ದಾಂಡೇಲಿ 02 : ದಾಂಡೇಲಿಯ ಮಲೀನ ಪರಿಸರವು ಮಾನವನ ಆರೋಗ್ಯದ ಮೇಲೆ ಗಂಭೀರ ಪರಿಣಾಮ ಬೀರುತ್ತಲಿದೆ. ವಾಯು, ನೀರು, ಮಣ್ಣಿನ ಮಾಲಿನ್ಯದಿಂದ ಉಂಟಾಗುವ ಸಮಸ್ಯೆಗಳು ದಿನದಿಂದ ದಿನಕ್ಕೆ ಹೆಚ್ಚುತ್ತಿದೆ. ಸ್ಥಳೀಯ ಕೈಗಾರಿಕೆಗಳಿಂದ ಜನರಿಗೆ ಉದ್ಯೋಗ ಸೃಷ್ಟಿಯಾಗಿದೆ ಎನ್ನುವ ಕಾರಣಕ್ಕೆ ಎಲ್ಲವನ್ನೂ ಮೌನವಾಗಿ ಸಹಿಸಿಕೊಳ್ಳಬೇಕಾದ ಪರಿಸ್ಥಿತಿ ಸ್ಥಳೀಯರಿಗೆ ಬಂದೊದಗಿದೆ. ಕಳೆದ ಕೆಲವು ವರ್ಷಗಳಿಂದ ಇಲ್ಲಿಯ ಪರಿಸರದಲ್ಲಿ ಮಣ್ಣಿನ ಧೂಳು ಒಂದೆಡೆಯಾದರೆ, ಆಕಾಶದಿಂದ ಬೀಳುವ ಹಾರುಬೂದಿ, ಕೈಗಾರಿಕೆಗಳು ಉಗುಳುವ ಹೊಗೆ, ಕಾಳಿನದಿ ಒಡಲು ಸೇರುವ ರಾಸಾಯನಿಕ ಮಿಶ್ರಿತ ನೀರು ಇಂತಹ ಮಾಲಿನ್ಯಗಳಿಂದ ಜನರ ಆರೋಗ್ಯದ ಮೇಲೆ ಉಂಟಾಗುವ ಸಮಸ್ಯೆಗಳು ದಿನದಿಂದ ದಿನಕ್ಕೆ ಹೆಚ್ಚುತ್ತಲಿದೆ. ಉಸಿರಾಟದ ಖಾಯಿಲೆಗಳಿಂದ ಜನ ಬಳಲುತ್ತಿದ್ದಾರೆ.

ವಾಯು ಮಾಲಿನ್ಯದಿಂದ ಅಸ್ತಮಾ, ಬ್ರಾಂಕೈಟಿಸ್, ಶ್ವಾಸಕೋಶದ ಸೋಂಕುಗಳು ಹೆಚ್ಚಾಗುತ್ತಿದೆ. ದಿನನಿತ್ಯ ಆಸ್ಪತ್ರೆಯಲ್ಲಿ ಚಿಕಿತ್ಸೆಗಾಗಿ  ರೋಗಿಗಳು ಸಾಲುಗಟ್ಟಿ ನಿಂತಿರುತ್ತಾರೆ. ಇದು ಒಂದೆಡೆಯಾದರೆ, ನೀರಿನ ಮೂಲಕ ಹರಡುವ ರೋಗಗಳು ಹೆಚ್ಚುತ್ತಿದೆ. ಗ್ರಾಮಸ್ಥರು, ನಗರವಾಸಿಗಳಿಗೆ ಅಜೀರ್ಣ, ಟೈಪಾಯಿಡ್, ಜ್ವರದ ಸಮಸ್ಯೆಗಳು  ಉಂಟಾಗುತ್ತಿದೆ. ಚರ್ಮ ಹಾಗೂ ಕಣ್ಣು ಸಮಸ್ಯೆಗಳು ಹೆಚ್ಚಿವೆ. ಕಲುಷಿತ ವಾತಾವರಣದಿಂದ ಅಲರ್ಜಿ, ಚರ್ಮದ ತುರಿಕೆ, ಕಣ್ಣು  ಊರಿಯುತ ಸಾಮಾನ್ಯವಾಗಿದೆ. ಇದರಿಂದ ದೀರ್ಘಕಾಲದ ಪರಿಣಾಮಗಳು ರೋಗಿಗಳಲ್ಲಿ ಗೋಚರಿಸುತ್ತಿದ್ದು, ಹೃದಯ ಸಂಬಂದಿತ ಖಾಯಿಲೆಗಳು, ಕ್ಯಾನ್ಸರ್ ಮುಂತಾದ ಗಂಭೀರ ಆರೋಗ್ಯ ಸಮಸ್ಯೆಗಳಿಗೂ ಕಾರಣವಾಗುತ್ತಲಿದೆ. ಪರಿಸರವನ್ನು ರಕ್ಷಿಸುವದು ನಮ್ಮ ಪ್ರತಿಯೊಬ್ಬರ ಜವಾಬ್ದಾರಿ. ಈ ಹಿನ್ನೆಲೆಯಲ್ಲಿ ಅಗತ್ಯ ಮುಂಜಾಗ್ರತಾ ಕ್ರಮಗಳನ್ನು ಕೈಗೊಂಡು ಜನರಲ್ಲಿ ಜಾಗ್ರತಿ ಮೂಡಿಸಿ ಪರಿಸರ ಮಾಲೀನ್ಯ ತಡೆಗಟ್ಟುವ ಮೂಲಕ ರೋಗ ರುಜೀನಗಳಿಗೆ ತಡೆ ಹಾಕಬೇಕು.