ಶಿಗ್ಗಾವಿ, ಸೆ.7: ಶಿವನ ಅಂಶವಾಗಿ ಭೂಮಿಯ ಮೇಲೆ ಜನ್ಮ ತಾಳಿದ ವೀರಭದ್ರ ದೇವರು, ಪುರಾಣಗಳಲ್ಲಿ ಉಗ್ರ ಸ್ವರೂಪದ ದೇವರಾಗಿ ಬಣ್ಣಿಸಲ್ಪಟ್ಟಿದ್ದಾರೆ. ದಕ್ಷ ಯಜ್ಞದ ಸಂದರ್ಭದಲ್ಲಿ ಶಿವನಿಗೆ ನಡೆದ ಅವಮಾನದಿಂದ ಆಕ್ರೋಶಗೊಂಡ ಶಿವನು ತನ್ನ ಜಟೆಯನ್ನು ನೆಲಕ್ಕೆ ಅಪ್ಪಳಿಸಿದಾಗ ವೀರಭದ್ರನ ಅವತಾರವಾಯಿತು ಎಂಬುದು ಪುರಾಣಗಳ ಸಾರ.

ದಕ್ಷ ಬ್ರಹ್ಮನ ವಿರುದ್ಧ ಯುದ್ಧ ಮಾಡಿ ಆತನನ್ನು ಸಂಹರಿಸಿದ ವೀರಭದ್ರನು ಅಸುರರ ಶಿಕ್ಷಕ ಹಾಗೂ ದೇವತೆಗಳ ರಕ್ಷಕನಾಗಿ ಪುರಾಣಗಳಲ್ಲಿ ಉಲ್ಲೇಖಗೊಂಡಿದ್ದಾನೆ. ದೇಶದ ವಿವಿಧೆಡೆ ವೀರಭದ್ರಸ್ವಾಮಿ ದೇವಾಲಯಗಳಿದ್ದು, ಕರ್ನಾಟಕದ, ವಿಶೇಷವಾಗಿ ಉತ್ತರ ಕರ್ನಾಟಕದ ಭಾಗಗಳಲ್ಲಿ ವೀರಭದ್ರಸ್ವಾಮಿಯ ಆರಾಧನೆಗೆ ವಿಶೇಷ ಮಹತ್ವವಿದೆ.  

ಪ್ರತಿ ಮಂಗಳವಾರವನ್ನು ವೀರಭದ್ರಸ್ವಾಮಿಯ ವಾರವೆಂದು ಭಕ್ತರು ಆಚರಿಸುತ್ತಾರೆ. ಈ ಸಂದರ್ಭದಲ್ಲಿ ವೀರಭದ್ರಸ್ವಾಮಿ ದೇವಾಲಯಗಳಲ್ಲಿ ವಿಶೇಷ ಪೂಜೆ, ಪುನಸ್ಕಾರಗಳು ನಡೆಯುತ್ತವೆ. ವೀರಭದ್ರನ ಅವತಾರ ಹಾಗೂ ಮಹಿಮೆಯನ್ನು ಸಾರುವ ಜಾನಪದ ಕಲೆಗಳು ಕೂಡ ರಾಜ್ಯದ ವಿವಿಧ ಭಾಗಗಳಲ್ಲಿ ಪ್ರಸಿದ್ಧವಾಗಿವೆ.  

ವೀರಭದ್ರನ ಆರಾಧನೆಯೊಂದಿಗೆ ‘ವೀರಗಾಸೆ’, ‘ವೀರಭದ್ರ ಕುಣಿತ’, ‘ಲಿಂಗದ ವೀರ’ ಹಾಗೂ ‘ಕಾಶಿ ಕುಣಿತ’ ಸೇರಿದಂತೆ ವಿವಿಧ ಜಾನಪದ ಕಲಾ ಪ್ರಕಾರಗಳು ಬೆಳೆದುಬಂದಿವೆ. ಇವುಗಳಲ್ಲಿ ವೀರಭದ್ರನ ಅವತಾರ, ಶೌರ್ಯ ಹಾಗೂ ಮಹಿಮೆಯನ್ನು ನೃತ್ಯ ಮತ್ತು ವಾದ್ಯಗಳ ಮೂಲಕ ಪ್ರದರ್ಶಿಸಲಾಗುತ್ತದೆ.  

ವೀರಭದ್ರಸ್ವಾಮಿಯನ್ನು ಮನೆ ದೇವರನ್ನಾಗಿ ಆರಾಧಿಸುವ ಕುಟುಂಬಗಳಲ್ಲಿ ಮದುವೆ ಸೇರಿದಂತೆ ವಿವಿಧ ಶುಭಕಾರ್ಯಗಳ ಸಂದರ್ಭದಲ್ಲಿಯೂ ವಿಶೇಷ ಆಚರಣೆಗಳಿವೆ. ಅದರಲ್ಲೂ ಗಂಡು ಮಕ್ಕಳ ಮದುವೆಯಲ್ಲಿ ‘ಗುಗ್ಗಳ ಮದುವೆ’ ಆಚರಿಸುವುದು ಕೆಲವೆಡೆ ವಾಡಿಕೆಯಾಗಿದೆ. ಮದುವೆಯ ದಿನ ಪುರವಂತರನ್ನು ಕರೆಸಿ, ವೀರಭದ್ರಸ್ವಾಮಿ ದೇವಾಲಯದವರೆಗೆ ಮೆರವಣಿಗೆ ನಡೆಸಲಾಗುತ್ತದೆ.  

ಮೆರವಣಿಗೆಯ ಸಂದರ್ಭದಲ್ಲಿ ಪುರವಂತರು ಕೈಯಲ್ಲಿ ಉದ್ದನೆಯ ಕತ್ತಿಯನ್ನು ಹಿಡಿದು, ವಿವಿಧ ಭಂಗಿಗಳಲ್ಲಿ ನೃತ್ಯ ಮಾಡುತ್ತಾ ವೀರಭದ್ರನ ಅವತಾರ ಹಾಗೂ ಮಹಿಮೆಯನ್ನು ಸಾರುತ್ತಾರೆ. ಅವರ ನೃತ್ಯವನ್ನು ನೋಡುವುದು ಭಕ್ತರಿಗೆ ರೋಮಾಂಚನ ಉಂಟುಮಾಡುತ್ತದೆ. ಕನ್ನಡ ಜಾನಪದ ಸಾಹಿತ್ಯದಲ್ಲಿಯೂ ವೀರಭದ್ರನ ಕುಣಿತಕ್ಕೆ ವಿಶೇಷ ಸ್ಥಾನವಿದೆ.  

ಮಹಿಮೆಯುಳ್ಳ ವೀರಭದ್ರಸ್ವಾಮಿ ಜಯಂತಿಯನ್ನು ಆಚರಿಸುವ ಪರಂಪರೆ ಇತ್ತೀಚಿನ ವರ್ಷಗಳಲ್ಲಿ ಮತ್ತಷ್ಟು ವಿಸ್ತರಿಸುತ್ತಿದ್ದು, ಈ ವರ್ಷದ ಜಯಂತಿ ಕಾರ್ಯಕ್ರಮವು ಸೆ.15ರಂದು ರಾಜ್ಯದಾದ್ಯಂತ ಇರುವ ವಿವಿಧ ವೀರಭದ್ರಸ್ವಾಮಿ ದೇವಾಲಯಗಳಲ್ಲಿ ವೈಭವದಿಂದ ನಡೆಯಲಿದೆ.  

ವೀರಭದ್ರಸ್ವಾಮಿ ಜಯಂತಿಯ ಅಂಗವಾಗಿ ದೇವಾಲಯಗಳಲ್ಲಿ ವಿಶೇಷ ಪೂಜೆ, ಧಾರ್ಮಿಕ ಕಾರ್ಯಕ್ರಮಗಳು ಹಾಗೂ ವಿವಿಧ ಜಾನಪದ ಕಲಾ ಪ್ರದರ್ಶನಗಳನ್ನು ಆಯೋಜಿಸಲು ಭಕ್ತರು ಸಿದ್ಧತೆ ನಡೆಸಿದ್ದಾರೆ.