ಅರಣ್ಯ ಇಲಾಖೆ ಸಿಬ್ಬಂದಿ ನಡೆಸಿದ ತೀವ್ರ ಶೋಧ ಕಾರ್ಯಾಚರಣೆಯ ವೇಳೆ ಹೆಣ್ಣು ಹುಲಿಯನ್ನು ಪತ್ತೆಹಚ್ಚಿ, ಅರಿವಳಿಕೆ ನೀಡಿ ಪಂಜರದಲ್ಲಿ ಬಂಧಿಸಲಾಗಿದೆ.

ಸೋಮವಾರ ಮಧ್ಯಾಹ್ನ ಶಿರಜಗಾಂವ್ ಕಸ್ಬಾ ಸಮೀಪದ ಹೊಲದಲ್ಲಿ ಕೆಲಸ ಮಾಡುತ್ತಿದ್ದ ರೈತನ ಮೇಲೆ ಹೆಣ್ಣು ಹುಲಿ ದಾಳಿ ನಡೆಸಿತ್ತು. ಗಂಭೀರವಾಗಿ ಗಾಯಗೊಂಡಿದ್ದ ರೈತ ಚಿಕಿತ್ಸೆ ಫಲಕಾರಿಯಾಗದೆ ಮೃತಪಟ್ಟರು.

ಘಟನೆಯ ಬಳಿಕ ಅರಣ್ಯ ಇಲಾಖೆ ಶೋಧ ಮತ್ತು ಪತ್ತೆ ಕಾರ್ಯಾಚರಣೆಯನ್ನು ಮತ್ತಷ್ಟು ತೀವ್ರಗೊಳಿಸಿತು. ಅಂತಿಮವಾಗಿ ಶಿರಜಗಾಂವ್ ಕಸ್ಬಾದಲ್ಲಿರುವ ಕೃಷಿ ಜಮೀನಿನಲ್ಲಿ ಹೆಣ್ಣು ಹುಲಿಯನ್ನು ಪತ್ತೆಹಚ್ಚಿ, ಅರಿವಳಿಕೆ ನೀಡಿ ವಶಕ್ಕೆ ಪಡೆಯಲಾಯಿತು.

ಭಾನುವಾರ ಸೋನೋರಿ ಗ್ರಾಮದ 18 ವರ್ಷದ ಉರ್ಮಿಳಾ ಇವಾನೆ ಅವರು ಹೊಲದಲ್ಲಿ ಮೇವು ಕತ್ತರಿಸುತ್ತಿದ್ದಾಗ ಇದೇ ಹೆಣ್ಣು ಹುಲಿ ದಾಳಿ ನಡೆಸಿ ಕೊಂದಿತ್ತು ಎನ್ನಲಾಗಿದೆ. ಈ ಘಟನೆ ಬಳಿಕ ಗ್ರಾಮಸ್ಥರಲ್ಲಿ ಆತಂಕ ಹೆಚ್ಚಾಗಿದ್ದು, ಅಧಿಕಾರಿಗಳ ವಿರುದ್ಧ ಪ್ರತಿಭಟನೆ ನಡೆಸಿ ತಕ್ಷಣ ಕ್ರಮ ಕೈಗೊಳ್ಳುವಂತೆ ಒತ್ತಾಯಿಸಿದ್ದರು.

ಮೋರ್ಶಿ–ಚಾಂದೂರ್ ಬಜಾರ್ ಪ್ರದೇಶದಲ್ಲಿ ಈ ಹೆಣ್ಣು ಹುಲಿ ಈ ಹಿಂದೆ ಮಾನವರು ಮತ್ತು ಜಾನುವಾರುಗಳ ಮೇಲೆ ನಡೆಸಿದ ದಾಳಿಗಳಿಗೂ ಸಂಬಂಧ ಹೊಂದಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಹೆಣ್ಣು ಹುಲಿಯನ್ನು ಪತ್ತೆಹಚ್ಚಲು ಅರಣ್ಯ ಸಿಬ್ಬಂದಿ ವನ್ಯಜೀವಿ ತಜ್ಞರ ಸಹಾಯದಿಂದ ಕ್ಯಾಮೆರಾ ಟ್ರ್ಯಾಪ್‌ಗಳು, ಡ್ರೋನ್‌ಗಳು ಹಾಗೂ ಪತ್ತೆ ಕಾರ್ಯಾಚರಣೆ ತಂಡಗಳನ್ನು ಬಳಸಿದ್ದರು. ಹಲವು ದಿನಗಳ ತೀವ್ರ ಶೋಧದ ಬಳಿಕ ಹುಲಿಯನ್ನು ಸೆರೆಹಿಡಿಯಲಾಗಿದ್ದು, ಭೀತಿಯಲ್ಲಿ ಬದುಕುತ್ತಿದ್ದ ಗ್ರಾಮಸ್ಥರಿಗೆ ಇದರಿಂದ ಕೊಂಚ ನೆಮ್ಮದಿ ದೊರೆತಿದೆ.

ಸೆರೆಹಿಡಿಯಲಾದ ಹೆಣ್ಣು ಹುಲಿಗೆ ಪಶುವೈದ್ಯಕೀಯ ಪರೀಕ್ಷೆ ನಡೆಸಲಾಗುವುದು. ವನ್ಯಜೀವಿ ಸಂರಕ್ಷಣೆ ಮತ್ತು ನಿರ್ವಹಣಾ ನಿಯಮಾವಳಿಗಳ ಪ್ರಕಾರ ಮುಂದಿನ ಕ್ರಮ ಕೈಗೊಳ್ಳಲಾಗುವುದು ಎಂದು ಅರಣ್ಯ ಇಲಾಖೆ ಅಧಿಕಾರಿಗಳು ತಿಳಿಸಿದ್ದಾರೆ.