ಬೆಳಗಾವಿ 15: ಸಾಮಾಜಿಕ, ಧಾರ್ಮಿಕ ಹಾಗು ಶೈಕ್ಷಣಿಕ ಕ್ಷೇತ್ರದಲ್ಲಿ ಅದ್ಭುತ ಸಾಧನೆ ಮಾಡಿದ, ಶಿಕ್ಷಣಪ್ರೇಮಿ, ಅಖಿಲಭಾರತ ವೀರಶೈವ ಮಹಾಸಭೆಯ ರಾಷ್ಟ್ರೀಯ ಅಧ್ಯಕ್ಷ ಶಾಮನೂರು ಶಿವಶಂಕರ​‍್ಪನವರು ಲಿಂಗೈಕ್ಯರಾದುದು ನಮ್ಮ ನಾಡಿಗೆ ತುಂಬಲಾಗದ ನಷ್ಟ. ಮುತ್ಸದ್ಧಿ ನಾಯಕರಾಗಿದ್ದ ಅವರ ಅಗಲುವಿಕೆಯಿಂದ ಶೈಕ್ಷಣಿಕ ಲೋಕದ ಮಿನುಗು ನಕ್ಷತ್ರವೊಂದು ಕಣ್ಮರೆಯಾದಂತಾಗಿದೆ. ಇದು ಅತ್ಯಂತ ನೋವಿನ ಸಂಗತಿ ಎಂದು ಗದಗ-ಡಂಬಳ ಜಗದ್ಗುರು ತೋಂಟದಾರ್ಯ ಸಂಸ್ಥಾನಮಠದ ಡಾ. ತೋಂಟದ ಸಿದ್ಧರಾಮ ಮಹಾಸ್ವಾಮಿಗಳು ಕಂಬನಿ ಮಿಡಿದಿದ್ದಾರೆ. 

ಇಂದು ಮಾಧ್ಯಮಗಳಿಗೆ ಬಿಡುಗಡೆ ಮಾಡಿದ ಪತ್ರಿಕಾ ಪ್ರಕಟಣೆಯಲ್ಲಿ ಈ ವಿಷಯ ತಿಳಿಸಿದ ಶ್ರೀಗಳು ಶಾಮನೂರು ಶಿವಶಂಕರ​‍್ಪ ಅವರು ಪ್ರತಿಭೆ ಮತ್ತು ಪರಿಶ್ರಮಗಳ ಕೂಡಲಸಂಗಮದಂತಿದ್ದರು. ಅಖಿಲಭಾರತ ವೀರಶೈವ ಮಹಾಸಭೆಯ ರಾಷ್ಟ್ರೀಯ ಅಧ್ಯಕ್ಷರಾದ ನಂತರ ಧರ್ಮದ ಏಳಿಗೆಗಾಗಿ ಮತ್ತು ಲಿಂಗಾಯತ ಸ್ವತಂತ್ರಧರ್ಮದ ಮಾನ್ಯತೆಗಾಗಿ ನಿರಂತರ ಶ್ರಮಿಸುತ್ತಿದ್ದರು. ತಾವು ದಾವಣಗೆರೆಯಲ್ಲಿ ಕರೆದ ಸಮಾವೇಶದಲ್ಲಿ ಲಿಂಗಾಯತರು ಹಿಂದೂಗಳಲ್ಲ ಎಂದು ಘಂಟಾಘೋಷವಾಗಿ ಸಾರಿದ್ದಲ್ಲದೆ ವಿಶ್ವಗುರು ಬಸವಣ್ಣನವರೇ ಈ ಧರ್ಮದ ಧರ್ಮಗುರು ಎಂದು ನಂಬಿ ನಡೆದಿದ್ದರು.

ಇಂದು ಅವರ ಆಶಯಗಳನ್ನು ಈಡೇರಿಸುವುದೇ ನಾವು ಅವರಿಗೆ ಸಲ್ಲಿಸುವ ನಿಜವಾದ ಶ್ರದ್ಧಾಂಜಲಿ ಎನಿಸುವುದು. ಮಹಾದಾಸೋಹಿ, ಶೈಕ್ಷಣಿಕ ಲೋಕದ ಧ್ರುವತಾರೆ ಎನಿಸಿದ್ದ ಮತ್ತು ತಮ್ಮ ಅಂಗವನ್ನು ಮಹಾಲಿಂಗದಲ್ಲಿ ಬೆರೆಸಿದ ಶಾಮನೂರು ಶಿವಶಂಕರ​‍್ಪ ಅವರಿಗೆ ಸಾವಿಲ್ಲ. "ಎಮ್ಮವರಿಗೆ ಸಾವಿಲ್ಲ, ಎಮ್ಮವರು ಸಾವನರಿಯರು" ಎಂಬ ಶರಣವಾಣಿಯನ್ನು ಸಾಕಾರಗೊಳಿಸಿದ ಅವರ ಅಮರ ವ್ಯಕ್ತಿತ್ವ ಚಿರಂತನವಾಗಿರುವುದು. ಅವರ ಅಗಲುವಿಕೆಯಿಂದಾದ ದುಃಖವನ್ನು ಸಹಿಸುವ ಶಕ್ತಿಯನ್ನು ಅವರ ಪರಿವಾರಕ್ಕೆ ಹಾಗೂ ನಾಡ ಜನತೆಗೆ ಬಸವಾದಿ ಶಿವಶರಣರು ಕರುಣಿಸಲಿ ಎಂದು ಶ್ರೀಗಳು ಪ್ರಾರ್ಥಿಸಿದ್ದಾರೆ.