ಹೂವಿನಹಡಗಲಿ: 08- ಗ್ರಾಮೀಣ ವಿದ್ಯಾರ್ಥಿಗಳಿಗೆ ಕಷ್ಟ ಎನಿಸುವ ಇಂಗ್ಲಿಷ್ ವಿಷಯದ ಬಗ್ಗೆ ಆತ್ಮವಿಶ್ವಾಸ ಮೂಡಿಸಲು ಬೂಸ್ಟರ್ ತರಗತಿಗಳು ಸಹಕಾರಿಯಗಳಿವೆ ಎಂದು ಸೊ. ಕಾ. ಬಾಲಕಿಯರ ಸ. ಪ. ಕಾಲೇಜಿನ ಪ್ರಾಚಾರ್ಯ ಎ. ಕೊಟ್ರಗೌಡ ಅಭಿಪ್ರಾಯಪಟ್ಟರು.     ತಾಲೂಕಿನ ಸೋಗಿ ಗ್ರಾಮದ ಪಟ್ಟೇದ ಸಿದ್ಧಮಲ್ಲಪ್ಪ ಸರಕಾರಿ ಪದವಿಪೂರ್ವ ಕಾಲೇಜಿನಲ್ಲಿ ಸೋಗಿ ಹಾಗೂ ಉತ್ತಂಗಿ ಸರಕಾರಿ ಪದವಿಪೂರ್ವ ಕಾಲೇಜಿನ ದ್ವಿತೀಯ ಪಿಯುಸಿ ವಿದ್ಯಾರ್ಥಿಗಳಿಗೆ ಫಲಿತಾಂಶ ಸುಧಾರಣೆಯ ಆಯೋಜಿಸಿದ್ದ ಇಂಗ್ಲಿಷ್ ಬೂಸ್ಟರ್ ತರಗತಿ ಉದ್ಘಾಟಿಸಿ ಅವರು ಮಾತನಾಡಿದರು. ನಗರ ವಿದ್ಯಾರ್ಥಿಗಳಿಗಿಂತ ಗ್ರಾಮೀಣ ಮಕ್ಕಳಿಗೆ ಮೂಲಭೂತ ಕಲಿಕೆಗೆ ಅವಕಾಶಗಳು ಕಡಿಮೆ ಸಿಗುತ್ತವೆ.

ಇಂತಹ ಸಂದರ್ಭದಲ್ಲಿ ಪೂರಕ ಬೋಧನೆ ನೀಡುವ ಬೂಸ್ಟರ್ ತರಗತಿಗಳು ಅವರಿಗೆ ಹೊಸ ದಿಕ್ಕನ್ನು ತೋರಿಸುತ್ತವೆ ಎಂದರು. ಅಧ್ಯಕ್ಷತೆ ವಹಿಸಿದ್ದ ಪ್ರಾಚಾರ್ಯರಾದ ಎಸ್‌. ಜ್ಯೋತಿ ಮಾತನಾಡಿ ಗ್ರಾಮೀಣ ವಿದ್ಯಾರ್ಥಿಗಳಿಗೆ ಅವಕಾಶ ಸಿಕ್ಕರೆ ಅವರು ಕೂಡ ನಗರದ ವಿದ್ಯಾರ್ಥಿಗಳಂತೆ ಸಾಧನೆ ಮಾಡಲು ಸಮರ್ಥರಾಗಿದ್ದಾರೆ ಎಂದು ಹೇಳಿದರು.  ಉತ್ತಂಗಿ ಕಾಲೇಜಿನ ಪ್ರಾಚಾರ್ಯ ಕಲ್ಲನಗೌಡ್ರ ಪ್ರಕಾಶ್, ಸೋಗಿ ಕಾಲೇಜಿನ ಉಪನ್ಯಾಸಕರಾದ ಶಬೀನ, ನರೇಶ್, ಪರಶುರಾಮ ನಾಗೋಜಿ, ಜಯಪ್ರಕಾಶ್, ನಟರಾಜ್ ಭಾಗವಹಿಸಿದ್ದರು. ಎರಡೂ ಕಾಲೇಜಿನ 60ಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಬೂಸ್ಟರ್ ತರಗತಿಯ ಪ್ರಯೋಜನ ಪಡೆದುಕೊಂಡರು.