ್ರಶ್ನಿಸಿ,  ನಡೆದ ಜಗಳವನ್ನು  ವಿಡಿಯೋ ಮಾಡಿ, ಸಾಮಾಜಿಕ ಜಾಲತಾಣಗಳಲ್ಲಿ ಹರಿಬಿಟ್ಟಿದ್ದರು.ಈ ವಿಡಿಯೋ ವೈರಲ್ ಆದ ಬಳಿಕ, ರಾಜೀವ್  ಪಿಕಳೆ ಸಾರ್ವಜನಿಕವಾಗಿ ಕ್ಷಮೆ ಕೇಳಿದ್ದರು.

            ಅವಧಿ ಮುಗಿದ  ಓಷಧಿ ವಿತರಣೆ  ಕಣ್ತಪ್ಪಿನಿಂದ ನಡೆದಿದೆ  ಎಂದಿದ್ದರು. ಆದರೆ, ಪದೇ ಪದೇ ವಿಡಿಯೋ ವೈರಲ್ ಆಗುತ್ತಿದ್ದುದರಿಂದ ಅವರು ತೀವ್ರ ಮಾನಸಿಕ ಒತ್ತಡಕ್ಕೆ ಒಳಗಾಗಿದ್ದರು ಎನ್ನಲಾಗಿದೆ.ಫಾರ್ಮಾಸಿಸ್ಟ್‌ ರಾಜೀವ್ ಎಸ್‌. ಪಿಕಳೆ  ಆತ್ಮಹತ್ಯೆ ಪ್ರಕರಣ ಗಂಭೀರ ಸ್ವರೂಪ ಪಡೆದುಕೊಂಡ ಹಿನ್ನೆಲೆಯಲ್ಲಿ, ಅಂಕೋಲಾ ಪೊಲೀಸರು ತನಿಖೆ ತೀವ್ರಗೊಳಿಸಿ, ವಿಡಿಯೋ ವೈರಲ್ ಮಾಡಿದ ಆರೋಪಿಗಳ ಪತ್ತೆಗೆ ಮುಂದಾಗಿದ್ದರು. ತನಿಖೆ ವೇಳೆ ಆರೋಪಿಗಳ ಪಾತ್ರ ದೃಢಪಟ್ಟ ಹಿನ್ನೆಲೆಯಲ್ಲಿ ಮೂವರನ್ನು ಬಂಧಿಸಿದ್ದು ಅಂಕೋಲಾ ಜೆಎಂಎಫ್ಸಿ ನ್ಯಾಯಾಧೀಶರ ಎದುರು ಹಾಜರುಪಡಿಸಲಾಗುತ್ತಿದೆ ಎಂದು ಅಂಕೋಲಾ ಪೊಲೀಸ್ ಠಾಣೆಯ ಪಿಎಸ್ ಐ ತಿಳಿಸಿದ್ದಾರೆ.