ಮಹಾಲಿಂಗಪುರ 01 : ಇಂದು ನಾವೆಲ್ಲರೂ ಹನ್ನೆರಡನೆಯ ಶತಮಾನದ ಶರಣರ ವಚನಗಳನ್ನು ನೋಡುತ್ತಿದ್ದೇವೆ ಓದುತ್ತಿದ್ದೇವೆ ಅಂದರೆ ಅದಕ್ಕೆ ಕಾರಣರಾದವರೇ ಮಡಿವಾಳ ಮಾಚಿದೇವರು. ಅವರು ಅಂದು ವಚನಗಳನ್ನು ರಕ್ಷಿಸದಿದ್ದರೆ ಇಂದು ನಮಗೆ ಅವುಗಳ ಅನುಭವದ ಸ್ವಾದ ನಮಗೆ ದೊರೆಯುತ್ತಿರಲಿಲ್ಲ. ವಚನಗಳನ್ನು ರಕ್ಷಿಸಿ ನಮಗೆ ಬಳುವಳಿಯಾಗಿ ಕೊಟ್ಟ ವೀರ ಮಡಿವಾಳ ಮಾಚಿದೇವ ಎಂದು ಪುರಸಭೆ ಮಾಜಿ ಅಧ್ಯಕ್ಷರಾದ ಶೇಖರ ಅಂಗಡಿ ಹೇಳಿದರು. ಅವರು ನಗರದ ಪುರಸಭೆಯಲ್ಲಿ ಆಯೋಜಿಸಿದ ವೀರ ಶರಣ ಮಡಿವಾಳ ಮಾಚಿದೇವರ ಜಯಂತಿಯನ್ನು ಅವರ ಭಾವ ಚಿತ್ರಕ್ಕೆ ಪೂಜೆ ಸಲ್ಲಿಸಿ ನೆರವೇರಿಸಿ ಮಾತನಾಡಿ ಕಾಯಕವೇ ಕೈಲಾಸ 'ಎಂದು ತಿಳಿದು ದುಡಿವ ಮಡಿವಾಳ ಸಮಾಜ ಹನ್ನೆರಡನೆ ಶತಮಾನದ ಶರಣ ಮಡಿವಾಳ  ಮಾಚಿದೇವನನ್ನು ಆರಾಧ್ಯ ದೈವವನ್ನಾಗಿಸಿಕೊಂಡು ಭಕ್ತಿ ಭಾವದಿಂದ ಸಮಾಜ ಸೇವೆ ಮಾಡುತ್ತದೆ ಎಂದರು.  

ನಂತರ ಮಾತನಾಡಿದ ಪುರಸಭೆ ಅಧಿಕಾರಿ ಎಸ್ ಎನ್ ಪಾಟೀಲ ಮಡಿವಾಳರ ಸಮುದಾಯವು ಶೈಕ್ಷಣಿಕವಾಗಿ ಮತ್ತು ಆರ್ಥಿಕವಾಗಿ ಶೋಚನೀಯ ಸ್ಥಿತಿಯಲ್ಲಿದೆ. ರಾಜಕೀಯ ಕ್ಷೇತ್ರದಲ್ಲಂತೂ ಹೇಳಿ ಕೊಳ್ಳಲು ಒಬ್ಬನೇ  ಒಬ್ಬ  ಜನನಾಯಕನಿಲ್ಲ. ಹೀಗಾಗಿ ಆರ್ಥಿಕವಾಗಿ ಸಭಲರಾಗುವ ದಿಸೆಯಲ್ಲಿ ಸಾಗುವದು ದೂರದ ಕನಸೇ ಸರಿ. ಮಡಿವಾಳ ಸಮಾಜವನ್ನು ದೆಹಲಿ, ಆಸ್ಸಾಂ, ಬಿಹಾರ, ಹಿಮಾಚಲಪ್ರದೇಶ ,ಕೇರಳ, ಮಣಿಪುರ, ಮೇಘಾಲಯ, ನಾಗಾಲ್ಯಾಂಡ ,ಪಶ್ಚಮ ಬಂಗಾಳ, ಅರುಣಾಚಲ ಪ್ರದೇಶದಲ್ಲಿ ಪರಿಶಿಷ್ಟಜಾತಿಗೆ ಸೇರಿಸಲಾಗಿದೆ. ಆದರೆ ಕರ್ನಾಟಕದಲ್ಲಿ ದಶಕಗಳ ಅವಿಶ್ರಾಂತ ಹೋರಾಟದ ಹಿನ್ನಲೆ ಇದ್ದರೂ ಮಡಿವಾಳರನ್ನು ಪರಿಶಿಷ್ಟ ಜಾತಿಗೆ  ಸೇರಿಸುವ ಬೇಡಿಕೆ ಇಡೇರಿಲ್ಲ ಎಂದರು. ಈ ಸಂದರ್ಭದಲ್ಲಿ ಮಾರುತಿ ದಳವಾಯಿ, ಶಿವಾನಂದ ಚೌದರಿ, ಲಕ್ಷ್ಮೀ ಪರೀಟ, ದುರ್ಗಪ್ಪ ಜಮಖಂಡಿ, ಶ್ರೀಶೈಲ ಅಂಗಡಿ ಸೇರಿದಂತೆ ಹಲವರು ಇದ್ದರು.