ಸವದತ್ತಿ : ನಗರದ ಪದಕಿಪುರಂ ಶಂಕರ ಮಠದಲ್ಲಿ ವಿಶ್ವ ಅಂತರಾಷ್ಟ್ರೀಯ ಯೋಗ ದಿನಾಚರಣೆಯನ್ನು ಸಡಗರ ಹಾಗೂ ಸಂಭ್ರಮದಿಂದ ಆಚರಿಸಲಾಯಿತು. ಕಾರ್ಯಕ್ರಮದಲ್ಲಿ ಭಾಗವಹಿಸಿ ಮಾತನಾಡಿದ ಡಾ. ನಯನಾ ಭಸ್ಮೆ ಅವರು, “ನಿತ್ಯ ಯೋಗದಿಂದ ಸದಾ ನಿರೋಗಿಯಾಗಿರಬಹುದು. ಆರೋಗ್ಯವೇ ನಿಜವಾದ ಭಾಗ್ಯ; ಅದಕ್ಕೆ ಯೋಗವೇ ಮೂಲಮಂತ್ರ. ಪ್ರತಿಯೊಬ್ಬರೂ ದಿನನಿತ್ಯ ಯೋಗಾಭ್ಯಾಸವನ್ನು ರೂಢಿಸಿಕೊಳ್ಳಬೇಕು. ಯೋಗದಿಂದ ದೇಹ ಆರೋಗ್ಯವಾಗಿದ್ದು, ರೋಗಗಳು ಹತ್ತಿರ ಸುಳಿಯುವುದಿಲ್ಲ. ಮಾನಸಿಕ ಹಾಗೂ ದೈಹಿಕ ಸಮತೋಲನಕ್ಕೆ ಯೋಗ ಅತ್ಯಗತ್ಯ,” ಎಂದು ತಿಳಿಸಿದರು. 

ಸೀಮಾ ವನಕಿ ಮಾತನಾಡಿ, ಯೋಗವು ಕೇವಲ ವ್ಯಾಯಾಮವಲ್ಲ; ಅದು ದೈಹಿಕ, ಮಾನಸಿಕ ಹಾಗೂ ಆಧ್ಯಾತ್ಮಿಕ ಅಭ್ಯಾಸವಾಗಿದೆ ಎಂದು ವಿವರಿಸಿದರು.  ಈ ಸಂದರ್ಭದಲ್ಲಿ ಯೋಗ ಗುರು ಬಾಬು ಲಮಾಣಿ ಅವರನ್ನು ಕಾರ್ಯಕ್ರಮದ ಆಯೋಜಕರು ಹಾಗೂ ಗಣ್ಯರು ಸನ್ಮಾನಿಸಿ ಗೌರವಿಸಿದರು.  ಕಾರ್ಯಕ್ರಮದಲ್ಲಿ ಪಲ್ಲವಿ ಪದಕಿ, ಪಾರ್ವತಿ ಕಾಂತಿಮಠ, ಹಸೀನಾ ಯಲಿಗಾರ, ಸುಮಿತ್ರಾ ಕಾರದಗಿ, ಮೇಘಾ ಬೆಂಡೆಗುಂಬಳ, ಪ್ರತಿಮಾ ಲಾಳಗೆ, ಮೀನಾಕ್ಷಿ ವಡಕನ್ನವರ, ಸುನೀತಾ ಇಜಂತಕರ, ಕೀರ್ತಿ ಬಾಗಲಕೋಟ ಸೇರಿದಂತೆ ಅನೇಕರು ಉಪಸ್ಥಿತರಿದ್ದರು.